EPESUS 4 - PERJANJIAN BARU NALCA YUBA

Neik Nong Ulumab Yuba

¹ Ban nenesa leboka, nara Paulus bedya, Imik Neyung amba leboka henga goubnyeknya bedya, ugunuk ara, Ugunja nong unaʾ era, Imik Neyung adya youbuka dobsuk nimi geknewaʾ ulululumaʾ aboka weneweisin.

² Ugunda sobaʾ ganya sokok nenebdangoka, ganya siklewoka namenaʾ ulululum. Ulumunukanya, meknelesakaʾ ak anaba wanaʾ ubdangoka dogom aldalamnelum.

³ Imik Neyung Geisinya adya hnonok nonga nenesuknya nenyek, heknaʾ ganya boboka, sobaʾ neiknya nok maro lololulaʾ aboka, ugunda ganya enyek ok boboka ulunob senewoka duboka unulululum.

⁴ Imik Neyung adyaʾ perobaʾ ak ganya welenokaʾ aboka youbsukaʾ ara hnonok ulumla sok, nong ara hnonok ok ulumla, Geisinya bera hnonok ok ulumla.

⁵ Wenelesilnya bera hnonok ok ulumla. Onoʾ dib senenaʾ ab, mek danaʾ anaba hnonok ok ulumla.

⁶ Neik hnonok Imik Neyung enyek, nimi nidyaʾ sikjaʾ neyung ulumla. Wera Imik Neyung enyek mok soko me nidyaʾ amba dubnya uboka, nidyaʾ ara alja ok wa weboka, alda yokaʾ-yokaʾ nidyaʾ lomok ulumla.

⁷ Bok, nunda nidyaʾ ara, Kristus adya bera anaso wa wen arasinaʾ eleganamna senewokaʾ anyek, sunuwoka eleklesilaʾ ak dolomab.

⁸ Ban nenesa leboka, Imik Neyung yuba bukuk sam ara, ”Alda hyak im nong ok sam welok sum era, henga goubdob nimi nauba bo welewoka, nim ek perob eleknaʾ nauba elegousuk,” aro momnya dobok.

⁹ Wei, alda welewok alamla dara, wera men dara alda hyak soko lom nong ok sam yinggilimokaʾ adya welewokaʾ ak lelemla.

¹⁰ Wera yinggilimoknya benyek, onnya bera ima piboka hyak mok eini welewok dara, anadya ima soko me nidyaʾ ara, alja ulumla migib edya ok oulyanga dangoka deknero lobok.

¹¹ Kristus adyaʾ nim ek elegousukaʾ ara, hnonda yuba lenaʾ gak nang elegousuk, hnonda ununumnaʾ len nang elegousuk, hnon nang era Imik Neyung adya perob lero yanggan yuba len nang elegousuk, hnon nang era yuba nekoka gereja bo un nang elegousuk.

¹² Ban unura elegousukaʾ ara, munaʾ Imik Neyung mab era, welenok aboka elegousuk. Pe welemeijaʾ adya, Kristus adya nonga perobaʾ nenewoka nauba danggiga balalulaʾ aboka elegousuk.

¹³ Wera anadya, nunda nidyaʾ ara neik hnonok dib senenaʾ dolulaʾ aboka hnon, Imik Neyung alja me nek pe ella ulunokaʾ aboka hnon, ganya kabnokaʾ aboka hnon, onoʾ Kristus adya pe ulumlaʾ anasoʾ anyek dangoka nebgiga balanokaʾ aboka hnon, elegousuk.

¹⁴ Anasa, mek mab edya ganya windong-wandong alamak sok, nunda yok-yok damoka neksin yub edya giliwoka bol goknenggulumnesil. Hnon nang era meknewoka bobnenewoka leboka, henga weboka youlosak bok, sikja yuba keboka ununggulumnemab.

¹⁵ Bok onoʾ saawoka, nuk dara, wanaʾ ganya nauba uboka perobnya dib nongnya nenyek ok lelemnemabakanya, nunja dubnya Kristus ulumla ak sam, nidyaʾ ak nebgiga balamnemab.

¹⁶ Dara alak ab, nonga nidyaʾ ara, mel-mela mourumnaʾ gong adya hyak pe meewoka sunuwoka beiri byuk. Wera anedya, nonga digum yok-yok ara, pe wero balamlaʾ adya, wera nong ara wanaʾ unaʾ pik uboka migibaʾ danggiga nero balamla.

Kristus Lomok Sam Wenyok Nong Ulumab Yuba

¹⁷ Anasa wera, ugunda nim Imik Neyung elgom nim edya ulumak sok, ununggom, mem aboka, Imik Neyung si sibuka dukaʾ lolom-lolom aboka lelesin. Imik Neyung elgom nim edya, salyaʾ dib gomnya nok, seiniro ulumaakanya,

¹⁸ sikja ganya era seleb gunaʾ dousuk. Onoʾ sikja ganya era ongibsukaʾ anasa, sikda hyak elgom so uboka, Imik Neyung embengaʾ eleklesilaʾ ak ab loboka, beiyik gebdangoka ulumak.

¹⁹ Sikja unulumak ununaʾ era meknelemab senewoka alya ganya bonaʾ orok adya yok-yok malya unaʾ era, salyaʾ sikja ganya doboka, gela salyaʾ salero yabalamaakanya, yeiriwoka yok-yok malya unaʾ nidyaʾ unura yabalamak.

²⁰ Bok, Kristus ak dolum ara, hyak anaso ununaʾ ella dangoka dobnenggulum.

²¹ Ugunda aldib alja yuba kelumukanya, al lomok ara dib yub ok ulumlaʾ sunuwoka nekesik dara, anasoʾ ununaʾ ella dangoka dobnenggulum.

²² Wera youmaʾ nong unaʾ eb, youmaʾ ganya eb dara, wen alja malya unaʾ hwam ok unulunun ganya adya seleb malya dangalamlaʾ anasa, gwiriwoka lobnobaʾ aboka doblum.

²³ Ugunja ganya eb, anyek unuwanamna senen ganya wenyoknya perobnya nok bobnobaʾ aboka doblum.

²⁴ Anya, wenyok uldilisil nong unaʾ era, Imik Neyung ara hyak perob ok uboka, geisa ulumla sok ulumla nong unaʾ enyek, anasoʾ anyek unura ulunobaʾ aboka doblum.

²⁵ Anasa ugunda nidyaʾ ara sonda leldanaʾ ara hyak mem. Nunda nidyaʾ ara Kristus alja hnonok nong ak ulumab bok anasa, gunun ganya bonaʾ loboka, dib yub ok saldalamnelum.

²⁶ Ugunda yu ganya bobmun dara, yu ganya enedya, ugunuk malya unaʾ deisilyek anasa, yu ganya bomunaʾ meewanggom bok, henga wekel banaʾ ara mem.

²⁷ Anya Iblis adya ugunja ganya lomok wekoka websilyek aboka, pika mourunggom.

²⁸ Nimi hokaʾ dololenya bera, hoga donaʾ ara wera loblul. Alda bera alja yokaʾ nong ok anyeb, bonaʾ garan ulumak nim ek elegousululaʾ aboka, alja soruk yokaʾ edya perob wa welelul.

²⁹ Ugunda yuba sabnemun dara, malya yub enyek geregoka salyaʾ sanaʾ ara mem. Nimi perob yuba ok salamakaʾ adya, nimi kelemak nim era, perobaʾ dousululaʾ aboka, nimi keboka perob danamlya yub ok sunuwoka saldalalulum.

³⁰ Imik Neyung adya blebnesil sum emba, Geisinya bedya seleb ouma debsukaʾ anasa, Imik Neyung Geisinya bek ganya sugul eleknaʾ ara mem.

³¹ Malya ganya bobdangoka, nidyaʾ yu ganya ab gogobaʾ ganya boldanaʾ ara mem. Ugunda senenggomaʾ iriri aboka derewoka waldanaʾ ara mem. Benewa malya seneldanaʾ gom, anaso yok malya ganya boldanaʾ era hyak loblulum.

³² Alda ugunda perob ganya bobdangoka, nimi nidyaʾ ugun moumen wanaʾ uldalalulum. Hnonda Imik Neyung adya Kristus pik uboka, ugunja malya unaʾ doro bobogousuk sok, ugun moumen malya unaʾ doro bologoldalalulum.