IBRANI 5 - PERJANJIAN BARU NALCA YUBA

¹ Anasa, sik yuba wa gakaʾ dub nang era, Imik Neyung ak ganya doboka eleknanya neb, malya unaʾ amba oboka molonanya neb dara, alja unulululaʾ aboka, nimi gangganek ab weboka, siksamba Imik Neyung ak ara alja yuba saboka unulululaʾ aboka sekillilimak.

² Albabya nim ak adya hmeng ulumlaʾ anasa, yuba wa gak nang ulumna nang era, nimi yokaʾ-yokaʾ elgom uboka, yokaʾ-yokaʾ adya geregoka meknelemak nang ek ara, namenaʾ pe ganya goluwoka aralesil.

³ Imik Neyung adya malya unaʾ doro bobogosululaʾ aboka bo beil banaʾ ara, yok nim edya malya unaʾ emba ok gom, alda alja malya unaʾ enesa hnon bo beil balamla.

⁴ Nimi ben hnon alja ok ganya doboka, nara yuba wa gaknya ulumnamna aboka sekillildanaʾ ara orok. Harun bek umok sok, Imik Neyung adya anda wa nen webnelam aboka youbsin dara, nim ara yuba wa gak nang dangalamak.

⁵ Anasonya neikek Kristus anaba, alja ganya doboka nak gigiwanenokaʾ aboka yuba wa gakaʾ dubnya nenebdanggubuk bok, alda Imik Neyung adya ok ganya doboka senenggom yuba wa gakaʾ dubnya aboka sekiyiwok. Imik Neyung adya Yesus ak, ”Anda nadya me ululam, sumen enyek moruwoka nara anjaʾ neyung be dagen,” hyok.

⁶ Dara onoʾ Imik Neyung ara yokok sam hnon, ”Melkisedek be yuba wa gaknya ulumok sok, anda sobaʾ ara senenggom yuba wa gaknya ulumnelam,” hyok.

⁷ Yesus ara anam sokok an ulumok salek era, al nonga somoknaʾ ak ab blebnemoknya Imik Neyung bek, bii aboka engelemookanya, aralenelom aboka mololomok. Wera Imik Neyung ak hyak pe ganya sokok nenebdangoka giblemokaʾ adya, alja molonaʾ era Imik Neyung adya pe kelemok.

⁸ Yesus ara Imik Neyung bedya me yokaʾ ulumokaʾ anyek babya, alak an igina kweboka unulumokaʾ ak ab, pe unulumokaʾ adya eiyiwoka ella dangalamok.

⁹ Dara Yesus ara, munaʾ gobdo pe meebdakok dara, nimi nidyaʾ alak pe keboka unulumak nim emba, dibaʾ blebsinaʾ gaknya dok.

¹⁰ Imik Neyung adyaʾ anaba, Melkisedek bek yuba wa gaknya ulumok sok, Yesus anaba yuba wa gakaʾ dubnya ulumnamla aboka, laga sekiyiwok!

Beklulumaʾ Aboka Wenewosuk Yuba

¹¹ Yesus ara senenggom yuba wa gaknya ulumlaʾ amba dara, nauba lebnesisinya bok, ugunda pe nidyaʾ olowoka ella danggunusom hogung ululumaʾ anasa, pe yana lelewoka lebnenggunusin.

¹² Wen era, ugunda yuba len nanga dangamnesom bok, nera ununaʾ orokaʾ anyek, alda Imik Neyung yuba doboka ganya kalamakaʾ damok ara, yok nim edya anam pe neknesiseng hogung ek ululum. Anya, ugunda gasa denaʾ lowoka, anam moum soub denaʾ ok delelum.

¹³ Nimi moum soub ok anam delemak nim era, anam ganya hwinaʾ orokaʾ anyek, ganya olowoka nera perobaʾ, nera malyaʾ senenaʾ ara anam elgomaʾ ak ulumak.

¹⁴ Bok gasa denaʾ ak dara, nimi ganya karob nim edya, sobaʾ sunuwoka eillilimakaʾ adya, nenera perobaʾ, nenera malyaʾ senewoka, ella dangalamak nim emba ulumla.