IBRANI 2 - PERJANJIAN BARU NALCA YUBA

Senenggom Blebsinaʾ Damok Yuba

¹ Wera anasa, nunja kemoubaʾ anyek, mek-mekaʾ uboka mok danggiga bibyek anasa, nunja seleb keboka domoubaʾ ak ara, hyak pe salabmouboka ulumnemab.

² Dara, lero nang pik uboka, dib yuba leb elegeisikaʾ ara, pe kenaʾ orok uboka bleklemek nim era, unulumekaʾ sunuwoka iginaʾ dolomek dara,

³ nunda senenggom blebsinaʾ damok ek, dolbaleka gebnesibya dara, igin eleknaʾ lobnesusu de? Ban blebsinaʾ damok enera, Wenelesilnya bedya men leb elegesuukanya, alak ab kemek nim edya, nuk aldib an beknaʾ elegesik.

⁴ Imik Neyung ara aljaʾ lok so beknaʾ eb, senenggom lok so ununaʾ eb, lok so migib ununaʾ eb, hnon alja unuwanamna senemokaʾ sunuwoka, Geisinya anyek alja bokosuknya neb dadya, blebsinaʾ damok enyek laga amasuk.

Nimi Blebsinaʾ Pika Yarawosuk Yuba

⁵ Anasa, an nenera, nunja wen an salamab sokok ara, eimik yanamla soko enyek, Imik Neyung adya lero nang ek ara, migib eleganggubsuk.

⁶ Bok nimi hnon Imik Neyung bukuk sam ara lemekja, ”Wei, Imik Neyung o, nim ak anasa, anda alak beknesom de? Goma, nimi me ak anasa, alsamba leboka perobaʾ gebnesom de?

⁷ Bok anda nim ek ara, lero ara imik nenewoka, nim ak dara, sokok nenewolum. Nim ek ara, alja si imik nenewoka, alja si nera gigiwoka,

⁸ yokaʾ-yokaʾ nidyaʾ amba leboka dubnya nenewolum,” aro momnya dobok. Imik Neyung adya nim ek yokaʾ-yokaʾ nidyaʾ amba dubnya nenewok dara, wera hnon yoknya nek nim adya dubnya unggululanya nera hyak unggulumla. Wera ban unuwokaʾ anyek babya, wera nunja kemen dara, nim ara yokaʾ-yokaʾ nidyaʾ ak ara dubnya dangoka bo ulumlaʾ ara hnon eilinggulumab.

⁹ Bok Yesus ara, seʾ salek amba mek sokok so geboka, lero ara imik geboka, Imik Neyung adya wanaʾ uboka eleksinaʾ adya, nimi nidyaʾ amba somogousululaʾ aboka umok bok, wera alda somogousukaʾ adya, alak si imik nenenaʾ ab, giginaʾ ab gouluwokaʾ ara nunda eillilemab.

¹⁰ Dara, Imik Neyung alsamba leboka yokaʾ-yokaʾ nidyaʾ ululanya, onoʾ yokaʾ-yokaʾ nidyaʾ uyimoknya bedya, alja mabo gong dara si imik nenelesuukanya, sikja blebsinaʾ damok bo ulusuknya bek igina kweiyiwokaʾ adya gobdo gigiwok dara, anedya pebok.

¹¹ Yesus adya nim ek geisa nenewosuknya beb, an geisa nenelesil nim eb dara, sikda nidyaʾ ara hnonok mabo silibaʾ ek ab ulumak. Ban nenesa leboka Yesus ara nim ek, nadyaʾ hemyab anaʾ ara, alya unggulumlakanya wenyalasil.

¹² Yesus adya Imik Neyung bek, ”Anja si nera nadyaʾ hemyab ek nadya leb eleganamna. Sikja yuba longolomeijaʾ gangganek ab anak giblemnenggen,” hyok.

¹³ Dara Yesus adya hnon, ”Nadya ganya nebom anaʾ dibaʾ ara, Imik Neyung ak beibnamna,” hyok. Anya, ”Imik Neyung o, anja doboka nak elegounulum mab era, nab an ulumab e,” hyok.

¹⁴ Ban mab era nim ek ab mab anasa, Yesus anababya sik soʾ dookanya, sik nonga dobok. Anedya al somogokaʾ ara, alda somoknaʾ dub migibaʾ Iblis ak, hmengaʾ nong gebnunaʾ aboka unuwok.

¹⁵ Wera an unuwokaʾ adya, nimi nauba somoknaʾ ak sobaʾ lok ganya adya, igina kweiyiwoka bo bulusuknya nek ab, munaʾ gobdo bleboka dobsuk.

¹⁶ An unuwoknya nera, lero nang ek unuwanggubsuk bok, wera aldib alda nimi Abraham nang yilaʾ ak unuwousuk.

¹⁷ Ban nenesa leboka, Yesus ara gobdo nimi nonga dangoka, nim adya ununaʾ dobnunaʾ aboka ubuk. Wera anadya Yesus ara Imik Neyung amba bojam uboka, angoo yadyek senewoka arasinya dangoka, yuba wa gakaʾ dubnya ulununaʾ aboka ubsuk. Dara, nidyaʾ nim adya malya unaʾ doboka bobogosululaʾ aboka ubsuk.

¹⁸ Anasa Yesus ak ara, alak men bisaʾ adya sunuwoka, igin ara har soʾ kwellilisilaʾ ara, alak seleb unuwokaʾ ella umokaʾ adya, alak unu sunuwokaʾ anyek bekoka, alja mab ek sunulusilaʾ ak ab dara, alda pe aralesil.