PILIPI 4 - PERJANJIAN BARU NALCA YUBA

Sidyaʾ Wenebgogowosuk Yuba

¹ Nadya wanaʾ ulusin hemyabo nim o, wera anasa ugunda Wenelesilnya bek hyak dib senewoka ganya ologoka ubmoublulum. Nara ugunuk hyak eibsisinya senen ulusin. Ugun nong anyek, nadya ganya hekoka nadyaʾ deknaʾ dibaʾ nim ululum.

² Ugun penya gelewa Euodia, Sintike o! Ugun penya yuba dolomak nimi geknebaʾ neik ganya boboka pe ulurumaʾ aboka moloweisin.

³ Nadya hem be an bojam ululamnya bek, ban penya lebna gelewa danyek pe aralesilomaʾ aboka molowagen. Klemens beb nimi yok nanga nab neikaʾ nadya welemna wa yeiriwoka welemouba, onoʾ sik penya gelewa dara, Imik Neyung adyaʾ perob lero yanggan yuba neikaʾ lero yabalemouba gelewa ek anara ulurak. Sikja si nidyaʾ ara Imik Neyung adyaʾ nim embengaʾ un bukuk sam ulusil. Anasa, aralesilom.

⁴ Ugunda Wenelesilnya beb seleb neikaʾ kwebdangoka ululumaʾ anasa leboka, ei-ei ganya sobaʾ bololulum. Onoʾ saawoka hnon wenyhenesin: Ugunda ei-ei ganya bololulum e.

⁵ Wenelesilnya bera mek anam yanalabok anasa, ugun nong anyek perob ganya boboka namenaʾ ulumunaʾ ara, nimi yok nang edya eillilesinokaʾ aboka lebsin.

⁶ Ugunda yokaʾ-yokaʾ hekaʾ huwanamab do senewoka ganya daldom-daldom anggom, mem. Yokaʾ-yokaʾ dobnob senewanalum dara, anyek Imik Neyung ak elegeisilom aboka sobaʾ mololelulum. Ugunja nunda anyek dobsibya senelelumaʾ anyek si sibuka, Imik Neyung ak perob aboka giblemunukanya, mololelulum.

⁷ Ban unulumun dara, Imik Neyung alja nim adya mekaʾ ella unggulumak unaʾ adya, Kristus Yesus pik uboka, ugunja ganya seininaʾ nidyaʾ diri bo ulumnesil.

⁸ Wera, nadyaʾ hemyabo nim o, ugunja ganya ek ara, nim unaʾ perob dangalalanya nenyek, pelemak aboka gigiwanasijenya nenyek, nera pe unaʾ ab, gibildanaʾ ganya ab, perob ok ununaʾ ab, geisa ululanya neb, pelelanya neb, perobnya nedyok ugunja ganya ek deknewoka ulusulul.

⁹ Ugunda nak ab einiwoka dolum perob unaʾ enyek unulululum; nera nadya ununaʾ eiyilum gom, nadya yuba sanaʾ enyek unulululum. Dara, Imik Neyung perob eleknaʾ damoknya bera ugunuk ulumnesil.

Aramekaʾ Amba Perob Aboka Gibsuk Yuba

¹⁰ Ugunda nauba mandewoka ululumaʾ ara, onoʾ wenyek ugunja nasamba uka yok seiniwoka aralenulumaʾ anasa, nara Wenelesilnya bek bekoka giboka hyak eiya dablenel. Ban wenyhenya nera, ugunja nak dib hibigonulumaʾ ak lebnenggubna, alda nak ara seinin dara seinilenulum bok, unu seinilenulumaʾ anyek aranenaʾ ak anyeb laga dangan danyek men okna anasa ununaʾ orok ak lebna.

¹¹ Nadya unaʾ era hekaʾ ak nak ulumla dara, seleb senelenanya bek anasa, nera nak okna ulunelaʾ amba arawaneseng senewoka lebnenggubna.

¹² Nara yokaʾ-yokaʾ garana bulumak gom, onoʾ nauba bok loboka deregoka ulumakaʾ ara penya-penya naba seleb unura yibisa. Nara yokaʾ-yokaʾ perobaʾ ak ulumak, malyaʾ ak ulumakaʾ ara, nara seleb eiru yibisa. Dara, nera denaʾ nauba yakaʾ ulumak gom, bonaʾ garanaʾ ak ulumak gom, nidyaʾ gigilamlaʾ ak ulumak gom, bonaʾ yak gomaʾ ak ulumak gom ara, nara nidyaʾ sunuwoka pe ulumna senen ganya bobnunaʾ aboka ella dangamsa.

¹³ Alda nak migib eleklenel Kristus aralenelaʾ adya, yok-yok igina kwelenel bok pe ulumnesinya ok senen ganya bolomna.

¹⁴ Bok ugunja danyek, nak garana bulumnaʾ ak eiyiwoka aralenulumaʾ anasa, wera ugunja nak unu aralenulumnya nera hyak nauba pelenulum.

¹⁵ Nadya hemyabo Pilipi nim o! Nara men perob lero yanggan yuba lero yabalamsa sum enyek, Makedonia sokok abaʾ ara lo yabasa dara, yok yuba donaʾ nim arawanggunyek, ugumbeyok aranulumaʾ ara ugumba seleb ella ululum; anasa ugun nong anyek, perobaʾ malyaʾ ara nab neikaʾ debyaawouba.

¹⁶ Wera onoʾ nara Tesalonika heikek ulumsakanya, unuruwaʾ garan ubnelaʾ anasa hekaʾ hubsinya do senewoka buksa salek, ugunja men youboka yokaʾ-yokaʾ li gong beibnulum.

¹⁷ Wera nera nak dara, ugunja beibnulumaʾ anyek ganya dibyooka donaʾ ok dob lobnun senen ganya bonggulumna. Alda nadya dara, nim Imik Neyung yuba doboka ulumak nong unaʾ enyek ugunuk sam nauba dosulul senelamna.

¹⁸ Wera ugunja beibnulumaʾ ara, nak okna ubnyoknya nera nidyaʾ gigiwoka seleb dobsa, hyak nauba so sounuwoka dobsa! Ugunja yok-yok bonaʾ nak arawonulumaʾ Epafroditus be bo yanyokaʾ ara nidyaʾ seleb dobsa. Anadya wera men dara, anyek dobsinya senewoka seinisenya nera nidyaʾ gigiwoka dobsaʾ ulunel. Ugunja nasamba arawoka beibnulumaʾ nidyaʾ ara, Imik Neyung ak perob songa lelemlaʾ giboka beil balamak enyek, Imik Neyung adya perob senewoka dolomla bonaʾ enesoʾ ak beibnulum.

¹⁹ Yesus Kristus lomok ulumlaʾ si imik nenenaʾ ab, dub unaʾ ab dadya, ugunja dobsibya senelelumaʾ nidyaʾ ara, nadya Imik Neyung edya eleganesil.

²⁰ Nunjaʾ neyung Imik Neyung ara hyak sobaʾ gibelsinilenob! Amin.

Sidyaʾ Gibsuk Yuba

²¹ Nadyaʾ ban gibsinaʾ anyek, munaʾ Imik Neyung mabo nidyaʾ ak, Yesus Kristus ab neikaʾ kwebdangoka ulumak nim ek neyung bera unu gibisil aboka nekdo yibinelum. Hnon ugun kabo nimi nab neikaʾ ulumab nim edya ugunuk gibsakaʾ anasa sikjaʾ gibnaʾ keboka dobnelum.

²² Munaʾ Imik Neyung mabo nidyaʾ heik enyek an ulumak nim edya, nauba so dib nong ara, Kaisar dubnya bedyaʾ ek welemak nim edya ugunuk perob aboka giboka lebsak.

²³ Nunja Wenelesilnya Yesus Kristus adya ugunda nidyaʾ ganya ak wanaʾ uboka eleksinaʾ elegoka ulusulul. Paulus Timotius adya nunja gibsinem.