EPESUS 1 - PERJANJIAN BARU NALCA YUBA

Men Gibsuk Yuba

¹ Ugunda Epesus heikek munaʾ Imik Neyung mabo Kristus Yesus ak doboka bojam ululum nim ek perob aboka gibsin. Imik Neyung ganya adyok seiniwoka, Kristus Yesus adya yuba lenaʾ gaknya nenewanyoknya, nara Paulus bedya,

² nunjaʾ neyung Imik Neyung adya Wenelesilnya Yesus Kristus adya wanaʾ uboka eleksinaʾ ab ganya hekel eleksinaʾ ab, ugunuk eleklesulul senelamna.

Kristus Adya Ganya Ek Eleknaʾ Dolomab Yuba

³ Wei, nunjaʾ Wenelesilnya Yesus Kristus aljaʾ neyung Imik Neyung ak sobaʾ perob aboka giblenob e! Nunda Kristus ab neikaʾ kwebdoubaʾ adya, Imik Neyung adya, imik heikek digumaʾ ganya eleknaʾ perobaʾ nidyaʾ ganya doboka elegousuknya bek giblenob.

⁴ Imik Neyung ara soko yokaʾ-yokaʾ anam ulinaʾ orok bok, si gegena ponaʾ orokaʾ anyek alsamba ok munaʾ gobdo ulunokaʾ aboka, Kristus pik uboka weboka dobsuk. Nuk wanaʾ ulusuukanya,

⁵ anadya nu nong anyek, Yesus Kristus pik uboka hyak men youmaʾ enyek orowek weboka doboka, alja mabo yokaʾ gebsuk. Wera alja men danyek perob senewoka unuwanamna senemokaʾ ara an unuwousuk.

⁶ Aljaʾ wanaʾ nong ulumok me Kristus pik uboka, nuk aljaʾ senenggomaʾ wanaʾ uboka elegousukaʾ anasa, Imik Neyung imik ululanya bek giblenob.

⁷ Kristus alja enenga yinggyukaʾ adya, nu nong ara Imik Neyung adya seleb dekoka lob lobsuk. Dara anadya, Imik Neyung ara nunja meknenaʾ dara, seleb meewousuk. Aljaʾ senenggom wanaʾ uboka eleksinaʾ sunuwoka,

⁸ nuk hyak gokoka elegousuk. Dara, Imik Neyung ara hyak geremseng unaʾ ab, pe ganya seininaʾ adya ok,

⁹ alda soko nang blebnamna senemokaʾ doknomokaʾ ara, alja men ganya doboka Kristus pik uboka, wen nuk laga nenewok.

¹⁰ Unu seinimokaʾ ara, yokaʾ-yokaʾ wen ulumlaʾ nidyaʾ sidyaʾ daknamla salek enyek, Imik Neyung adya dara, imik ulumlaʾ sokok ulumlaʾ, nidyaʾ hnonokaʾ ak nenewoka Kristus anyek dubnya ulumnamla aboka orowek seinimok.

¹¹ Imik Neyung ara yok-yok wa nidyaʾ welemlaʾ ara, unuwanamna wenyananya nok sunuwoka unulamla. Dara wera, Imik Neyung adya, hyak youmaʾ nong enyek nuk orowek weboka dobsuk. Anadya, Kristus pik uboka nunda Imik Neyung misaʾ seleb domouba.

¹² Nunda Kristus ak men dib senewoka, ganya weboka ulumab nim era, Imik Neyung adya hyak senenggomaʾ lok soʾ unuwousuknya nenesa leboka, anya alja gibeldonaʾ danokaʾ aboka weboka dobsuk.

¹³ Imik Neyung adyaʾ perob lero yanggan yub ugunuk blebsululaʾ aboka leb elegeisik yuba kel yabalum sum enyek, ugumbabya Kristus ab neikaʾ kwebdangoka un nimi dangalum. Dara, seleb dib senelum dara, Imik Neyung adya anasa leboka, alja eleganesin amok Geisinya era, alja mabo dangalamak beknaʾ dibaʾ ugunuk seleb elegousuk.

¹⁴ Imik Neyung adya alja mab ek eleganasin amokaʾ dib dobnemak senen beknaʾ dibaʾ ara ban Geisinya lomok ulusilaʾ adya ulusil. Alda beknaʾ ulmorulusilaʾ ara, eimik Imik Neyung adya munaʾ dekoka dobsuk. Ban nenesa, Imik Neyung bek giblenob.

Paulus Bedya Heng Uboka Molowosuk Yuba

¹⁵ Wera anasa, ugunda Wenelesilnya Yesus ak dib senewoka domeekanya, onoʾ nimi nidyaʾ munaʾ Imik Neyung mab ulumak nim ek wanaʾ ulumak an yuba kebsisa dara,

¹⁶ ugunsamba leboka, nara Imik Neyung ak sobaʾ gibelmorulamna. Dara, heng uboka Imik Neyung ak gibel yaben salek era, ugunja si sibuka mololesin.

¹⁷ Hyak senenggomaʾ imik ululanya Imik Neyung ara, nunjaʾ Wenelesilnya Yesus Kristus aljaʾ Imik Neyung bedya, ugunuk yokaʾ-yokaʾ elegosululaʾ aboka mololesin. Imik Neyung ak olowoka pe ella dolulumaʾ aboka, geremseng un ganya hnon, ella dangan ganya hnon, ugunuk elegousululaʾ aboka mololesin.

¹⁸ Ugunja ganya dilinaʾ ubsilyikanya, Imik Neyung adya ugun youbsuk nang ek perobaʾ dobnemunaʾ anyek, pe ella dololumaʾ aboka mololesin. Imik Neyung adya alja munaʾ Imik Neyung mab amba perob eleknaʾ nauba beillilesilaʾ alja si imik nenenaʾ anyek ella dololumaʾ aboka mololesin.

¹⁹ Hnonda onoʾ Imik Neyung adya nunda dib senelemab nang emba leboka migibaʾ hyak yok so ulusilaʾ anyek, ella dololumaʾ aboka mololesin. Imik Neyung migib ak dara, hyak senenggomaʾ lok so migib edya unuwoka,

²⁰ Kristus nonga nimi somoknaʾ lomok ab embengaʾ suboka bukiyiwookanya, Kristus ara, Imik Neyung ab neikaʾ ulumnerak aboka beibuk. Dara ban migib enyek, nunsamba ulusil migib era anasoʾ ak ulusilaʾ anyek ella dololumaʾ aboka mololesin.

²¹ Wenewoka bo usinaʾ gom, senenggom dub unaʾ gom, yok-yok migibaʾ gom, wenewoka oruksinaʾ gom, nidyaʾ yok-yok si sinaʾ dub unaʾ gom, wene salek gom, eimik yanamla salek gom, nidyaʾ migib era mek bok, Kristus ak Imik Neyung adya elegok migib era, hyak senenggomaʾ lok soʾ ak elegok.

²² Dara, yokaʾ-yokaʾ nidyaʾ ara, Imik Neyung adya dara, Kristus adya dub dangoka bo ubnamla aboka doboka elegoka, yuba donaʾ nim ulumnemakaʾ ara, Kristus anyek, sikja dubnya ulululaʾ aboka elegosuk.

²³ Yok-yok mok soko nidyaʾ yokaʾ-yokaʾ ulumlaʾ ak deknewoka ululanya Yesus Kristus alja nong dibaʾ ara, yuba don nimi hiboka ulumaakanya, sikba alja deknelesil nang ulumak.