IBRANI 10 - PERJANJIAN BARU NALCA YUBA

Gibnaʾ Yokaʾ Nong Yuba

¹ Yahudi nim edyaʾ unuwanalum an yub elegosukaʾ ara, eimik perobaʾ yanamokaʾ anyek diliwoka, gunaʾ inib-inib along sokaʾ ak dib gomnya nenyek sununaʾ dibaʾ ella dangan danasa elegosuk. An unuwanalum an yub elegosukaʾ ara, Imik Neyung adya hyak perobaʾ dibnya eleganesukaʾ anasa elegosuk. Wera unuwanalum an yub edya dara, li sobaʾ masa unuruwaʾ adya giboka beil yeiniboka, Imik Neyung ak oka yeindeboka giblemneseng nim eneba munaʾ gobdo pewanggunusiso.

² Nim Imik Neyung ak masa unuruwaʾ beil yeiniboka giblemek nim era, ban adya Imik Neyung adya sikja malya unaʾ seleb doboka boboganamso dara, saawoka beil yanggunuseng. Anaso dara, sikda malya ulumab senen ganya bonaʾ loboka, Imik Neyung ak masa unuruwaʾ beillilimekaʾ adya, sikja malya unaʾ doboka bobogoka perobaʾ nenesusoʾ anasa, saawoka beil yanggunuseng.

³ Bok gibnaʾ lelemnaʾ elaʾ gigiro masa unuruwaʾ Imik Neyung amba malya unaʾ doboka bobogosululaʾ aboka bo beil yalamek dara, sikda malya unaʾ nim ulumek senewoka beklemnemak aboka ulumok.

⁴ Anasa, sapi pam eneng ab yem kambing pam eneng ab dadya dara, nim adya malya unaʾ era doboka boloknenggulusil.

⁵ Ban nenesa leboka Kristus ara sokok sam yok sum era, Imik Neyung ak lebokaʾ ara, ”Anda pam ab yokaʾ-yokaʾ giboka eleklenjakaʾ ara perob senenggululam bok, alda nadya nong enyek doboka beiblum.

⁶ Anda pam oboka giboka uka dalanjakaʾ ara pewanyak senenggululam, hnonda malya unaʾ doboka boboganasilim aboka bo beil yalanjak masa era, perobaʾ leboka donggululam.

⁷ Anasa leboka nadya dara, Imik Neyung o, wera nara an! Kerob bukuk sam nasamba leboka momnya dobokaʾ sunuwoka, nara anja seinililamnya nenyek unuwonunaʾ aboka yeilimsa,” hyok.

⁸ Men Kristus adya, ”Pam ab masa unuruwaʾ bo beil yalanjakaʾ ara anda lek senelelum, Imik Neyung amba giboka beibnemab aboka uka dalanjak pam eb, malya unaʾ doboka boboganasil bar aboka, bo beil yalanjak masa era perob senewoka doboka denggululum,” hyok. Yokaʾ-yokaʾ nidyaʾ ara, Yahudi nim edyaʾ unuwanalum an yuba momnya dobokaʾ sunuwoka unulumek bok, Kristus adya dara, anaso penggulumek aboka lebok.

⁹ Nen seleb dara Kristus adya sounuwoka, ”Imik Neyung o, nara an ulumna. Nara anja seinililam ganya seininaʾ enyek unuwanamna senewoka yeilimsa!” hyok. Anasa youmaʾ unuwanalum an yuba bukuk sam momnya doboknya nera orokaʾ geboka, Kristus anyek nim adya malya unaʾ doboka boloksinaʾ amba lunuwok.

¹⁰ Yesus Kristus ara Imik Neyung adya unuweisinya senemokaʾ anyek gigiwoka unuwokaʾ adya, al nong anyek doboka malya unaʾ doboka boboganasin bar aboka seleb elekdangoka somogok. Wera an al nonga doboka elekdokaʾ anadya, sobaʾ pe unulmorululaʾ aboka, lika hnonok somogokaʾ adya, nunda nidyaʾ ara, Imik Neyung amba ok munaʾ un nimi dengeiyiwousuk.

¹¹ Yahudi nim edya yuba lenaʾ gak ulumek nang era, sob-sobaʾ saam-saam aboka Imik Neyung amba oboka beiri ulumek. Bok sikja ban giboka unu sobaʾ beillilemek beilinaʾ edya, nim adya malya unaʾ hyak doboka boboganggunusisonya nenyek unulumek.

¹² Bok saawoka, ban yuba lenaʾ gaknya Kristus ara, alja nong anyek soko nimi malya unaʾ doboka boloklemnesin aboka, lika hnonok munaʾ elekdanggogobok dara, alda imik heikek welewoka Imik Neyung adyaʾ sirikek sam bukok.

¹³ Anya wenyek dara, nidyaʾ Yesus ak dib senenaʾ orok nim era Imik Neyung adya Kristus adyaʾ yan damak sam bob mamaganamla sum enesa diri ulumla.

¹⁴ Wera Kristus anyek alja nong elekdangoka somogoknya nenedya, malya unaʾ ak ab seleb geisa nenelesil nimi nidyaʾ ara lika hnonok sobaʾ amba aboka munaʾ gobdo perobaʾ nenewosuk.

¹⁵ Wera yuba damok enesa dara, Imik Neyung Geisinya adya nuk, nera aldib Kristus ara unuwok aboka laga lelesil. Wera Imik Neyung Geisinya anaba,

¹⁶ ”Wenelesilnya Imik Neyung bedya dara, ban salek seleb dara, wenyek unubdanamab an yuba nadya eleganasinaʾ ara an. Nadyaʾ unuwanalum an yub ek, sikja ganya lomok sam beibnamna, anya sikja ganya seininaʾ ak hnon momnya dobnesin, ” hyok.

¹⁷ Dara onoʾ Imik Neyung ara, ”Nara sikja malya unaʾ eb, meknenaʾ ab dara, hnon beknenggulumnamna,” hyok.

¹⁸ Anasa ban malya unaʾ era seleb meewousuk bok dara, eimik enyek yok saawoka malya unaʾ meewanasil bar aboka, Imik Neyung amba giboka pam oboka beil binggunuseng.

Nunda Imik Neyung Berem Balamnemab Yuba

¹⁹ Wei, nadyaʾ hemyabo nim o, Yesus alja eneng adya ok, Imik Neyung adyaʾ hyak geisa nong ekla ek ara, asaʾ ganya boboka wekel binimab.

²⁰ Yesus adyaʾ nusamba leboka, nim embengaʾ eleksin pika yok perob pika baksuk. Wera pik era Imik Neyung ek sam geisa ekla aboka wiknelemek boksom akleng era, Yesus nong ara an pik dibaʾ seleb ulumla.

²¹ Anya nuk dara wera, senenggom yuba lenaʾ dubnya yak nim ek ulumabaʾ ara, anara Yesus nong ak ulumla. Dara Yesus ara alda Imik Neyung ek sam wa nusamba welesilnya be hnon ulumla.

²² Ban nenesa leboka, nunda hyak perob un ganya boboka, ganya dib senenaʾ migibaʾ uboka, malya ubna senen ganya era seleb geisa nenewoka, perob mek dibaʾ adya nonga mek elegoka, Imik Neyung ak ok berem sobaʾ al dam balanob.

²³ Imik Neyung ara aldib alda bojamnya ulumlakanya, alja perobaʾ eleganesin hyokaʾ ara aldib eleganesilaʾ anasa, nunja aldib perobaʾ dobnemab aboka dib senen ganya boboka, nebom alamabaʾ ara gasa salalmoublenob.

²⁴ Nunda yok nim ek pe wanaʾ ulunobaʾ aboka wenebdangoka, onoʾ perob unaʾ anyek nauba unubgiga balanobaʾ aboka, nunda pe kemero uldalamnamab.

²⁵ Imik Neyung yuba longolomabaʾ ara longgom mem. Nimi hnon lolomak sok neik so ununggom. Nunda ganya gwelelek aboka yokaʾ-yokaʾ unuldalamnamab. Wenelesilnya bera mek anam yanalabok anasa, nunda sobaʾ nauba so wenebdangoka uldalamnamab.

²⁶ Anasa Imik Neyung bedyaʾ dib yub ara nuk seleb leb elegemnesak bok, nunda sene sobaʾ malya ubdibigemnemab dara, malya unaʾ en doboka bobogosululaʾ aboka dara, yok memenaʾ ara orok.

²⁷ Sene sobaʾ malya ubdidiganamab dara, Imik Neyung ara yana lelewoka, alak isaʾ nenelemak nim ek uka dabnesil senenaʾ ak ok hnonok ulumla.

²⁸ Musa bedya unuwanalum an yub enyek, lek aboka lomek nim era, nimi penya nang gom, winilya nang gom edya aldib blekemla alamek dara, unuwanya bek ara, angoo yadyek senenaʾ loboka hyak dibaʾ olomek.

²⁹ Bok hyak nauba ara, Imik Neyung bedya me Yesus ak blekoka yan ingib sablamlaʾ amba hnon, malya unaʾ ak ab geisa nenewanesin aboka yekok eneng ek malyaʾ sembejaʾ senelamlaʾ ak hnon, wanaʾ uboka eleksinaʾ Geisinya bedya ak derelamlaʾ amba hnon, hyak nauba saboka obnamla.

³⁰ ”Nadya eimik dirigoka obnamna! Nadya malya nenewoka obnamna!” anya hnon leleladya, ”Wenelesilnya bedya alja mabo yana lelewanamla,” alalanya bera nunda seleb ella ulumab.

³¹ Dara nunda Imik Neyung hyak senenggomaʾ embengaʾ ululanya bedya soruk ak sam obnesilaʾ ak sam anyek danamabnya nera, hyak omom nongaʾ ak ulumab.

³² Nadyaʾ hemyabo nim o, ugunda men yuba doboka ululum salek era, Imik Neyung dilinaʾ anam ugunuk yebesuk dara, igina kwesinaʾ ara nauba ulusuk bok, eiwaawom aboka pe unululumaʾ anyek pe beklemnelum.

³³ Ugunuk nimi hnoum ab derewoka waboka saboka malya nenewoka olosik. Hnonda ugunja hemyabo nim eb neikaʾ anaso unulusik.

³⁴ Nimi henga geregoka beillilesik nang edya engelemeknya nera ugumbabya unululum. Ugunja dara, nunda eimik era songa leboka blobnenggunumla perob so bonaʾ Imik Neyung adya eleganesilaʾ seleb ella ululumaʾ anasa, ugunja bonaʾ nidyaʾ hokaʾ nang edya doluwoka dolosik dara, or unulunok senewoka dogom alum.

³⁵ Wera anasa, Imik Neyung adya perob deknaʾ nauba ugunuk eleganesilaʾ anasa, ugunja men ganya goulowoka dib senelumaʾ ara loboka ganya boknaʾ ara mem.

³⁶ Ugunda Imik Neyung adya unuwanok senelamlaʾ anyek pe unulumunaʾ adya, pe ulumeijaʾ amba deknaʾ dobnemak hyokaʾ ara dib dobnelum aboka, ganya siklewoka pe ulululum.

³⁷ Ban nenesa leboka, Imik Neyung yuba bukuk sam ara, ”Eimik hyak berra yanamla salek era, or mek ok ubla; al yanamlaʾ ara, nara sum enyek, or eimik ek yanamnaʾ aboka, goʾ mabdabnenggunumla.

³⁸ Nadya me pelelanya bera, nak dib senewoka ganya oloknaʾ senenadyok pe ulumnamla bok, hnon nim era dib senenijedyok, losaawanamak nim era, dara nara sikenek lek senewanasin,” aro momnya dobok.

³⁹ Bok nuk dara, Imik Neyung pika banaʾ beibum aboka losaawanamab nim ek unggulumab. Alda nunda Imik Neyung ak dib senemoubaʾ anasa blebsuk nim ek ulumab.