EPESUS 5 - PERJANJIAN BARU NALCA YUBA

Dilinaʾ Mab Ulumab Yuba

¹ Ugunda Imik Neyung adya wanaʾ ulusil mab ek ululumaʾ anasa, Imik Neyung adya unulamla ununaʾ enyek, diliwoka numba anaso ulunob senen ganya bolomnemun nim ek ulululum.

² Kristus nonga somogokaʾ ara so meklaʾ song anasoʾ ak, Imik Neyung ganya hek elegoka, al nong ara nusamba beibdangoka somogosuk sok, ugunda wanaʾ ganya boboka unura yabalelulum.

³ Ugun nong ak dara, munaʾ Imik Neyung mab ululumaʾ anasa, nimi yok nim edya ugunuk sikba malya ulumak henesijaʾ damoka giliwoka beibdoumunuk anasa, hmabaʾ ganya hnon, yok-yok malya unaʾ emba youmburaʾ debnaʾ hnon, gela salyaʾ salawoka, anaso malya ura yabanaʾ hnon ara, ugun gangganek sam ara mekaʾ unggulumnamla.

⁴ Anya onoʾ ugunuk dara, Imik Neyung mab unuwanggunuseng anasa, nimi ganya malya nenelesil yub eb, salyaʾ dolbalek yub eb, gela salanaʾ yuba, yok-yok kenaʾ perob danggunumso yub eb dara, mekaʾ sanggulumnulum. Alda ugunuk dara, Imik Neyung ak anyek sobaʾ perob aboka gibelmorulumnulum.

⁵ Ugunda ban nong anyek pe beknelumaʾ ara, Nimi gela salyaʾ salalamak nang eb, malya unaʾ hwam ok ulumak nang eb, hman ganya bonaʾ ara, bisaʾ gibnaʾ anaso dangalamlaʾ anasa, ganya en bolomak nim eb dara Kristus ab Imik Neyung ab dadya wenewoka bo ulusirik sokok nimi mekaʾ danggunumak.

⁶ Ban damok danasa, nauba bleklemak nim ek Imik Neyung adya yu ganya boboka igina eleklesilaʾ anasa, ugunuk yok nim edya salyaʾ yuba saboka gliboka bo bisijek.

⁷ Anasa ugun nong ara, anaso nang eb neikaʾ yuba saboka unaʾ ara hyak mem.

⁸ Ugunda men dara, gunaʾ lomok ululum bok, wera Imik Neyung mabo dangalum dara, dilinaʾ dangalum. Anasa wera, dilinaʾ lomok sam uru yabalemnalum.

⁹ Anasa Imik Neyung dilinaʾ ak ab lanalamlaʾ ara, perob ganya bonaʾ ab nimi yok nim ek pe ununaʾ ab, yok-yok dib yub era lanalamla.

¹⁰ Imik Neyung ganya adya anara perobaʾ ak unulumak senen ganya bobnamlyaʾ anyek duboka elemnelum.

¹¹ Nimi gunaʾ lomok sam anam ulumak nim edya ulumak sok, perob gomaʾ dib gomnya salyaʾ neikso unura yabanaʾ ara mem. Alda ugunja dara, sikja meknewoka unulumaknya nenyek, nim eibnokaʾ aboka laga nenelelulum.

¹² Anasa malya ulumak nim edya doknowoka unulumak ununaʾ enyek, yok nim edya laga doboka yuba san dara, nauba alya dangalasil.

¹³ Dilinaʾ yakaʾ adya, yokaʾ-yokaʾ nidyaʾ ara, laga dangallilimlaʾ anasa, yokaʾ-yokaʾ nidyaʾ dilinaʾ ak amal yalamlaʾ digumaʾ ara, gobdo lak nonga dangalamla.

¹⁴ Nenesa leboka yuba hnon ulumlaʾ ara, ”Anda hogunga malalamnya bera buklom, nimi somoknaʾ ak ab goboka buklom. Dara an nong ak Kristus adya dilinaʾ era, yebdo yibinenggel,” hyok.

¹⁵ Wera anasa, ugunja nong unaʾ era pelemab gom, orok gom aboka pe diri uldalalulum. Nimi dongdang alamak nim edya unaʾ loboka, alda geremseng nimi ganya boboka ulululum.

¹⁶ wera, ugunda malya dangalamla salek ek ululumaʾ anasa, ugunuk an pe un salek ulumlaʾ ak ara, pe salawoka unulululum.

¹⁷ Ugunda dongdang anaʾ ara loboka, alda Imik Neyung adya unuwaneseng senelamlaʾ anyek pe seiniwoka ella dolulum.

¹⁸ Nimi ganya uu aboka serema salalesil mek era nauba den dara, nimi malya nenewoka soldelesilaʾ anasa, mek era ganya uu hesilyek aboka denggom, mem. Bok, ugunja ganya era, Imik Neyung Geisinya adya ok deknewoka bo ulusulul.

¹⁹ Alda ugun yuba saldalamunaʾ ak ara, Mazmur bera hnon, Imik Neyung ak gibna bera hnon, yok-yok Imik Neyung bera hnon, seblemnelum. Anya, ugun ganya lomok anaba, Wenelesilnya bemba seblemnelum.

²⁰ Or yok-yok damoka nidyaʾ ulumlaʾ amba leboka, nunjaʾ Wenelesilnya Yesus Kristus anasa leboka, neyung Imik Neyung ak hyak sobaʾ perob aboka giblelulum.

Kristus Adya Wanaʾ Unaʾ Era Gel Ab Nenya Ab Dadya Damok Yuba

²¹ Ugunda Kristus ak lok ganya boboka, ugun moumen anaba ganya sokok nenebdangoka pe keldalalulum.

²² Ugunda gelewa ak dara, Wenelesilnya bek ulumab sok, ganya sokok nenebdangoka, ugunja nenyab edya yuba pe kelelulum.

²³ Kristus ara yuba donaʾ nim edya sikjaʾ dubnya uboka, onoʾ sik yuba doboka alja nonga dangalamak nim emba blebsinaʾ dubnya ulusil sok, nenya ara alja gel emba dubnya ulumla.

²⁴ Nimi yuba donaʾ nim edya Kristus ak nunjaʾ neyung dubnya senewoka kelemak sok, yokaʾ-yokaʾ ununaʾ ak anaba gel ara nenya ak, nadyaʾ dubnya senewoka alja yuba pe kelelul.

²⁵ Kristus adya alja yuba donaʾ nim emba leboka, wanaʾ uboka al nonga siksamba elegousuk sok, ugun nenyab ara, ugunja gelewa ek anaso pe wanaʾ ulululum.

²⁶ Kristus adya alja yub ab dadya mek elegoka, sik yuba donaʾ nim era alja nong anyek doboka, geisa nenewoununaʾ aboka, al nong elegousuk.

²⁷ Wera anadya, nim alja yuba donaʾ nim era, menengaʾ meiboka, si gegena ponaʾ orokaʾ anyek, geisa ganya boboka, si imik dangoka ulumnemaakanya, eimik era alja saramek doro beibsununaʾ aboka, Kristus al nonga siksamba doboka elekdangoka somogousuk.

²⁸ Anasonya neikek, nenya ara, sikjaʾ meneng nong ok wanaʾ uldalamak sok, onoʾ sikja gelewa ek or nauba wanaʾ ulunok. Heknedya alaʾ gel ak wanaʾ ulumlaʾ dara, al nonga wanaʾ uldalamla.

²⁹ Nimi ben hnon aljaʾ meneng nong ek, malyaʾ anyaʾ seneldanggulumla. Bera al nong ak weiboka meebdangoka bo uldalamla sok, alda Kristus adya alja yuba donaʾ nim ek weiboka bo ulusil.

³⁰ Nunda Kristus adya nong ulumabaʾ anasa, unu diri bo ulusil.

³¹ Imik Neyung bukuk sam momnya dobokaʾ ara, ”Anasa wera, nengmab ara, aljaʾ neyunga genong ak lo yibenewoka, alaʾ gel ab neikaʾ hiboka, sik penya dara, hnonok nonga dangoka ulurak,” alamla.

³² An wenyaro momnya dobokaʾ ara, hyak senenggomaʾ doknowoka ulumla damok ek lebok, anyek nadya dara, Kristus ab alja yuba donaʾ nimi sununaʾ ak lemna.

³³ Bok onoʾ Imik Neyung yuba wenyalamlaʾ ara, ugunsamba hnon lelemlaʾ ara ban: Nenya ara al damnya wanaʾ uldalamla sok, alaʾ gel ak wanaʾ ululul; dara onoʾ gel ara alaʾ nenya ak, nadyaʾ dubnya senewoka giblelul.