PILEMON 1 - PERJANJIAN BARU NALCA YUBA

Gibuk Yuba

¹ Nunjaʾ hem Pilemon o, nunjaʾ hem be uboka, neik wa welemabnya ululam! Nara Paulus, Yesus Kristus amba leboka henga goubnyeknya bedya, nunjaʾ hem be Timotius beb neikaʾ uboka, ban momnya donaʾ enera anak beibgenem,

² hnonda anjaʾ ek sam yuba donaʾ nim longolomak nim ek hnon, nun hmal gel Apfia gek hnon, nub neik wa welemabnya Arkhipus bek hnon momnya donaʾ enera beibsinem.

³ Nunja ganya edya ugunuk ara, nunjaʾ Neyung Imik Neyung ab, Wenelesilnya Yesus Kristus ab dadya, wanaʾ uboka eleksinaʾ ab, nimi pe unaʾ ab dara ugunuk eleklesulul senelesab.

Pilemon Bedya Yuba Dib Senenaʾ Ab Wanaʾ Unaʾ Ab Yuba

⁴ Nara sobaʾ molol yaben dara, anja si sibuka Imik Neyung ak perob aboka molowoka giblamna.

⁵ Nera an nong anyek, Wenelesilnya Yesus ak dib senewoka ganya ologoka ulumlakanya, onoʾ nimi yok munaʾ Imik Neyung mab ak wanaʾ ulusil an yuba kelemnaʾ anasa perob aboka ansamba nauba mololenggen.

⁶ Nadya heng uboka mololenanya nera, nunda seleb Kristus ab neikaʾ kwebdangamoubnya nenyek, nunda yuba dib dolomab nimi geknebaʾ uboka, yuba doboka Kristus lomok ulumabaʾ adya ulusilaʾ anyek pe ella ublulumaʾ aboka mololosin.

⁷ Hem Pilemon o, anja nidyaʾ yok Imik Neyung mab ek wanaʾ ulusilimaʾ adya, wera nadya ganya heklenelekanya, naba anaso unuweisinya ganya nauba bolomna! Munaʾ Imik Neyung mabo nidyaʾ anja nong unaʾ enesa leboka, hyak nidyaʾ anak ara, ei-ei ganya bolonjak.

Onesimus Bemba Molowok Yuba

⁸ Anasa wera nenesa leboka, nunda Kristus bek dib senelemab nang ek anasa, nadya ban nenyek or unuwalom aboka oruganenggisinya bok,

⁹ nunda wanaʾ uldalanamnya nenesa, unuwanalam aboka molowagenaʾ ok. Nara seleb yamen danakanya, wera Yesus Kristus amba leboka gasa ek seleb henga geregoka beinyek.

¹⁰ Nara Paulus bera, henga goubnaʾ ek ulumsa salek era, Onesimus bera nadya me Imik Neyung me dangamoknya bemba, alak perobaʾ lebnelam aboka hnonok molowagen.

¹¹ Onesimus bera youmaʾ ansamba dara dolbalek senen bok, wenyek dara perobnya bek ulunggel, nera or ansamba ok gom, alda nasamba hnon perobnya bek ulusil.

¹² Nadya ban hyak wanaʾ ulunanya bera, wera anak sam saawoka bokol yagen.

¹³ Imik Neyung adyaʾ perob lero yanggan yuba lero yabanaʾ anasa, henga gouboka gasa ek beibnyekaʾ ak an neikaʾ nab ulunimekanya, an lunuwoka na aralenululaʾ aboka banaʾ loblom hununaʾ ubnadyok, wera or bokol yan.

¹⁴ Bok anja nak or unuwanalam anaʾ orok bok dara, ununanya nenegom aboka, lobna. Nadya anak unuwanalam aboka dukaʾ len danagom, alda anja ok ganya doboka unuwanasom enyek perob senewoka lobna.

¹⁵ Onesimus bera anak seʾ loboka yibijoknya nera, onoʾ eimik era anadya anja alak sobaʾ amba doro dilililomaʾ aboka ubnenggubuk de?

¹⁶ Wenyek dara alda ek wa wenya dangoka unaʾ ok unggululabok, alda perob wa wenya be hnon ulumla. Alda wera hnonda Imik Neyung yuba dolomabaʾ wanaʾ ulumabnya bek hnon ulumla. Alda wenera nak dara, nadya wanaʾ hemnya ulunelekanya, dara onoʾ anak dara nauba so wanaʾ ulunggel! Anasa alda wera nunjaʾ oruknaʾ wa wen danaba perobaʾ ak ulumlakanya, onoʾ hyak nauba ara Wenelesilnya bedya wa wenaʾ anaba hyak perobnya bek ulumla!

¹⁷ Anasa wera nenesa leboka, nunda neik yuba don nang ulumabaʾ anasa, anja nak perobaʾ leboka dolonelem sok, onoʾ Onesimus beneba neik so perobaʾ leboka dobnelamaʾ anasa lebna.

¹⁸ Alja anak malya unggelya goma, bonaʾ bob longgelya gom ara, nadya anak nidyaʾ ara lunuwanenggen.

¹⁹ Wei, anasa ban nenera nadya soruk yokaʾ adya momnya dobna, Nara Paulus, nidyaʾ ara amba lunuwoka deknenggen. (Ambabya nadya dara, yuba doboka ulumak nong unaʾ era gogobaʾ bob lobnulum aboka laga neknenggununggen).

²⁰ Anasa wera, Wenelesilnya benesa leboka, hem o anda nak arawananelem senelamna. Anya Kristus lomok neik wanaʾ uldalamab nim ulumabnya nenesa, nak an ganya sangab eleganenelem.

²¹ Ban momnya donaʾ en anak beibgenaʾ ara, nadya unuwanalam aboka molowagenya nera, al or unuwanamlaʾ ara ella ulumnakanya momnya doboka beibgen. Orokaʾ anaba wenyanaʾ oroknya neneba nauba unub lolowanamlaʾ anyaʾ aboka ubna.

²² Hnon ugunja nasamba mololenulumaʾ anyek, Imik Neyung adya keboka unuwanamlaʾ seleb ella ulumnaʾ anasa, na nong anyek doboka ugunuk sam bo yanelya sum era, anjaʾ ek sam mabnamnaʾ anasa, ekla hnon nasamba orowek meeb lonelomaʾ aboka molowagen.

Sidyaʾ Gibsuk Yuba

²³ Yesus Kristus amba leboka, neikaʾ henga goubuka beibsikaʾ ak anyagan ulunamnya Epafras bedya ugunuk perob aboka gibsil.

²⁴ Hnonda nadyaʾ hemyabo ban nang danadya, Markus beb, Aristarkus beb, Demas beb Lukas beb dadya ugunuk perob aboka gibsak.

²⁵ Anya Wenelesilnya Yesus Kristus adya ugunuk ganya ak wanaʾ uboka eleksinaʾ ulusulul. Nara Paulus bedya gibsin.