KOLOSE 4 - PERJANJIAN BARU NALCA YUBA

¹ Wei, neyung yab o, banyek beklemnelum, imik heik ara ugumbabya ugunja neyung be ulumlaʾ bekoka, anya wa wen nang ek ara, pe sunuwoka dom digumnya nenyek unulululum.

² Heng uboka molonaʾ ak dara, bojam ulmoublululum. Anya, perob aboka giblemunukanya, pe diri uldalalalulum.

³ Imik Neyung ara nunja wenyaro yabalamabaʾ amba pika baklul aboka, nunsamba heng uboka mololosululum. Nunda ban Kristus an doknomokaʾ anyek, anesemba leboka na henga goubnyekaʾ anyek, wenyaro yabalemnemab anasa, mololosululum.

⁴ Onoʾ nara wenyhenesinyaʾ sunuwoka, pe laga leboka neklesunun aboka, mololonululum.

⁵ Ugunda yok nim ek ara, geremsengaʾ perobaʾ adya ok ulululum, anya wen an ubla salek ululanya nera, pe salawoka unulululum.

⁶ Ugunja yuba sabnelumaʾ anaba, wanaʾ un yub ok namen lebnalum bok, onoʾ angawom anaʾ dibaʾ gasa sonya hnon salalulum. Anedya yok nimi nidyaʾ ak yuba sabdanalum dara, hekaʾ uboka saawoka sabnamna senewoka ella ubnalum.

Sidyaʾ Wenyaboka Gibsuk Yuba

⁷ Nak yokaʾ-yokaʾ unulunelnya nera, Imik Neyung wa bojam uboka neikaʾ welemabnya, nunjaʾ hem wanaʾ nongnya, Tikhikus bedya ugunuk neknesil.

⁸ Alda nadya ugunuk bilom aboka orugamnaʾ ara, ugunda nuk unulusakaʾ anyek ella ubnelumukanya, onoʾ alja ugunuk ganya hek elegousulul aboka orugamna.

⁹ Alda ugun gangganeknya, be hnon bojam uboka wanaʾ ulumabnya, Onesimus beb neikaʾ binirum aboka orugeisin. Wera anyagan yokaʾ-yokaʾ nidyaʾ unulusilaʾ ara sikja neknesirik.

¹⁰ Nadya hembe neikaʾ henga gouboka doronggeisiknya Aristarkus bedya hnon, Barnabas, alja dong bedya me Markus bedya hnon, ugunuk gibisirik. Alsamba dara, ugunuk seleb wenyasikaʾ anasa, yanamla dara, ugunda perobaʾ leboka ubnelum.

¹¹ Hnonda Yesus benyek, Yustus aboka silimaknya bedya hnon gibisil. Wera ban winilya nang danyek, seleb bolaʾ garaweisik nang ek, sikinok nadyaʾ hemyabo dangoka, Imik Neyung wenesin heik amba leboka neikaʾ welemabakanya, sikda nadya ganya gwelelek anaʾ nang ulumak.

¹² Hnonda ugun gangganek abnya be hnon, Kristus Yesus amba wa wenya, ugunsamba mel-mel aboka seklemeijikanya, ganya kanaʾ nang dangoka Imik Neyung adya senelamlaʾ nidyaʾ anyek, ganya munaʾ gobdo olowoka ella ulumak nim ek ulunok senewoka, ugunsamba sobaʾ yeiriwoka mololosilnya, Epafras bedya hnon ugunuk gibisil.

¹³ Nara alsamba leboka laga lebnamna, alda ugunsamba hnon, sik Laodikia ab, Hierapolis ab, ulumak nim emba leboka, hyak yeng ganya boboka pe welesilnya.

¹⁴ Hnonda wanaʾ ulumaknya hwesinya Lukas bedya hnon, Demas bedya hnon ugunuk gibisirik.

¹⁵ Nunja perob aboka gibsab yub era, Laodikia ulumak hemyabo nim ek hnon, Nimfa beb, yuba donaʾ nim aljaʾ ek dolomak nim ek hnon, perob aboka gibisak aboka wenyhenelum.

¹⁶ Anasa ban ugunuk beisab surat en ugun einibgogowomun dara, onoʾ sik Laodikia sam yuba donaʾ nim ek hnon einiwanok aboka beibnelum. Anya sik Laodikia nim emba beiyimabnya neneba, ugunda hnon einiwanalum.

¹⁷ Dara, Arkhipus bek anaba wenyhenelum, Wenelesilnya amba doblum wa nera pe keeboka nidyaʾ pe welesilom, henelum.

¹⁸ Nara Paulus bedya gibsin. Ban gibsin yub era nadya soruk nong edya webemna. Nak henga goubnyekaʾ ara sobaʾ seinilinulum. Wanaʾ uboka eleksinaʾ ara, ugunuk ulusulul. Amin.