IBRANI 12 - PERJANJIAN BARU NALCA YUBA

Ganya Dib Senenaʾ Ak Ganya Goululum Hyok Yuba

¹ Wera nuk kemelesak nim era nuk goulub ganagok debaʾ anasoʾ anyek ulumakaʾ anasa, wera nuk igina ul eleklesilaʾ nidyaʾ ab, men meknewaneseng malya unaʾ eb dara loboka, ugunsamba yeiriwoka bik-bik aboka unulululum hyokaʾ ak ara, ganya gouluwoka bik-bik alamnamab.

² Anasa nunda nunja, ganya dib senenaʾ arawoka bo balasilnya be Yesus bek, nunja ganya dib senenaʾ ara pe munaʾ peldaknaʾ ak bo balasilnya bek heng yokaʾ bekoka hyak pe unulumnamab. Alda derelemekaʾ ara eiwaawom aboka, ganya eiya dabnaʾ alsamba ulumokaʾ ara lunuwoka on gal enyek ganya gouluwoka jaboka bobok. Anya wera alda Imik Neyung bedya ekla bunaʾ ek ara sirik ek sam bulumla.

³ Dara ugunda hmenga dangoka ganya obdoumunuk aboka, alda al nong anyek malya unaʾ nim ek ab derenaʾ anyek or wenyalanenok senewoka doboknya bek, anyek hyak sobaʾ beklelulum.

⁴ Anya ugunda malya unaʾ ab oldalalumuk ara, ugunja eneng hnon lananggulusil.

⁵ Wera ugunuk wenesin yub enyek, mek mab ek weneleng sok lelemla yub era, ”Wei, najab o, anda Imik Neyung adya nekoka wenelenggelaʾ ara dolbalekaʾ senenggom mem. Anya, alja omoma leboka wenyalanggel dara, anda ganya oldanggom, mem.

⁶ Nera Imik Neyung ara alja wanaʾ ulumla nim ek ara wenelesilikanya, alda alja mabo geblamla nim ek ara legebnaʾ adya deblesil,” wenyalalanya nera ugunda hibigoulum de?

⁷ Wera ugunda wenesinaʾ anyek pe ganya gouluwoka dololulum. Imik Neyung ara ugunuk ara alja me nenesoʾ anyek unulusil. Dara nimi me anyek, eili bedya wenenggulumla me nera hanyegarek ulumla do?

⁸ Bok ugunda ban wenesinaʾ nim igina dobnesengaʾ ak anyeb or goʾ ululum dara, wera ugunda memabo yokaʾ ak unggululum bok, alda beiyik mab ek ululum.

⁹ Dara nunjaʾ neyung be yokaʾ nong ok ab ban wenenaʾ ara dolomabakanya, sikda nunja dara, nunjaʾ neyung yab senelemab. Wera anaso dara, nunda embengaʾ dobnemab aboka dara, ganya bo usinnya neyung bek ara hyak pe keboka ganya ologoka ulumnamab.

¹⁰ Anya sikda nuk wenelesak salek era mekaʾanya, sikja perob senelemaknya nera an neklesak an. Bok Imik Neyung ara nunda aljaʾ munaʾ perobaʾ anyek hnon dobnok senewoka, anya nusamba perob dangan danesa wenelesil.

¹¹ Dara aldib, alja nuk wenelesilaʾ ara yokaʾ-yokaʾ sunuwoka ganya eiya dabnaʾ lananggululabok, hnonda ganya oka denaʾ ak lanalamla. Bok eimik dara, alja wenewoka neklesil nim era, ganya namen uboka pe unaʾ dok ak lanalamla.

¹² Wera anasa, ugunja hmeng ulumla soruk eb, daldom-daldom alamla kom eb dara, migibaʾ geblelulum.

¹³ Anya, geimdilimak nim era oro beibsilyek, alda merewanokaʾ aboka ugun yaban pik era pe meewoka yaralelulum.

¹⁴ Anasa nimi yok nimi nidyaʾ ab dara pe ganya olokdangoka ulunob senewoka ulululum. Anya pe geisa unaʾ orok dara, nimi be hnon Imik Neyung ara eibnenggunumlaʾ anasa, pe geisa unaʾ anyek yeiriwoka doblelulum.

¹⁵ Dara nimi nauba malya nenewoka, sembejaʾ gebnesilya damok yu nongaʾ sikaʾ anyek lanawalyek aboka, ugunda nimi be hnon Imik Neyung bedya perob eleksinaʾ ak ab mok gebdalyek aboka pe diri ulululum.

¹⁶ Anya nimi hnon hyak gel ak unuweisinya ganya adya wekdeknewoka, Esau bera gwaneng denaʾ piring hnonok amba aljaʾ yandonya bedyaʾ misaʾ era, pe seininaʾ loboka men dekok sok, neikso ununaʾ ara mem.

¹⁷ Dara ugunda ella ululumaʾ ara, Esau bera eimik era alda hyak nauba engewoka elemokaʾ anyek babya, alja meknenaʾ era or pe memewolul senewoka hnon eleknaʾ orok adya, ban perobaʾ misaʾ ara dobnenggubuk.

Nauba Wa Nek Welemak Yuba

¹⁸ Nera ugunda bebeganesom mok soko mein ek hnon, singilamla uk ek hnon, lom nong ok serenggom alamla gunaʾ ak hnon, gunaʾ ulumlaʾ ak hnon, nauba kaboʾ ek hnon,

¹⁹ poo anaʾ benggong yub ak hnon, anya hyak naubaʾ meijal lelemokaʾ adya, sik kelemek nim era hnon wenyhemenek alamek yub ek hnon yangganggululum.

²⁰ Dara sikda ban yub enyek kebdabnamenggom anasa wenyalamekaʾ ara, ”Wera pama unuruwaʾ anaba ban mein enyek bebeganamla dara, wera girik adyok sabom-saboma obnemakaʾ ok,” wenyalamok.

²¹ Dara banyek kemenaʾ ara hyak lok nong anasa Musa bera wenhyok, ”Nara hyak nauba lok nonga dabnelekanya, ber-ber alanel,” hyok.

²² Bok ugunuk dara, Sion meinik, Imik Neyung embengaʾ ululanya bedya heikek, Yerusalem imik heik adyaʾ ak sam ab, anya salyaʾ dengsalyaʾ anyek longowoka eiya hlalamak lero nang ek sam ak, seleb youlum.

²³ Anya yuba dorob nang sikja si nera imik heik momnya dobsuk nimi men yando nang ek ab, nimi nidyaʾ pe yana lelesilnya Imik Neyung bek ab, anya hyak pelemek nang edya ganya gong ek ab,

²⁴ anya wenyok yuba bo yanggannya Yesus bek ab, dara Habel bedya eneng era hmeng so, alda hyak yeiriwoka migibaʾ salamla enenga, lobol goulusin eneng ek sam, seleb youlum.

²⁵ Dara ugunda ban yuba leboknya bek lobmunuk aboka pe keboka unulululum. An nenera sik alak sokok an Imik Neyung yuba leboknya benyek lomek dara, sikda hyak merewanggumek. Anasa nunda wanok, nunda alak imik heik ab yuba salalanya bek lobnemab dara, merewanggunumab.

²⁶ Wera ban salek era alja yub edya dara, soko ara ebeklemok bok, wenyek dara, alda ban yub enyek wenyab elegousuk, ”Bok liga hnon sum era, nara soko ok unuwanggununabok, im anaba salawoka borom-borom ab lobnamna,” hyok.

²⁷ Dara ban ”liga hnon sum enyek” hyoknya nera, yokaʾ-yokaʾ uyiwokaʾ ara, borom-borom henelanya nera, yok-yok dangdo binimla bok, borom-borom henggunulanya nek ok sobaʾ ulumnamla.

²⁸ Wera anasa, nuk dara borom-borom henggunumla heik mok soko ek dolomab. An nenesa leboka, nunda Imik Neyung ak perob aboka giboka, nunda alak perob senewanalenya nedya, alak imik geboka hyak lok uboka giblenob.

²⁹ Nera nunja Imik Neyung era, momnyanga wouluwoka delemla uk ek ulumlaʾ anasa, unu giblenob.