RASUL 10 - PERJANJIAN BARU NALCA YUBA

Petrus Beb Kornelius Beb Eibdarek Yuba

¹ Kaisarea heikek ara nimi si ben hnon Kornelius ulumok. Alda Italia nang aboka si simek yin bonaʾ nang dubnya ulumok.

² Alda Imik Neyung ak lok ganya boboka ulumookanya, alja mab eb nimi nidyaʾ neik so lok ganya boboka pe ulumek. Alda Yahudi nimi bok bonaʾ garan ulumek nim ek arawoka, onoʾ alda Imik Neyung ak hyak sobaʾ molomok.

³ Dara yok sum enyek, hyak yubyek henga dalnenelamla wenyek, yok so ak amamookanya, Imik Neyung lero ara Kornelius bek yeiniboka alak, ”Kornelius o, Kornelius o,” aboka youblumok ak okoka kebok.

⁴ Kornelius bera lero enyek lok anasa keebdaboka lemokja, ”Neyung o, hekaʾ ak ulumla do?” hyok. Wera danyek lero adya Kornelius bek, ”Anja molonaʾ ab, anja eleklelam ab, Imik Neyung saramek uboka alda perob senelamlakanya, onoʾ anak beklenggel,” hyok.

⁵ ”Anasa, wene salek enyek, nimi si Simon, hiboka dara Simon Petrus alameknya benyek, Yope heikek e yanok aboka nimek orugalom.

⁶ Alda yok-yok golunaʾ akleng wililanya Simon bedya ek, senenggom mek gwan berem ulumla ak ulumla,” hyok.

⁷ Wera Kornelius beblaboka yuba salarek lero era seleb bilimok dara, Kornelius bera, alja wa wen nang penya nang uboka, onoʾ yin bon nang ben hnon hyak pe uboka alak diri bo ulumoknya hnon ak, ”Yoululum,” hyok.

⁸ Wera Kornelius bedya alak hekaʾ huboka lemok anyek nidyaʾ nekoka lebgogomok dara, Yope heikek bululum aboka orugosuk.

⁹ Wera ampum maboka gwelegok dara, pikik anam balamek ara, Yope heik berem lanal binob aboka byik salek enyek, yubyek dukdukanek enyek, Petrus bera erumaʾ dubuk sam heng uboka Imik Neyung ak molowonun aboka welemok.

¹⁰ Dara, Petrus bera gwaneng ok uboka desinya senen ulumok. Dara, denaʾ alsamba anam beillilemek salek enyek, alja ganya era yokaʾ adya hnon alak bo amamok.

¹¹ Im pik gaboka yokaʾ anyek akleng go dombadya al liboka boboka sokok sam elekdo okdo doblinggemokaʾ ak eibuk.

¹² Dara, akleng lom enyek ara, yana soruka yakaʾ ab, mon dib belega yabalamla ab, bei wining ab, maro balamok ab danyek, eiyimok.

¹³ Dara, onoʾ yuba hnon Petrus bek lebokja, ”Petrus o, wera anda sekoka, ban hnon oboka del yabalom,” aboka orugumok.

¹⁴ Danyek Petrus bedya, ”Orok e, Wenelesilimnya o, nara mem ananya neb, melinya sembejaʾanya neb dara, hyak delyamanggulunanya bar,” hyok.

¹⁵ Bok onoʾ Petrus bek hnon saawoka lebok ara, ”Imik Neyung adya or seleb perob nenemoknya nera, anja dara, malyaʾ aboka wenyanggom,” hyok.

¹⁶ Dara wera, unumok ara, li winilya bo aabookanya, onsok imik heikek jaboka bo welemok.

¹⁷ Petrus bedya nera damok ara hekasa ubla do senewoka, anam ganya seiniro balamok salek enyek, Kornelius bedya Petrus bek e yoululum aboka orugusuk nang era, Simon bedya e eiyiwoka pik sindamak sam ulumek.

¹⁸ Dara, on nang edya e nenyek an yokaʾ ulumek nim ek bii amekja, ”Ugunja ek an nimi si Simon Petrus alamaknya benyek ugunub neikaʾ malalum gom?” aboka heimek.

¹⁹ Petrus bera, alak denaʾ bo amoro domok anasa leboka, damok ara hekasa umla do senewoka anam seinilimok salek enyek, Imik Neyung Geisinya adya Petrus bek, ”Petrus o, nimi winilya nang edya anak elenjak bar.

²⁰ Wera anasa, wei berra aboka yinggilom. Nadya sikenek el bululum aboka orugeisin anasa, anda ganya ebgelyek, or neikik bululum,” hyok.

²¹ Dara, Petrus bera sokok ak yingginiboka el yeilimek nang ek, ”Hem yab o, ugunda na elenulumnya bera, nara alan. Dara, ugunda hek ak seiniyiwoka yeililum do?” hyok.

²² Dara, sikja Petrus bek lebekja, ”Nunja neyung bera Imik Neyung ak lok ganya boboka ulumla dara, Yahudi nimi nidyaʾ ara alak dubnya senewoka alak perob aboka lelemaknya. Geisa Imik Neyung lero enedya, anja lelelamnya nenyek keblul aboka, Simon Petrus anja ek youlul aboka youblom aboka orugomok,” hyek.

²³ Wera, Petrus bedya, ”E nenyek an neikaʾ mabnemab anasa, or ek wekel yoululum,” hyok. Dara, maboka gwelegok dara, Petrus beb neikaʾ lanawoka balamek dara, Yope heikek ab Imik Neyung mab anababya neikaʾ bilimek.

²⁴ Balamek ara pikik li hnonok maboka, Kaisarea heikek lanal bilimek. Dara, Kaisarea heik ara Kornelius bera alja ek mabo nimi yilaʾ eb, alja hemyabo pe ganya olokdangoka ulumek nang eb, nadya ek yoululum aboka e bilisuk nang anyek, diri ulusikaʾ ak Petrus benya arobaʾ ara byik.

²⁵ Dara Petrus bera seleb Kornelius bedya ek wekel yabok enyek, Kornelius bedya pika diboka, Petrus bedya yan damak dunuwoka gimok.

²⁶ Bok Petrus bedya Kornelius bek, ”Nara nim ak anasa, nak gibnenenggom, seklom,” aboka orugomok.

²⁷ Wera Petrus bera Kornelius beb neikaʾ yuba sabgiga ek sam wekel bilimok. Dara, anyagan ara nimi nauba orowek seleb mamagoka longomekaʾ ak eiyimok.

²⁸ Dara, Petrus bedya Kornelius bedya ek longomek nim ek, ”Yahudi nimi yokaʾ nim ara, Yahudi gom nim eb neikaʾ hiboka unaʾ ara mem aboka, Yahudi Imik Neyung yub adya momnya donaʾ pik hyak mem nong hyok ara, ugunda ella ululum. Bok nak dara, Imik Neyung adya nera memaʾ aboka, lek malyaʾ sembejaʾanya senenggom henyok.

²⁹ Anasa wera, an adya nak anyagan yalom aboka orugonyum dara, nara anyagan yangganaʾ amba dara, yoknya senewanggumno. Anasa wera neyung o, hekasa nara anyagan yanaʾ anyek ella donun aboka damok ara anasemba aboka ella donun bar,” hyok.

³⁰ Dara, Kornelius bedya lebok ara, ”Li winilinya sum, nara henga dalelnenelamla wenyek weneba ubla sok salek, nara heng uboka Imik Neyung ak mololamsa. Dara wene sab-sab, nimi ben hnon, alja akleng era geisa nong ak ongomoknya benyek na dam gaboka sekok.

³¹ Dara, benedya nak lebnyok ara, wei Kornelius o, Imik Neyung adya anja molonaʾ ara kebgelekanya, wera anja yok nang ak eleklelam ara perob senewoka beklenggel.

³² Anasa wera, nimi si Simon Petrus alamaknya benyek, Yope heikek ulumla anyek, e yalom aboka nimek orugeisilom. Alda senenggom mek gwan gek sam yok-yok golunaʾ akleng wililanya nimi si Simon bedya ek sam malamla.

³³ Wenyaboka oruganyok anasa, wera neyung anak e yagenok aboka nim orugesisa. Wera anda ganya perobnya bek adya wera seleb nak yalam. Anasa wera, nunda nidyaʾ anyagan nadya ek longomab ara Imik Neyung saramek uboka neyung Wenelesilnya adya nuk lebsilom aboka orugagelyaʾ anyek, nuk lebsimen enyek kebnob aboka longomab,” hyok.

Petrus Bedya Kornelius Bedyaʾ Ek Ab Lebok Yuba

³⁴ Wera Petrus bedya leb einiwokja, ”Nara wenyok Imik Neyung adya nimi nidyaʾ mok soko nang era neik nang nenelesil ara wenyok ella dan.

³⁵ Nimi ben hnon Imik Neyung ak lok uboka, alja unulamla nidyaʾ ara perob ok unulanya bera, Imik Neyung ara bera mok enyeganyebnya aboka webnaʾ loboka perobaʾ leboka doro dililamla,” hyok.

³⁶ ”Hem yab o, Israeli nim ek Imik Neyung adya lesuk yub era ugunda seleb ella ululum. Ban lesuk yub era, Yesus Kristus adya ganya hekdangoka un yub ek lebsuk. Ban Yesus ara nimi nidyaʾ siksamba Wenelesilnya ulusil.

³⁷ Ugunda Yudea sokok sam yokaʾ-yokaʾ nidyaʾ unulumok ara, ella ululum. Anam Galilea sokok ab ara einiwoka, Yohanes Pembaptis bedya meka dab einimok wekaʾ moruwoka unulumokaʾ ak lebna.

³⁸ Imik Neyung adya Nazaret mok ebnya Yesus ak sekiyiwoka alak Geisinya ab, migib ununaʾ ab, alak elegemok ara ugunda seleb ella ululum. Dara onoʾ, onya Yesus bera Imik Neyung migib alak gologomokaʾ adya, alda yokok sam yokok sam perob ok unuro yabalamok. Dara, al neiknya bera nimi nidyaʾ bisaʾ gologesin nang merellilisuk ara, ugunda seleb ella ululum,” hyok.

³⁹ ”Dara, nun nang enyek, Yesus adya Yahudi nang mok ab, Yerusalem heikek ab ara, yokaʾ-yokaʾ nidyaʾ unulumok anyek, men youboka okoka eiyimouba nang era nunda an. Dara, sikda alak galak glaboka omek bok,

⁴⁰ winilinya sum maboka gwelegok dara, Imik Neyung adya embengaʾ suboka bukiyiwoka, nimek ek bo kemero amoro yibilisuk.

⁴¹ Ban unumok ara, salyaʾ nimi gong ek amoro yibinggusuk bok, alda nuk Imik Neyung adya ban unuwan anyek lero yibinok senewoka weboka dosuk nim ek, nuk amasuk. Yesus ara seleb somoknaʾ ak ab, Imik Neyung adya embengaʾ suboka bukiyimok dara, nublaboka neikaʾ mek ab, gwaneng ab neikaʾ juba nang ak amasuk.

⁴² Yesus anyek, Imik Neyung adya aldib nimi nidyaʾ embengaʾ ulumak nim eb, seleb somogomek nim eb, yana lelesinaʾ anya sekiyiwok aboka, nimi yok nim ek perob lero yanggan yuba lero yabalemnelum aboka nuk orugosuk.

⁴³ Men ununumnaʾ lelemek nang eneba alsamba yuba geklewoka lelemek. Dara, sik lelemek yub era, ban wenyaboka lelemek ara, nimi nidyaʾ Yesus si ak dib senewanamak dara, Yesus migib adya sikja malya unaʾ memelemnesil, hyek,” hyok.

Yahudi Nang Gom Bok Geisinya Dib Domek Yuba

⁴⁴ Dara wera, Petrus bera anam yuba wenyaro lelemok salek enyek, longowoka kelemek nang era sikda nidyaʾ Imik Neyung Geisinya adya yingginiboka deknesuk.

⁴⁵ Wera danyek, Yahudi nimi yokaʾ bok, Yesus ak dib senewoka domek nim, Petrus beblaboka neikaʾ yeilimek nim era, Imik Neyung adya alja Geisinya ara Yahudi nimi gom bok sikenek anaba elegesuk adya sikda hyak ganya loka dasuk.

⁴⁶ Kornelius bedya ek longomek nim era sikba elgom yuba saboka, Imik Neyung ak alja unulamla ara perob aboka giboka lelemek anyek kemek anasa, loka dasuk. Dara, Petrus bedya lemokja,

⁴⁷ ”Wera ugunda kendululum! Nuk men youmaʾ Imik Neyung adya Geisinya domoba sok, sikbabya dobakaʾ kendululum. Anasa wera, sikenek meka dabnesibya dara, yok nim edya, mem loblulum heneseng de?” hyok.

⁴⁸ Dara, Petrus bedya sikenek wenyaboka, Yesus Kristus si sibuka meka dabnesak aboka orugousuk. Ban seleb unubgogosik dara, meka dasik nim edya Petrus bek nublaboka anyagan li wen mabibyakanya binilam aboka molomek.