GALATIA 3 - PERJANJIAN BARU NALCA YUBA

Dib Senenaʾ Adya Perobaʾ Nenelesil Yuba

¹ Galatia nim o, ugunda dongdang anaʾ hwam nim ek ululum! Ugun din hengek Yesus Kristus gal dubuk oboka glamekaʾ ara, ugunuk laga neksisa bok anasa, hek nang edya geregoka bobneneweisik do?

² Nara ugunuk ab hnonok ella danamnaʾ ara, ugunda Geisinya dolumaʾ ara, unuwanalum an yub unululumaʾ adya gom, alda Kristus yub ak dib senelumaʾ adya dolum gom?

³ Ugunda neik digum dongdang alalum de? Ugunda Imik Neyung Geisinya adya unub einilumjok, onoʾ saawoka youmaʾ nong unaʾ pik uboka perob danobaʾ aboka unubdaknalum de?

⁴ Ugunuk yokaʾ-yokaʾ nauba igina kwelesukaʾ ara, salyaʾ lelem ub lobsuk de? Aldib, salyaʾ lelem ub lobsuk de?

⁵ Imik Neyung ara alja Geisinya ugunuk elegoka, aljaʾ yokaʾ lok soʾ migib ununaʾ senenggomaʾ ara ugun gangganek unulusil. Ban unulusilaʾ ara unuwanalum an yub ek pe unululumaʾ adya unulusil gom, Kristus amba yub enyek ugunda keboka dib senelumaʾ adya unulusil gom?

⁶ An unuwokaʾ ara Abraham bek umokaʾ Imik Neyung yuba bukuk ara, ”Abraham bera Imik Neyung ak dib senewok dara, alja dib senemokaʾ anadya, Imik Neyung adya dara, perobaʾ nenewok.”

⁷ Anasa ugunda ella uboka pe beknelumaʾ ara, nimi Kristus ak dib senewoka ulumak nim era, sikda nidyaʾ ara Abraham bedya mab ulumak.

⁸ Imik Neyung yuba momnya dobokaʾ adya dara, nimi Yahudi gom nim era sikda Imik Neyung ak dib senewanamak dara, ban adya perobaʾ nenewanasilaʾ ara, orowek ella ulumookanya, wera ban perob lero yanggan yub era men danyek Abraham bek, ”Imik Neyung ara an pik uboka, mok soko me nidyaʾ ara perobaʾ nenewanamla,” hyok.

⁹ Nim Imik Neyung ak dib senewoka ulumak nang era, Abraham bek dib senemokaʾ adya perobaʾ nenewoka elegemok eleknaʾ enyek, neikaʾ hiboka dolomak.

¹⁰ Nimi nidyaʾ unuwanalum an yub ek sunuwoka unulumak nim era, seleb weil malyaʾ gloksukaʾ ak ulumak. Imik Neyung yuba bukuk ara, ”Wera hyak nidyaʾ unuwanalum an yub ek momnya dobokaʾ ununggulumak nimi nidyaʾ ara, Imik Neyung adya seleb weil malyaʾ gloksuk,” alamla.

¹¹ Momnya dobokaʾ ara, ”Nim ara perobaʾ dibaʾ nenewoka ulumnamak nim ara, dib senenaʾ adya ulumnamak,” alamlaʾ anasa, unuwanalum an yuba momnya dobokaʾ unulumakaʾ adya dara, Imik Neyung hogung ak perobaʾ nenenggulusil.

¹² Bok unuwanalum an yuba damok ara dib senenaʾ ak unggulumla, alda anyek unulumak nim era, an unulumnamakaʾ adya ok ulumnemak.

¹³ Imik Neyung yub ek ara, ”Gal ikoka oboka dibeknya bera, weil malyaʾ glokeknya bek ulumla,” aro momnya dobok. Bok wenyek dara, Kristus adya nunsamba weil malyaʾ glokeknya dangasukaʾ adya, nunda unuwanalum an yub ek ab weil malyaʾ gloksukaʾ ak ab, hweboka blebsuk.

¹⁴ Kristus adya hweboka blebsuknya nera, anadya wera Imik Neyung adya Abraham bek an perobaʾ eleganenggen amoknya nera, nimi Yahudi gom nimi hnon Kristus Yesus pik uboka, dobnokaʾ aboka ubsuk. Wera anadya hnon, nu Yahudi gom nimi bok, Imik Neyung adya eleganesin amok Geisinya era dib senenaʾ adya dobnokaʾ aboka ubsuk.

Unuwanalum An Yuba Gom, Imik Neyung Eleknaʾ Gom Yuba

¹⁵ Nadya hemyabo nim o, nara nunja sob unulumabnya nenyek sunuwoka lebnesin. Nimi hnon nunda anaso dib unuwanamab aboka seleb yuba sabgogoseng bok dara, wenyasengaʾ ak ara, nimi be hnonjok lobnemab henggunumso, onoʾ aljok yoknya hnon bo maknenggunumso.

¹⁶ Imik Neyung adya perobaʾ unuwanasin aboka orowek lebgogomokaʾ ara, Abraham bemba hnon dara, onoʾ hnonda Abraham nang yilaʾ amba hnon lemok. Imik Neyung yub ek ara, ”Abraham nang yilaʾ amba” lemoknya nera, nimi nauba amba henggubuk. Alda, ”An nang yilaʾ amba” hyok aro momnya dobokaʾ ara, nimi ben hnonok Kristus amba lebok.

¹⁷ Nadya wen ugunuk an wenyalasinaʾ ara banyek, Imik Neyung adya unubdanamab amokaʾ ara hyak youmaʾ nonga wenyek lemok. Alda unuwanalum an yub ek dara, eimik gibnaʾ ara empat ratus tiga puluh gibnaʾ lemok bok elegousuk. Anasa, ban eimik unuwanalum an yub edya dara, men Imik Neyung adya perobaʾ eleganesin amokaʾ ak ara, orok aboka lubnenggunumso.

¹⁸ Imik Neyung adya Abraham be nong ok perobaʾ eleganesin amokaʾ nong ara, wera Abraham bek wanaʾ uboka elegok. Anasa, Imik Neyung adya perobaʾ eleganesin amokaʾ anyek, unuwanalum an yub unulumak adya dobneseng dara, wera nera Imik Neyung adya perobaʾ eleganesin amoknya nera lemok adya ok dobnenggunuseng.

¹⁹ Wera anaso ulumla dara, unuwanalum an yub era hekasa elegesuk do? Ban unuwanalum an yub era, nimi bleknaʾ hwam anasa, seʾ elegosuk. Hnoumunga wiknenanya hnonok pik uboka lero nang edya elegeisik. Unuwanalum an yub era, gigiwoka unulamlyaʾ ara, Abraham bek eleganenggen amoknya benyek yalya dara, wera unuwanalum an yub ek lobongganamak.

²⁰ Wera anasa, nimi penya dara-dara ubna danyek, hnoumunga wiknenanya bera ulumla. Bok Imik Neyung ara hnonok ok ulumla anasa, alja ganya doboka yokaʾ-yokaʾ unulamla ara, yok nanga be hnon hnoumunga wiknenya danggunumso.

²¹ Wera anaso anasa, Imik Neyung adya eleganesin amokaʾ ara, yok so bok, unuwanalum an yub era, onoʾ yok so adya ol gokoldalarak de? Nera hyak unggulumla! Unuwanalum an yub era, nim embeng unaʾ elegesuso dara, unuwanalum an yuba pik uboka, nim Imik Neyung hogung ak pewalam anaʾ dibaʾ danamso.

²² Bok, Imik Neyung yuba momnya dobokaʾ adya eleganesin amokaʾ ara, sikja Yesus Kristus ak dib senelemak nim ek elegosululaʾ aboka, Imik Neyung yub adya, nimi nidyaʾ ara, malya unaʾ lomok gobdo ulumak aboka, deneblebsuk.

²³ Nunda Kristus ak dib senewanamoubaʾ amba liga yenewanggumok salek era, nunda unuwanalum an yub edya lekaʾ doboka bo ulusuk bok, eimik era dib senenaʾ ara laga dok.

²⁴ Nunda Kristus ak dib senenaʾ adya, perobaʾ nenewousululaʾ aboka, unuwanalum an yub edya pika yarawoka Kristus ak bo balasil.

²⁵ Bok wenera, nunda Kristus ak seleb dib senelemab dara, wera unuwanalum an yub edya dara, nuk anam beiliwoka bo unggulusil.

²⁶ Ugunda Kristus Yesus ak dib senelumaʾ adya, wera ugunda nidyaʾ Imik Neyung mabo dibaʾ ululum.

²⁷ Ugunuk ara Kristus lomok meka dasuk nimi nidyaʾ ara, ugunda Kristus alja unun ganya boboka ululum.

²⁸ Ugunda nidyaʾ Yesus Kristus lomok hnonok dangoka ululumaʾ anasa, Yahudi nimi gom, Yahudi gom nimi gom, nimi sikbeyok dangoka ulumak nang gom, oruknaʾ nang gom, gelewa gom, nengmabo gom ara, webnaʾ orokaʾ ak ululum.

²⁹ Dara, ugunda Kristus alja mab ulumun dara, Abraham nang yilaʾ dangoka ululum. Anasa, ugunda Imik Neyung adya Abraham bek eleganesin amokaʾ ak dobnelum nang ek ululum.