IBRANI 1 - PERJANJIAN BARU NALCA YUBA

Imik Neyung Ara Yesus Pik Uboka Yuba Salamla Yuba

¹ Hyak youmaʾ dara, Imik Neyung ara yuba sabnamna dara, nunjaʾ neyung yab ek li gong-gong ununumnaʾ lelemek nang pik uboka yokaʾ-yokaʾ adya sunuwoka yuba salamok.

² Bok wen sidyaʾ dagalongnaʾ salek en era, alja me pik uboka yuba sal eleklesil. Imik Neyung adya alja me Yesus pik uboka hyak nidyaʾ men uyimok. Anya onoʾ Imik Neyung adya alja me pik uboka uyimok.

³ Imik Neyung adyaʾ hyak imik senenggom dilinaʾ era, me al nong ulumla. Imik Neyung nonga laga unaʾ dibaʾ ara, Yesus adya unaʾ pik an ulumla. Wera sokok sam ab imik sam hnon nidyaʾ ulumlaʾ amba dara, alda migib yub adya akwaʾ doboka bo ulumla. Yesus ara soko nim emba malya unaʾ ak ab seleb perobaʾ nenebgogowok dara, Imik Neyung hyak imik ululanya beb neikaʾ imik heikek sam nimi wenewoka bo usin ekla bunaʾ ak sam bukok.

⁴ Wera, lero nang ek silisil si nera mek so bok, Imik Neyung adya Yesus ak sib elegok si nera hyak senenggom si nek sibuk. Dara neik so, lero nanga nidyaʾ ara sokok so nenewoka, alja me Yesus anyek hyak senenggom dubnya nenemok.

Yesus Adya Si Imik Nenewok Yuba

⁵ Imik Neyung adya dara, lero nanga ben hnonok sibin ak anaba, ”Anda nadya me ululam, nak dara sumen anjaʾ neyung be dagen,” an dara, hyak mekaʾ hnon wenyhenggumok. Dara onoʾ Imik Neyung adyaʾ anaba, ”Nara aljaʾ neyung be danamna dara, alda nadya me danamla,” anaʾ ara wenyhenggumok.

⁶ Dara Imik Neyung adya aljaʾ yando me sokok an bokol yanggok sum enyek, Imik Neyung adyaʾ, ”Nidyaʾ Imik Neyung lero nang gong dara, nadya me nek giblemnemak,” hyok.

⁷ Alda lero nang emba dara, Imik Neyung adya, ”Lero nang era, kaboʾ doroklamlaʾ anaso nenelesil, aljaʾ aran nim era, uk bokaʾ yakaʾ dilinaʾ anaso ganya nenelesil,” hyok.

⁸ Bok alja me nemba dara, Imik Neyung adya dara, ”Wei Imik Neyung o, an bululam oulyang era sobaʾ ulmorulumnamla! Anja wenewoka bo ulumnesilimaʾ ara, hyak perob jong unaʾ enyek lelewoka wenelemnesilim e.

⁹ Bleknaʾ hwam unaʾ ara lek senen ganya boboka perob jong unaʾ wanaʾ nong ululamaʾ anasa, Imik Neyung adya, anjaʾ neyung Imik Neyung adya dara, anjaʾ hemyab era mek so bok, anak weboka dobjookanya, ei-ei ganya bonaʾ anyek anak nauba elegajok,” hyok.

¹⁰ Dara onoʾ Imik Neyung adya hnon lebokaʾ ara, ”Wei, Wenelesilimnya o, men dara, soko nidyaʾ ara anja uyiwoka, onoʾ im anaba ambeyok uyiwoulum.

¹¹ Yokaʾ-yokaʾ nidyaʾ ara ongon boksom anasoʾ ak gweldekoka denghenemla bok anak dara, mekaʾ denghenggunulam.

¹² Im ab soko ab dara, anja boksom anasoʾ anyek dob salawoka guksuwoka winiwoka, onoʾ yoknya lunuwoka beibnelam. Bok an nong ak dara, yok nonga lununaʾ loboka, anja embeng unaʾ ara, gobdo mekaʾ sidyaʾ dakoka denghenggunumla,” hyok.

¹³ Ban nidyaʾ alja me nek lemok bok, Imik Neyung adya dara, yok lero ek ara, ”Anda nadya sirik soruk ak sam buknelam dara, anjaʾ isaʾ nang era anja yan damak beil yanamna dara, anja yan doroknaʾ gebnalam,” anaʾ ara hnon wenyhenggumok.

¹⁴ Wera anaso dara, lero nang era, dib nongaʾ ara hek nang ek ulumak do? Lero nang ek dara, sikda Imik Neyung bedya wa welemak nang ek uboka, nim Imik Neyung adya blebnamla nim ek ganya arasinaʾ amba ulumak nang ek ulumak.