EPESUS 2 - PERJANJIAN BARU NALCA YUBA

Nidyaʾ Ara Perob Eleksinaʾ Adya Ok Dangalamla Yuba

¹ Ugunda youmaʾ dara, ugunja meknenaʾ malya unaʾ lomok ululumaʾ adya, ganya ak dara, seleb somogolum bok ululum.

² Ugunda youmaʾ era, ban malya unaʾ pik balalum. Ugunda sokok an unulumak ununaʾ ok unura ululumaʾ hnon, anya ugunda im hnoumunga salawoka bo ulumla bisaʾ dubnya bedya yub enyek, dib senewoka ganya kweboka ululumaʾ hnon. Al bisaʾ dubnya bera, Imik Neyung ak dib bleklemak nang edyaʾ ganya lomok wekoka malya nenelesilnya bera an.

³ Nunda nidyaʾ anaba, youmaʾ dara, bleklemak nimi gangganek uboka, malya unaʾ hwam ok uboka, nunja ganya adya hnon, nong adya unuwonun senemnaʾ ok perob daso senewoka nenyek ok unulumouba. Dara, ban unulumoubaʾ adya, nunda yok nim ulumek sok, Imik Neyung adya yu ganya boboka obnesusoʾ ak sam ulumouba.

⁴ Bok Imik Neyung ara, alda angoo yadyek senewoka arasinaʾ hwamnya bedya, nuk hyak wanaʾ nauba ulusukaʾ anasa,

⁵ wera nunda meknelemouba salek era, ganya ara seleb somogouba ak sam anam ulumouba bok, Imik Neyung adya nub Kristus ab neikaʾ embengaʾ suboka bukiyiwosuk. Dara, Imik Neyung ganya anyek hyak perob nong adya ok, alja wanaʾ uboka eleksinaʾ adya ugun nong ara seleb blebsuk.

⁶ Dara, Imik Neyung adya, nub Kristus anya, somoknaʾ ak ab embengaʾ nenewoka suboka bukiyiwousuukanya, Kristus Yesus lomok imik heikek sam neikaʾ beibsuk.

⁷ Ban unuwosuknya nera, eimik enyek, Imik Neyung ara alja wanaʾ uboka eleksinaʾ ara hyak senenggomaʾ ulumla beknaʾ eibnokaʾ aboka ubsuk. Alda Kristus Yesus pik uboka nuk wanaʾ ubsukaʾ ak eibnokaʾ aboka ubsuk.

^8-9 Imik Neyung ara ugunuk wanaʾ uboka eleksinaʾ anasa leboka, ugunda Yesus ak dib senewoka doblumaʾ adya, ugunuk dib blebsuk. An blebsukaʾ ara, ugunja ununaʾ edya dobnenggublum. Anara Imik Neyung adya ok elek loboka blebsuk. Anaso ubsuk bok dara, nimi hnon ara nabeyok dobsa aboka nonggo henggunumso.

¹⁰ Nu nong ak dara, Imik Neyung adya uyiwousukaʾ ara, Yesus Kristus pik uboka nu meewoka, alja orowek yokaʾ-yokaʾ perobnya nenyek unulumnemak senewoka gegewoka beibsuk nim ek ulumab.

Kristus Pik Uboka Hnonok Nong Ulumab Yuba

¹¹ Ugun Yahudi gom nim era, ugun nong ara, ”bolaʾ garawanggom nang” anaʾ ara, nim adya bolaʾ garalesikaʾ Yahudi nang edya dara, ugunuk wenyalasak. Dara, Yahudi gom nim o, anyek seiniwanalum. Nera nim adya ganya doboka nang era an wenyan beknaʾ beillilesik.

¹² Youmaʾ dara, ugunda Kristus ab neikaʾ ganya kweldanaʾ orok nim, ugunda Imik Neyung adya weboka dobnenggusuk nim, beiyik nim ululum. Ugun Imik Neyung adya wanaʾ uboka perobaʾ eleganesin henggusuk nim ek ululum. Ugunda Israeli soko enyek anara, perobaʾ anyek dobnemab nimi senenaʾ orokaʾ ak uboka, Imik Neyung ugunjaʾ ganya lomok unaʾ orok nim ek ululumaʾ anyek seiniwanalum.

¹³ ”Ugunda youmaʾ dara, mok ululum bok, wenyek dara, Kristus Yesus ab neikaʾ kwebdangoka ululumaʾ ara, Kristus eneng adya oka doro dil yousuk.”

¹⁴ Kristus ara alda ganya mourusinaʾanya ulumla. Wera alja Yahudi nang eb Yahudi gom nang eb, hnonok heik sokok nang nenewosuknya bek ulumla. Yahudi nang eb Yahudi gom nang eb isaʾ nenebdangoka wiknewoka bokoldalamek legaʾ era, Kristus gal dubuk somogokaʾ adya seleb joboka soldob menegoka hiyiwousuk.

¹⁵ Yahudi nim edyaʾ unuwanalum an yub eb alja anaso unulumnulum yuba nidyaʾ ara, Kristus alja nong elegokaʾ adya lubok. Dara, alda Yahudi nim eb Yahudi gom nim eb danyek, al lomok hnonok wenyok nimi nonga neniyiwoka ganya namenaʾ gebsuk.

¹⁶ Dara, Kristus gal dubuk somogokaʾ adya, isaʾ ganya neneldalareknya nera denghyok. Onoʾ Yahudi nim eb Yahudi gom nim eb hnonok nonga nenewosuk dara, sik penya dara, Kristus somogokaʾ adya Imik Neyung ak sam hibsuukanya, isaʾ ganya neneldalarekanya nera denghyok.

¹⁷ Ban nenesa leboka, ugunda Imik Neyung al ara mok geboka ululum Yahudi gom nim ek hnon, Imik Neyung berem ulumak Yahudi nim ek hnon, Kristus adya perob lero yanggan heknaʾ yub era, ugunuk lel elegel yousuk.”

¹⁸ Wera Kristus pik moruwoka, Yahudi nimi yokaʾ gom, Yahudi gom nimi gom, nunda nidyaʾ ara hnonok neik Imik Neyung Geisinya edya pik uboka, Imik Neyung ak sam ban pik era seleb eiyiwoka balamab.

¹⁹ Anasa wera, ugunda sekel yanggan nim uboka beiyik nim anam unggululum. Alda ugunda nidyaʾ ara, wera yok munaʾ Imik Neyung mab eb Imik Neyung adya heik yokaʾ nimi dangoka, onoʾ Imik Neyung alja mabo silibaʾ ululum.

²⁰ Wera Yesus Kristus ara men ikimok egomnaʾ uboka, yuba lenaʾ gak nang eb, ununumnaʾ lelemek nang edya ikimek egomnaʾ ak, ugunda anyagan makoka sobsuk.

²¹ Wera Kristus nong pik ab moruwoka, ugunja nong era Imik Neyung alja denewoka solosilikanya, Wenelesilnya Imik Neyung amba ok munaʾ gobdo un e dangalamla.

²² Ugunda Kristus ab seleb neikaʾ kwebdangalumaʾ adya, ugunuk onoʾ nimi yok nim eb, Imik Neyung alja un e nenewoka, Imik Neyung ara aljaʾ Geisinya pik uboka, ugun lomok seleb ulusil.