IBRANI 6 - PERJANJIAN BARU NALCA YUBA

¹ Anasa wera, Kristus ak men eilibik so domouba yub enyek loboka, gasa yuba doboka ganya kabgiga balamnamab. Anya, ganya danganaʾ yuba hnon, Imik Neyung ak dib senenaʾ hnon,

² mek danaʾ yuba hnon, nimi soruka diyiwoka heng ubokaʾ len yuba hnon, somogamna nimi suboka embengaʾ bunaʾ yuba hnon, igina yakaʾ ubmoruwanesil yuba hnon, nenyek egomnaʾ dibaʾ saawoka iknenggulumnamab.

³ Imik Neyung adya nuk sikda or anaso unuwanok senelesilya dara, wera nenyek nunda unulumnumab.

⁴ Anasa, sikja ganya ara seleb dilinaʾ lomok ulumeekanya, imik ab eleksinaʾ hnon doboka, Geisinya adya hnon domekjok,

⁵ perob yuba Imik Neyung bek ab doboka, onoʾ eimik Imik Neyung adya bo ubnesil migib era, ella dangamekjok,

⁶ onoʾ saawoka gwabal lolomak dara, sikda Imik Neyung me ak saawoka gal ak oboka glaboka, nimi hnoum ak derewoka walamakaʾ anasa, saawoka ganya danganaʾ ara oknaʾ ak ulumak.

⁷ Moka yalamla enyek meka pe oldaklamla soko era, masa wa weboka melemak nim emba nonga moul eleklamla dara, soko era Imik Neyung adya pel eleklamla.

⁸ Bok soko era erebnaʾ ab giriknaʾ ok malamla dara, wera perob masa mebnenggunuseng soko ek anasa, Imik Neyung adya wema dabnaʾ berrem ulumlakanya, eimik era uka dabnamla.

Ganya Wenaʾ Ak Salalmoublelulum Hyok Yuba

⁹ Bok nadya wanaʾ ulusin hemyabo nim o, nunja an wenhyabaʾ anaba, nunja dara, ugunuk ara or malye, dibaʾ pe ulumakaʾ anyaʾ senelesab. Anya, nunja dara, ugunuk ara sikda Imik Neyung adya perobaʾ, sik blebnesisoʾ ara seleb dobekaʾ anyaʾ senelesab.

¹⁰ Imik Neyung ara hyak pe sunuwoka eleklesilnya ulumla. Ugunja alsamba leboka, neik munaʾ Imik Neyung mab ek wanaʾ leblumukanya youmaʾ hnon aralelumaʾ ara, onoʾ wen hnon aralesulumaʾ amba dara, Imik Neyung ara, ugunuk hiliknenggulusilaʾ ak ulumla.

¹¹ Ugunja ganya adya nebom aboka dobsibya senewoka diri ululumaʾ ara, eimik pe dobnelumaʾ anasa, nunja dara, ugun moumen anyek pe yeiriwoka welemunaʾ ara sidyaʾ daklul senen ganya bolosab.

¹² Nunja dara, ugunda sulmalyaʾ ganya bonaʾ ara mem. Nim Imik Neyung adya eleganesin amokaʾ ak dib senewoka, ganya siklewoka pe diri ulumeekanya domek nim ek ulumek sok, ugumbabya sik diligaʾ diliwoka pe ulululum senelemab.

Imik Neyung Adya Eleganesin Amnaʾ Ara Meknenggulumla Yuba

¹³ Imik Neyung adya Abraham bek perobaʾ eleganenggen hyok sum era, anara aldib eleganenggenaʾ ak lebna aboka laga lemok. Wera Imik Neyung ulumlaʾ ak ara, ben hnon imik so unaʾ orok anasa, Imik Neyung al damnya si sibuka dib unuwanamna aboka lebdok.

¹⁴ Imik Neyung adya dara, ”Nara anak perobaʾ lebnenggenaʾ hnon, onoʾ hnonda anda senenggom nang yilaʾ nenewanenggen,” hyok.

¹⁵ Imik Neyung adya anaso lebok dara, Abraham bera aldib eleganenelaʾ anyaʾ senewoka ganya siklewoka diri ulumok dara, wera Imik Neyung adya alak lemokaʾ sunuwoka gigiwoka elegok.

¹⁶ Nimi hnon nadya anak anasoʾ ak unuwanenggen aboka dubnya saramek unuwanamna aboka dibaʾ wenyalamak dara, dib dangalamlakanya, ban damok enedya yuba lananaʾ ara unggulumla.

¹⁷ Anasa Imik Neyung adya dara, alja anyek eleganesin aboka lebsuk nim ek ara, nadya lebnaʾ ara hyak dib unuwanamna ok aboka, wera Imik Neyung ara al damnya si sibdangoka lebdok.

¹⁸ Wera ban penya damok era saawoka yok danganggulumla ara, Imik Neyung alja laga lenaʾ ab, unuwanasin amnaʾ ak ara, hyak mekaʾ sondaʾ lenggulumla. Ban nenesa leboka, nunda Imik Neyung ak perobaʾ leboka muruklumab nim era, nunjaʾ hogung ak an ulumlaʾ ganya nebom anaʾ ara dib dobnemabaʾ anyaʾ senen ganya era migib eleklesil.

^19-20 Nunja dobnemab senewoka ganya nebom alamabaʾ ara, girik ak henga geregoka, mek lomok sam doublenggamnaʾ anaso ulumla. Ban unu ganya nebom alamabaʾ ara, Yesus ara nunsamba aboka mengewosuukanya, lomok wiknenaʾ aklenga poboka wekel byuk adya, hyak gasa ulusil. Dara Melkisedek benesoʾ anyek, Yesus ara imik heikek wekoka, yuba wa gakaʾ dubnya nunsamba hyak dibaʾ amba ulusil.