MATIUS 26 - PERJANJIAN BARU NALCA YUBA

Yesus Obnemab An Yuba

¹ Wera Yesus ara wenyaboka nidyaʾ nekgogowousuk dara, onoʾ alja yuba doro diriga ban nang ek,

² ”Li penya sum ublya dara, welenaʾ orok roti gwanenga den sum danamlaʾ ara, ella ululum. Anya nimi dibaʾ me nera oboka gal ak glabnokaʾ aboka doboka eleganemak!” hyok.

³ Dara neik salek era, Yahudi Imik Neyung yuba wa gakaʾ dub nang eb, Yahudi dub nang eb dara, Imik Neyung yuba wa gaknya dubnya, Kayafas be ulumokaʾ ak, dub nang un ek longomek.

⁴ Sikda longomeknya nera Yesus anyek geleleng henga gouboka obnemab an yub emba longomek.

⁵ Bok sikda, ”Welenaʾ orok roti gwanenga den sum enyek, henga gouboka obnemab dara, yok salyaʾ nimi nauba ulumakaʾ ara, doulub menegeibyek anasa, sum era unuwanggunumab,” wenyaboka sabek.

Perob Song Meka Betania Heikek Ab Ngikok Yuba

⁶ Yesus ara, gororomaʾ delemoknya, Simon bedyaʾ ek sam, Betania heikek ulumok salek,

⁷ gela hnon Yesus ak yok. Gel gera perob song ngiknaʾ meka senenggom rupiah lanalamok mek enyek, mek hmeiya hnonok bo yok. Wera Yesus ara anam bukoka delemok salek, gel gera mek en pika bak salawoka Yesus adyaʾ hukuk sam yek goluwok.

⁸ Wenyek Yesus adya yuba doro diriga ban nang era, unuwokaʾ anyek eiyiboka, hogunga gorogoka lebekaʾ ara, ”Ban nidyaʾ ara hek damok enesa salyaʾ lelem heboka boloklamla do?

⁹ Ban perob song ngiknaʾ mek enera senenggom rupiah doboka, bonaʾ garan nim ek eleganeseng bok, salyaʾ heboka yeklamla!” senewoka wenyabdek.

¹⁰ Bok Yesus ara, ban sikja wen senewek ganya era ella ubsuukanya, ”Ugunda hekasa ban gel genyek an lobaʾ nenelelum do? Gel genera nasamba perobaʾ anyek, nadya unuwaneseng senelenanya nenyek ubnel.

¹¹ Nimi bonaʾ garan nim era ugun gangganek ara sobaʾ ulumnamak bok, nak dara, ugunub sobaʾ neikaʾ goʾ ulwenenggulumnemab.

¹² Ban perob song ngiknaʾ mek, nadyaʾ nong ak pika bakoka yeknelaʾ anera, wera na soko loknenyaknya nenesa kabnululaʾ aboka ubnel.

¹³ Nara ugunuk dib lebsin, Yok-yok mok soko me nidyaʾ, nim Imik Neyung adyaʾ perob lero yanggan yuba leb elekdo yabalamnemak dara, ban gel genedya nak perob song meka ngiknelaʾ ara, alak seiniwoka, anyaganyeb unumok aboka nekdo yabalemnemak,” hyok.

Yudas Bera Yesus Amba Yuba Dibnamna Aboka Meemok Yuba

¹⁴ Dara onoʾ Yesus adyaʾ obadyaʾ alja yuba doro diriga ban nanga, ben hnon alja si Yudas Iskariot bera, Yahudi nim edyaʾ Imik Neyung yuba wa gakaʾ dub nang ek byuk.

¹⁵ Wera Yudas bera, nang enyek an, ”Yesus anyek, nadya ugunuk doboka eleganesin dara, ugunja nak ara, hekaʾ ak eleganenulum do?” wenyaboka heibok. Wenyek dub nang era, rupiah einiwoka perak rupiah denga hnonok, Yudas bek elegek.

¹⁶ Dara ban sum enyek moruwoka, Yudas bera hek sum ek Yesus ara or obnemak aboka yuba dil binimna senewoka pik elemok.

Yesus Ara Alja Yuba Donaʾ Nang Eblaboka Jek Yuba

¹⁷ Dara, welenaʾ orok roti gwanenga den sum yenewok. Dara, men sum era, Yesus alja yuba doro diriga ban nang era Yesus ak yek. Yeiniboka, ”Neyung o, anja dara, ansamba denaʾ youboka beibnenjabaʾ ak ara, hanyagarak perob senelam do?” aboka heibek.

¹⁸ Wenyek Yesus adya, ”Ugunda nauba heikek biniboka, nimi ben hnon eibmunya bek an, Nunjaʾ neksinya bedya leladya, yokaʾ dananel salek era oka dal. Anasa nara anja ek sam nasamba denaʾ youboka yuba doro diriga ban nang eb neikaʾ denemab, wenyamla, henelum,” aboka orugosuk.

¹⁹ Dara Yesus alja yuba doro diriga ban nang era, alja sikenek orugosuk sok, unuwek. Anya sikda perob sum amba denemab aboka denaʾ youbek.

²⁰ Wera seleb iniwok dara, Yesus ab aljaʾ obadya yuba doro diriga ban nang eb neikaʾ bukoka delemeekanya,

²¹ anam delemek salek, Yesus adya, ”Nimi ben hnon ugun gangganek ab, nak or oblulum aboka yuba dil bininel,” hyok.

²² Dara, sikda wenyan yub en kebek dara, hyak solom nong uboka engenaʾ ganya beibsuk. Anya sikda, be hnonok-hnonok Yesus ak, ”Neyung, anja wenyhelemnya nera nakaʾ gomaʾ senewan,” aro balamek.

²³ Anasa Yesus adya sikenek, ”Nablaboka neikaʾ roti gwanenga meka hwiboka denenamnya bedya or oblulum aboka yuba dil bininel.

²⁴ Nimi dibaʾ me nera Imik Neyung yuba bukuk sam momnya dobok sok sunuwoka somoganamla. Bok or obnelum aboka yuba dil binilanya ben nong anyek, hyak omom nongaʾ ak ubla! Ben nong ak dara, sokok an ara gobdo hyak beilinaʾ loseng dara, pemneseng bok!” hyok.

²⁵ Dara yuba dil binimokaʾ nongnya Yudas bedya, ”Neyung neklesilimnya o, anja wenyhelemnya nera nakaʾ gomaʾ senewan,” hyok. Wenyek Yesus adya, ”Anda alan seleb leblam an,” hyok.

Beknaʾ Meka Den Yuba

²⁶ Wera an delemek salek, Yesus ara gwanenga doboka Imik Neyung ak perob aboka gibok. Seleb dara, gwanenga soboka alja yuba doro diriga ban nang ek elegesuukanya lebokja, ”Nadya nong era ban, or doboka denelum,” hyok.

²⁷ Nen seleb dara, alda mek hmeiya doboka Imik Neyung ak perob aboka molowok. Dara mek hmeiya era alja yuba doro diriga ban nang ek elegesuukanya lebokja, ”Ugunda nidyaʾ or doboka dululum.

²⁸ Ban eneng enera, Imik Neyung adya nimi nauba blebnamlakanya, sikja malya unaʾ era sikenek ab sobaʾ memelemnesil amokaʾ ara an.

²⁹ Ugunda banyek dib senelemnulum: Ban mek enera, nablaboka dara, hnon neikaʾ denggulumeibyaʾ moruwoka, ugunub neikaʾ neyung bedyaʾ imik heikek wekeibya sum enyek, hnonok neikaʾ denemab,” hyok.

³⁰ Seleb unu debgogowek dara, sikda Imik Neyung bera hnonok sebeekanya, sikda Zaitun meinik sam byik.

Petrus Bera Sondaʾ Lebnamla Hyok Yuba

³¹ Dara onoʾ Yesus adya alja yuba doro diriga ban nang ek, ”Imik Neyung yuba bukuk sam ara, Imik Neyung adya lebokja, Nara sikjaʾ bo usinya benyek obnamna dara, alaʾ mab ara doluwoka bokgokdanamak, wenyaboka lebokaʾ anasa, ugunda sumen inimnek enera, nanokok loboka, yok-yok sen-senem henelum.

³² Bok nara embengaʾ suboka buknya dara, nara men Galilea sokok sam bilimnamna,” hyok.

³³ Wenyek Petrus bedya Yesus ak, ”Neyung, yok nang era nidyaʾ lo bininjak bok, nak hnonok mekaʾ unuwanggunumna!” hyok.

³⁴ Anasa Yesus adya alak, ”Anda banyek pe beknelam! Al sumen inimnek enyek, wining yuba anam sabnenggumlya salek, anda nak sondaʾ anasa bobnenewoka, lika winilya sondaʾ lebnenelem,” hyok.

³⁵ Wenyek Petrus bedya Yesus ak, ”Neyung, nara anab neikaʾ somoganasinimaʾ anaba, nadya anak dara, bera nara elgomnya benyaʾ aboka mekaʾ wenyhenggununggen!” hyok. Anya anyagan yuba doro diriga ban nanga nidyaʾ anaba al neik so leb ligiwek.

Yesus Ara Getsemani Wak Molowok Yuba

³⁶ Nen seleb dara, Yesus ab alja yuba doro diriga ban nang eb dara, yokok sam, si ara Getsemani alamek wak sam byik. Wera byikek ab dara, Yesus adya alja yuba donaʾ nang ek, ”Nara heng uboka Imik Neyung ak molol bilimnaʾ anasa, ugunda anyagan bukululum,” hyok.

³⁷ Dara Petrus beb, Zebedeus bedya mabo moumenaʾ penya uboka bo busuk. Anya Yesus ara ganya igina berewoka, engenaʾ ganya beibuk.

³⁸ Dara Yesus adya alja yuba doro diriga ban nang ek, ”Nara ganya igina berewoka, engenaʾ ganya beibnelekanya, dib somoganamnaʾ anasoʾ anyek ubnel. Anasa, ugunda anyagan diri ulumunukanya, onoʾ nab neikaʾ diri ubnemab,” hyok.

³⁹ Dara alda mek mok so gogonggoka byuukanya, dunuwoka lero molowokaʾ ara, ”Wei, neyung Imik Neyung o, or senemen bok dara, igina kweboka gweknaʾ damok ara nak ab mok sam gebnelam. Bok neyung, nadya senenanya nek gom, alda anja senelamnya nenyek ok, or unuwolul,” hyok.

⁴⁰ Seleb unu molobgogowok dara, Yesus ara on pik samal yeiniboka kemelemok enyek, alja winilya yuba doro diriga ban nang era, seleb hogunga mamekaʾ ak eibsuk. Anasa Yesus adya Petrus bek, ”Ugunda jama hnonok sibin anaba nab neikaʾ diri buknenggunusibya de?

⁴¹ Ugunda nimi sunulusilaʾ lomok sam malyinggumunuk aboka, diri bukoka sobaʾ mololelulum. Nimi ganya ak dara, unuwanesinya senen bok, nong ak dara, hmeng ulumla,” hyok.

⁴² Dara onoʾ Yesus ara saaboka hnon molol byuukanya lebokaʾ ara, ”Wei neyung, ban igin yakaʾ enyek mok nenenaʾ loboka, or kwebnenel bok dara, wera neyung, or anja senemenya nok or unuwolul,” hyok.

⁴³ Yesus ara an wenyaboka seleb molobgogowok dara, onok sam yeiniboka kemelemok enyek, alja yuba doro diriga ban nang era, hogung ok anasa seleb salyaʾ mamekaʾ ak eibuk.

⁴⁴ Wera onoʾ Yesus ara sik eib loboka li winilinya nera, Imik Neyung ak al neik yub enyek saaboka molowok.

⁴⁵ Seleb molobgogowok dara, Yesus ara onoʾ alja yuba doro diriga ban nang ek yeiniboka lebokaʾ ara, ”Ugunda dek-deka soboka or anam malum de? Nimi dibaʾ me nera malya unaʾ nim ek doboka eleganamak salek era, wera seleb oka dalaʾ anyek, kendululum.

⁴⁶ Wera, binimabaʾ anasa, buklulum. Nak oblulum aboka yuba dil bilinelnya bera, seleb oka yanggalaʾ anyek, kendululum,” hyok.

Yesus Ak Henga Goubek Yuba

⁴⁷ Yesus anam wenyaboka yuba salamok salek, alja obadya yuba doro diriga ban nang ben hnon, alja si Yudas beb, nimi yok nim nauba hnon, oldan gab eb doluknaʾ gal mal ab bomek nang edya, neikaʾ alablaboka yek. Wera nang dara, Imik Neyung yuba wa gakaʾ dub nang eb, mok soko dub nang eb dadya, orugeisik nang.

⁴⁸ Dara, Yudas bera ban beknaʾ dibaʾ enyek lemokaʾ ara, ”Nadya songa diniwoka gibnenya bera alan anasa, salawoka henga goubnelum!” hyok.

⁴⁹ Wera nang dara yalamekaʾ ara, Yesus ulumokaʾ ak yek dara, Yudas bera Yesus ak biniboka lebokja, ”Neyung neklesilimnya o, perob aboka gibgen,” wenyaboka uruma meka hmoboka gibok.

⁵⁰ Wenyek Yesus adya Yudas bek, ”Hem o, anja unuwonun senemennya nenesa yeilimem dara, or unuwalom,” hyok. Dara nim alab yeilimek nang era, ok berem bindiwoka, salawoka heng gobek.

⁵¹ Bok nimi ben hnon, Yesus ab neikaʾ anyagan seklemeknya bedya, gaba dob dakdowoka, yuba wa gakaʾ dubnya bedya wa nang ben hnon, o meklaʾ ak lebok.

⁵² Dara Yesus adya unuwoknya bek an, ”Nimi nidyaʾ gab adya nim olomak nim era, sikba gab adya unu obnesakaʾ anasa, anja gab era keboka bonaʾ ak doronggalom.

⁵³ Anja dara, alda alja neyung bek lero nanga denga yubaʾ obadya nang anaso berra aral yananokaʾ aboka molowanggunumso senelam de?

⁵⁴ Bok ban unumsoʾ anaba, Imik Neyung yuba orowek unuwanamla aboka momnya doboknya nenyek, weneba ubla sok gigiwolulaʾ aboka unuwanggunumso,” hyok.

⁵⁵ Dara Yesus adya nimi nauba anyagan alak obnobaʾ aboka yek nang ek, ”Ugunja dara, nara nim onaʾanya senewoka oldan gab ab doluknaʾ mal gal eb bo bo yeililum de? Dara, lika sobaʾ nara Imik Neyung e eremek sam neklesino bok, nak ara henga goubnenggulunulum!

⁵⁶ Bok, youmaʾ ununumnaʾ lelemek nang edya ban nenyek unuwanamla aboka orowek momnya dobeknya nenyek gigiwolulaʾ aboka nera ublum,” hyok. Dara, Yesus adya yuba doro diriga ban nang era alak ok loboka, sen-senem abgokek.

Yana Lelesin Ek Sam Bo Byik Yuba

⁵⁷ Yesus henga goubul yeilimek nang era, seleb goubek dara, bo balameknya nera, Imik Neyung yuba wa gakaʾ dubnya Kayafas bek, Yahudi yuba neksin nang eb, Yahudi dub nang eb dara, seleb orowek longomekaʾ ak bo byik.

⁵⁸ Wera Petrus bera, mok pik uboka keebgiga bilimokaʾ ara, yuba wa gakaʾ dubnya bedyaʾ eremek sam byuk. Alda erem enyek an wekoka, yin bonaʾ nang eb neikaʾ bura yabalamek. Alda hekaʾ danamlaʾ anyek ella donunaʾ aboka kemero bulumok.

⁵⁹ Imik Neyung yuba wa gakaʾ dub nang eb, nimi yana lelesin nanga nidyaʾ ara, sondaʾ anyek dibaʾ nenewoka Yesus ak oboka dibnobaʾ aboka yub eboka salamek.

⁶⁰ Dara nimi nauba sondaʾ anasa, yokaʾ-yokaʾ unulamla aboka miniwoka bo sal balamek bok, Yesus ara anyek okoka damok enyek dib malya ubokaʾ ara eibnenggubek. Bok, nimi penya nang eimik enyek, nimi hnoum sekel yarek.

⁶¹ Wera nim danadya, ”Ban benera leleladya, Nara Imik Neyung e ara golowoka beiyiboka, onsok li winilya ok sobnamna, alalanya bera an,” wenyherek.

⁶² Dara Imik Neyung yuba wa gakaʾ dubnya bedya sekoka Yesus ak, ”Anda hekasa anak yana kiboka lelenjaknya nemba dara, yuba hnon doro sanggululam do? Ban wenyalenjak dara, anda hekaʾ senelelam do?” wenyaboka heibuk.

⁶³ Bok Yesus ara yuba hnon doro sabnenggubok. Wenyek Imik Neyung yuba wa gakaʾ dubnya bedya, ”Imik Neyung embengaʾ ululanya bemba leboka, anda Kristus, nimi blebsinaʾ dubnya, Imik Neyung bedya me ululam gom, orok gom aboka wenyhesilom,” hyok.

⁶⁴ Anasa Yesus adya sikenek, ”Ugunja yub edya alan seleb wenyhelum an. Nara ugunuk dib lebnesin, Ban sum enyek moruwoka, nimi dibaʾ me nera Imik Neyung migibnya bedyaʾ sirikek sam bukla, anya alda imik sam debaʾ hnoum pik yanamla ak, eibnelum!” hyok.

⁶⁵ Wenyek Imik Neyung yuba wa gakaʾ dubnya bera, alja boksom gweldekdangoka, ”Bera Imik Neyung si ak malya nenelamla! Anasa yoknya bedya dib malya unulamla hululaʾ aboka ebnenggunumab. Alja Imik Neyung si malya geblamlaʾ ara, ugunja okoka seleb keblum.

⁶⁶ Ugunja dara, benyek anara hekaʾ hubnemab senelum do?” wenyaboka heibsuk. Dara sikja, ”Alda malya ulumlaʾ anasa, al somoganamla ok,” hyek.

⁶⁷ Dara, sikda Yesus adyaʾ hogung ak gamalaʾ solob goluwoka, soruk winin adya saboka olomek. Hnonda nong pik hogung pik wabom-waboma olomeekanya,

⁶⁸ lelemekja, ”Wei, nimi blebsinaʾ dubnya o, wera benedya olonel aboka ununumnaʾ leblom!” wenyalamek.

Petrus Bera Yesus Ak Li Winilya Sondaʾ Lebok Yuba

⁶⁹ Al ban salek enyek, Petrus bera e weilik sam diri bulumok dara, ek wa gel ge hnon yeiniboka Petrus bek, ”Galilea mok ebnya Yesus alamaknya beblaboka neikaʾ ululumnya ben gom?” aboka heibuk.

⁷⁰ Bok Petrus bedya dara, Benera nara elgomnya bek lelelam aboka, sondaʾ amba bobnenewoka nimi hnoum ak, ”Anjaʾ lelelamaʾ ara, hekaʾ ak leblam, naba elgom bar,” hyok.

⁷¹ Wenyaboka alda pik sindamak sam sekel byuk. Wene salek, yok ek wa gel ge hnon, yeiniboka Petrus bek eibuukanya, anyagan seklemek nim ek, ”Ban benera, Nazaret mok ebnya Yesus alamaknya beb neikaʾ ulumaknya benyaʾ,” hyok.

⁷² Wenyek Petrus bera sondaʾ amba bobnenewoka, ”Hyak aldib nong, benera nara hyak elgomnya!” hyok.

⁷³ Dara mandewanggonggom, nimi nauba anyagan longomek nim edya Petrus be eiyiboka, ”Aldib, anda sikeneb neikaʾ ululumnya, anja yuba sanaʾ ak ella ubjab,” hyek.

⁷⁴ Dara Petrus bera hyak besa leboka lebokaʾ ara, ”Nara benera naba mekaʾ elgom nong ulunanya!” wenhyok. Wera ban salek era, ayam yuba ngoubuk.

⁷⁵ Danyek Petrus bera Yesus adya alak men, ”Anda ayam yuba ngoubnenggumlya salek, nak sondaʾ amba li winilya bobnenewoka lebnenelem,” wenyamok ak gigiwal senewok. Dara alda goboka yibuukanya, nauba soloma daboka hyak goukduk-goukduka engewok.