PILIPI 2 - PERJANJIAN BARU NALCA YUBA

Kristus Bobok Ganya Bololulum Hyok Yuba

¹ Ugunda Kristus ab neikaʾ kwebdangoka ululumaʾ adya, migibaʾ eleklesil de? Kristus adya ugunuk wanaʾ ulusilaʾ adya ganya hekel eleklesil de? Ugunda Imik Neyung Geisinya ablaboka ganya kwebdangoka ulumabaʾ ella ululum de? Angoo yadyek ganya ugunuk ara nauba ulusil de?

² Mab e, anasa ban nenyek ugunuk ulusilya dara, wera nadya ganya migiba geblemnenulumaʾ ara, neik wanaʾ ubdangoka, neik ganya boboka, neiknya nek unuwanamab senen ganya boboka ulululum.

³ Ugunda yokaʾ-yokaʾ unuwanamunaʾ ara, nunokok perob dosulul senewanamunya nek gom, dengdang ganya bobnemunya nenyek unuwanamab senenaʾ ara hyak mem. Alda saawoka, ugunda nidyaʾ yok-yok ganya sokok nenebdangoka ulumunukanya, nak dara or malye bok, yok nim ek danyek, perob nang era, an senen ganya bobdangoka ulululum.

⁴ Nanokok pewonulul seneldanaʾ loboka, alda yok nim enyek pewosulul senen ganya boboka ulululum.

⁵ Ugunda Yesus Kristus adya bobok ganya enyek boboka ulumnulumaʾ ara,

⁶ Kristus ara al ulumokaʾ ak dara, Imik Neyung dibaʾ ulumok bok, Imik Neyung ulumnaʾ anara sobaʾ ulunun ganya ok bobnenggumok.

⁷ Bok alda, ban nidyaʾ ara gwirib lobokokanya, onoʾ nimi sirikaʾ anaso salyaʾ dem nanga dangamok. Kristus ara nimi dokokanya, onoʾ nimi sirikaʾ anaso ulumok.

⁸ Alda ganya sokok nenebdangoka ulumokaʾ moruwoka, Imik Neyung senemoknya nok unuwoka somogok. Somogokaʾ ara, gal dubuk somogok.

⁹ Wera ban nenesa leboka, Imik Neyung adya dara, alak hyak im nong ok nenewok, anya alak ara yok-yok migib unaʾ era mek so bok, alak danyek hnonok hyak senenggom migib damok era elegok. Yok si nera mek so bok, alja si nenyek hyak imik nenewok.

¹⁰ Ban amba leboka Yesus si ak giblemnemabaʾ ara, imik heikek sam embengaʾ ulumlaʾ ab, sokok sam ulumlaʾ ab, soko lomok sam ulumlaʾ ab, nidyaʾ alak koma lumugoka giblimnemak.

¹¹ Sikda nidyaʾ adya dara lebnemakja, ”Yesus Kristus anyek hnonok Wenelesilnya dibaʾ ulumla,” aboka laga lebnemak, dara wera anadya, neyung Imik Neyung ara alja si imik nenewanamak.

Sokok An Yeblamla Dilinaʾ Eneso Ulululum Yuba

¹² Nadya hyak wanaʾ nong ulusin hemyabo nim o, anasa wera, nara ugun gangganek ulumsa salek enyek, ugunja nadya yuba pe keboka unulum sok, hyak nauba so ara wen mok bokdangoka ulumabaʾ wenyek unulumnunulum. Imik Neyung adya ugun nong ara seleb blebsukaʾ anasa, ugunja pe ululumnya nera nauba perob danggiga balasulul senen ganya boboka dulululum. Imik Neyung ak lok ganya boboka ban nen unulululum.

¹³ Nenesa leboka Imik Neyung adya, alja ganya ek hekel eleklenenokaʾ aboka ugunja ganya lomok sam weboka, unuweisinya ganya hnon, unuwanokaʾ aboka migiba hnon eleklesil.

¹⁴ Ugunda yok-yok wa welemun dara, wabdangoka oldanaʾ loboka welelulum.

^15-16 Ugunda ban nenyek unulumnelum dara, ugun nonga gegena mekaʾ ponaʾ orok uboka, perob ganya boboka, jong ganya ok deknewoka, yu hwam nim eb, malya ulumak nim ek, perob Imik Neyung mab ulumnelum. Ugunda sikenek embengaʾ eleklesil yuba leb eleganemun dara, ugun siksamba sokok an dilinaʾ yebel eleklamla wesaʾ eneso dangoka ulumnulum. Ugunda anasonya nenyek sunuwoka ulumun dara, Yesus Kristus yanamla sum era, nadya ganya eiya dabnenelaʾ gak ara an. Wera ban adya nadya duboka welemna wa nera salyaʾ lelem danganenaʾ loboka, doka yak dal senewanamna.

¹⁷ Nak dara, oboka dibnenyak dara, nadya eneng era ugunja Imik Neyung ak dib senelumaʾ adya, alak giboka perob eleknaʾ elegolumaʾ ak maknamna dara, nenesemba leboka Imik Neyung ak perob aboka giblamnakanya, nab ugunub perob senewanamab.

¹⁸ Anasonya neikek onoʾ ugumbabya perob senewanalumukanya, ugunub nab perob senewanamab.

Timotius Beb Epafroditus Beb Yuba

¹⁹ Ugunuk pe ulumak an yub kebnyekanya, nadya ganya eiya dabnululaʾ aboka, Wenelesilnya Yesus aralenelaʾ adya, Timotius bera ugunuk an mek anam bokol yanesin.

²⁰ Al Timotius bek hnonok alak ok nadya ganya seininaʾ eneso uboka, ugunuk perob senewanameijaʾ anyek aboka seinilesilnya bera an.

²¹ Nimi yok nimi nidyaʾ ara, Yesus Kristus amba dara seininaʾ loboka, alda nunokok pewanasilinya nenyek senewoka seiniro balamak.

²² Timotius bera ugun gangganek wa pe welesukaʾ ara seleb eillilelum. Alda nablaboka neikaʾ Imik Neyung adyaʾ perob lero yanggan yub era yeiriwoka lero yabalenamnya. Nab alab dara, nimi neyung eb alaʾ me neikaʾ kwebdangoka ulumak sok ulunam.

²³ Ban nenesa leboka, nak henga goubnyekaʾ ara eimik hekaʾ dananelaʾ ara okoka ella ubnya dara, alda nadya ugunsamba bokol yanasin.

²⁴ Imik Neyung aralesilaʾ lomok uboka ella ulumnaʾ ara, naba men seʾ kemel yanasin senewoka ella ulunadyok lebna.

²⁵ Nunja hem be Epafroditus bera nak anyagan aralenululaʾ aboka bokol yeililumnya bera, nadya saawoka ugunuk bokol yanamna senelamna. Albabya nadya welemna wa nek neikaʾ arawoka, duboka yeiriwoka welenel.

²⁶ Alda ugunuk nidyaʾ berra eibsisinya ganya nauba bolomla, onoʾ alda hnon neiknaʾ salawok an yuba kelumaʾ anasa, igin ubsilyek aboka lok ganya bolomla.

²⁷ Nera aldib alda neiknaʾ nauba salamookanya somok lobok. Bok Imik Neyung adya alak angoo yadyek senewoka arawok, nera or alak ok gom, alda nak anaba nauba solom ganya boboka engewalyek aboka neikaʾ angoo yadyek senewoka arawanyok.

²⁸ Ban nenesa leboka, ugunda alab eibdomun dara, ugunja ganya heksilyekanya, nadya ganya eneba heiboka ubnunaʾ aboka, nadya dara nauba alda ugunuk sam bilom aboka oruganamna senewoka nauba seinilamna.

²⁹ Anasa, ugunja dara, alak neik Imik Neyung mabo dangalamak nimi geknebaʾ uboka yanggeija dara, perobaʾ leboka doro dibsululum. Onoʾ hnonda anaso ganya bolomak nimi nidyaʾ ak wanaʾ ulululum.

³⁰ Kristus wa nauba dangoka perob dolululaʾ aboka, alda hyakaʾ somok lobok bok, ugunsamba harok alda nauba yeiriwoka ganya nong gekman nadya welemna wak sam neikaʾ welenam.