MATIUS 28 - PERJANJIAN BARU NALCA YUBA

Yesus Embengaʾ Suboka Bukok Yuba

¹ Wera sikja Sabat mem sum era dengaboka, minggu en men sum lugunaʾ nong dara, Maria Magdalena geb yok Maria geb dara, Yesus dilinaʾ ak sam kemel birik.

² Dara al wene sab-sab enyek, senenggom sogoumaʾ dorogok. Wera Wenelesilnya bedya lero ben hnon imik heikek abaʾ ara yingginiboka pika seregemek girik era demegoka, alda girik dub eilib enyek an bukumok.

³ Dara, lero enedya hogung senedyaʾ ara ebnaʾ anaso uboka, alja ongomok akleng era im duk-dukaʾ geisa anaso ak ublomok.

⁴ Dara anyagan Yesus beʾ dakijek aboka diri welemek nang era lok anasa, ber-beranaʾ beiyiboka, anya sik nong ara somogamna nong eneso ubsuk.

⁵ Dara lero enedya gelewa danyek an, ”Ugunda lok ganya bonaʾ ara mem! Ugunda Yesus gal ak oboka glarobnya benyek elelumaʾ ara nara ella usin.

⁶ Alda ugunuk youmaʾ wenyasuk sok seleb embengaʾ suboka bukumlakanya, anyagan unggulumla. Wera al diyimong oulyang era, an ekla dema mamlaʾ anyek kendululum.

⁷ Ugunda wenera alja yuba doro diriga ban nang ek berra wenyal binirum, Alda seleb embengaʾ suboka buklekanya, alak men Galilea moka bilimnamla. Anasa ono sam ab alda eibnelum! Wera, seleb lebsin,” hyok.

⁸ Dara gelewa era, nimi dilinaʾ ak ara men berra lo birik. Anya lok gar-gadyaʾ uboka, eiyasa nang penya, Yesus alja yuba doro diriga ban nanga ulumekaʾ ak nekdo birik.

⁹ Anam balarek sab-sab, Yesus ara gelewa enyek an yeiniboka, ”Ugunuk perob aboka gibsin!” hyok. Danyek gelewa dara, Yesus berem yeiniboka, alja yan ak salawoka oumuwoka gibek.

¹⁰ Wenyek Yesus ara sikenek, ”Ugunda lok ganya bonaʾ mem. Sikda nak eibnenyakaʾ anasa, na kabo nang era Galilea sokok binokaʾ aboka, wenyal bulululum,” hyok.

Yin Bonaʾ Nang Edya Nekek Yuba

¹¹ Dara gelewa era, nimi dilinaʾ ak abaʾ ara, onoʾ anam balarek salek, yin bonaʾ nanga welemek nang era, Imik Neyung yuba wa gakaʾ dub nang ek, an nidyaʾ unuwoknya nera unuwal aboka nekdo yek.

¹² Wenyek Imik Neyung yuba wa gak nang eb, Yahudi soko dub nang eb neikaʾ yuba saboka, yina bonaʾ nang ek nauba rupiah elegesiikanya,

¹³ lebekja, ”Yesus alja yuba doro diriga ban nang edya nunda salyaʾ lobaʾ hogunga mabmab salek enyek, beʾ dakoka hokaʾ domak, henelum.

¹⁴ Dara, mok soko dubnya bera unuwak an yuba keblya dara, ugunuk yokaʾ ubsilyek aboka, nunja alak ara or-or uboka yuba seknesab,” hyek.

¹⁵ Dara yin bonaʾ nang era rupiah en doboka, sikenek anaso unuwanalum amek sok unuwek. Dara ban yub era, Yahudi sokok an sum enyek ab moruwoka weneba or anam nekdo yabalamak.

Alja Yuba Donaʾ Nang Eb Eibdangoka Neksuk Yuba

¹⁶ Dara, Yesus adyaʾ goklombadya yuba doro diriga ban nang era, Yesus adya sikenek Galilea mok soko meinik bilimnelum amok sok byik.

¹⁷ Dara anyagonob sikda eibdangoka, alak oumuwoka gibek. Bok sik gangganek ara nimi hnon anam elgom uboka ganya eb menegesuk.

Yuba Yok Mok Soko Nang Ek Neklemnelum Hyok Yuba

¹⁸ Dara Yesus ara sik berem yeiniboka, ”Nidyaʾ imik heikek ulumla migib eb, sokok sam ulumla migib era, nak Neyung bedya seleb eleganyok.

¹⁹ Anasa wera, ugunda nidyaʾ sokok biniboka, nidyaʾ yok-yok mok soko nim era, nadya yuba doboka diriga ban nanga dangiyiwanalum. Anya Neyung bek si sibuka, alja me nek si sibuka, Geisinya bek si sibuka, sikda meka dalamnalum.

²⁰ Dara, nadya ugunuk wenyaboka neksisa yuba nidyaʾ ara, sikbabya boboka unulunokaʾ aboka neklemnelum. Anya, nara ugunuk sobaʾ arawoka ulusinyaʾ moruwoka, soko sidyaʾ daknamla ak dangal binimla,” wenyaboka nekgogowousuk.