IBRANI 3 - PERJANJIAN BARU NALCA YUBA

Musa Bera Mek Bok Yesus Ara Naubenya Ulumla Yuba

¹ Wera anasa, nadyaʾ hemyabo geisa nim Imik Neyung adya youbsuk nim o! Nunja dib dolomab yuba lenaʾ gaknya bek, Imik Neyung yuba wa gakaʾ dubnya Yesus bek anyek, ugunja ganya ologoka seinilelulum.

² Dara neik so, Musa bera Imik Neyung ek sam amba wa nidyaʾ ara, bojam ulumok sok, Yesus anaba alak weboka domoknya Imik Neyung amba bojam nong ulumok.

³ Wera nim adya somna e nera loboka, alda sololanya bek nauba so gigilemak sok, Yesus ak dara, nauba gigilemak bok, Musa bek dara mek so.

⁴ Nidyaʾ e dibaʾ ak dara, alba sonaʾ elnya bedya ok solomla bok, yokaʾ-yokaʾ nidyaʾ pe geremsengaʾ sunuwoka sololanya bera, Imik Neyung ak hnonok ulumla.

⁵ Musa bera Imik Neyung ek sam amba wa arawoka bojam uboka wenya ulumok. Ban bojam ulumoknya nera, eimik laga wenyhenemoknya nenesa leboka, unulumok.

⁶ Bok Kristus ak dara, albabya Imik Neyung me yokaʾ uboka, Imik Neyung e amba dara, alda bojam uboka e dubnya ulumla. Nunda ganya dib senenaʾ ab, ganya wenaʾ ab danyek, salalmoublemeibya dara, wera nu nong ara Imik Neyung alja e dibaʾ ulumab.

Malya Damok Adya Somoganamak Yuba

^7-8 Anasa wera, Imik Neyung Geisinya adya wenyalasil sok, ”Ugunjaʾ neyung yab edya youmaʾ ek hwalek sam ab Imik Neyung ak lobaʾ nenewoka blekoka ulumek sok, ugunda sumen Imik Neyung yuba kebmunjok dara, saawoka gasa ganya bonaʾ ara mem.

⁹ Wera Imik Neyung adya dara, hwalek sam ab ugunjaʾ neyung yabo youmaʾ nim edya, nadya yokaʾ-yokaʾ nidyaʾ senenggomaʾ unulamsaʾ anyek, denga hnonok uboka ebdobnya meikbadya gibnaʾ seleb eiyimekjok, nak lobaʾ nenewoka sunuwoka ol neblenyek sok, ununggom mem.

¹⁰ Ban sikja ununaʾ enesa leboka nara yu ganya boboka wenyamsaʾ ara, Sikda sobaʾ ara nak bojam ununenaʾ orokaʾ anyek, nadya yub ek ganya ologoka ununggulumek.

¹¹ Anasa leboka, nara yu ganya boboka waboka laga dib unuwanasin hesaʾ ara, Nadya deregoka pe dek-deka soboka ulumnaʾ ak ara, sikda hyak weknenggunumak, hesa,” hyok.

¹² Nadyaʾ hemyabo nim o, ugun gangganek ara nimi ben hnon yuba dib senenaʾ loboka malya ubdibigamlyaʾ sok moruwoka, Imik Neyung embengaʾ ululanya bek ab, saawoka loblyek anasa, ugunda pe keeboka diri uldalalulum.

¹³ Bok, ugun gangganek ara, sondaʾ damok malya unaʾ adya nimi ben hnon alja ganya gasa darawalyek anasa, ugunda nimi ben hnonja hnonnya bek, sumen or anam alalum salek era, ugunda li sobaʾ pe wenewoka unuldalalulum.

¹⁴ Nunja men youmaʾ ek mouruwoka dib senemoubaʾ anyek, pe gasa salabmouboka ulumeibyaʾ ara, sidyaʾ daknamla dara, aldib Kristus ab seleb neikaʾ un nimi douba.

¹⁵ Bok, hnon anaso wenhyokaʾ ak, ”Ugunda sumen Imik Neyung yuba kebmunjok dara, ugunja neyung yabo youmaʾ nim edya Imik Neyung ak bleklemek sum enyek, gasa ganya bomek sok ununaʾ ara mem,” aro lebok.

¹⁶ Wei, nim Imik Neyung yuba kemekjok saawoka gasa ganya bomek alamla nim era, hek nim ek lelemla do? Musa bedya Mesir sokok abaʾ ara doboka bo balasuk nim ek gom de?

¹⁷ Anya, hek nim ek denga hnonok uboka ebdobnya meikbadya gibnaʾ Imik Neyung ara yu ganya bobmorusuk do? Nimi nidyaʾ malya ura balameekanya, onoʾ hwalek sam salyaʾ somokdo balamek nim ek gom de?

¹⁸ Sum enyek Imik Neyung adya laga dib unuwanamna hyokaʾ ara, ”Nadya deregoka pe dek-deka soboka ulumnaʾ ak ara, sikda hyak weknenggunumak,” hyokaʾ ara, Imik Neyung ara hek nim ek lebok do? Ban wenhyokaʾ ara, Imik Neyung ak gasa ganya boboka bleklemek nim ek lebnenggubuk de?

¹⁹ Wera anasa, sikda Imik Neyung ak dib senenaʾ orok adya, weknenggubekaʾ ara, nunda seleb eillilimab.