3 YOHANES 1 - PERJANJIAN BARU NALCA YUBA

Gibok Yuba

¹ Hem Gayus wanaʾ nong ulunggenya o! Nara nimi yuba don nimi bo usinnya bedya, dib yuba lomok uboka wanaʾ ulunggenya bek momnya doboka beibgen.

² Nara anak eikaʾ anyek ulumenekanya, nidyaʾ yokaʾ-yokaʾ ara perob ok ulunggululaʾ aboka mololenggen. Anya wera, anda ganya ak dara pe ululam sok, yokaʾ nidyaʾ pelenggululaʾ aboka mololenggen.

³ Nimi yuba dolomak nimi hnon ara, anyagan yeiniboka, anda dib nong yub ek bojam uboka, al dib yub ek sunuwoka sobaʾ ulmorulamla an yuba nak neknyekaʾ anasa, nara hyak perob senewoka eiya dabnel.

⁴ Yoknya nedya nak ganya sangab elegoka ubnenggununeso, alda wera nadya mab era, dib yuba lelemlaʾ sunuwoka ulumak an yub edya danyek, hnonok hyak nauba eiya dablenel.

Gayus Bek Gigiwok Yuba

⁵ Nadya hem o! Nunja hem yabo yuba dolomak nim emba welelam dara, hnonda an ella ululam nim emba hnon, hnonda amba elgom ululam bok, yuba dolomak nim emba hyak yeiriwoka bojam weboka aralesilim.

⁶ Anja wanaʾ uboka wa bojam welelamaʾ ara, nun an yuba donaʾ nim ek an seleb unulamla aboka laga nekesik. Anda sik balamak pik pe arawoka bo balasilimaʾ anadya, Imik Neyung ganya sangab elegolulaʾ aboka lebna.

⁷ Anasa wera, Imik Neyung si amba leboka, wa wero yibinemab aboka goubomekaʾ ara, wa welemnaʾ amba dara, Imik Neyung yuba elgom ulumak nim ek ab deknaʾ donggulumak.

⁸ Anasa wera, nun yuba donaʾ nim ulumabaʾ ara, nunja hemyabo ban anaso ulumak nim ek arawoka ulumnemab. Anadya wera, onoʾ sikeneb neikaʾ dib yub amba angawoka welemnamab.

Diotrefes Beb Demetrius Siksamba Lebok Yuba

⁹ Nara yuba dolomak nim ek mek burum momnya donaʾ hnon weboka seleb dibsa bok, yuba don nimi dubnya ulunun senelelanya Diotrefes bedya danyek, nak alja yub era kebnyek senewoka ulumla.

¹⁰ Bok eimik na anyagan yanya sum era, nidyaʾ alja yok-yok malya unaʾ uboka, sondaʾ leboka, nauba gunulamlaʾ deng ara, nunsamba hnon geklewoka sondaʾ lelelanya nera, laga poboka lebnamna. Bok ban nidyaʾ unulamlaʾ ara, nenyek ok unuro dakdowonun senenggulumla. Onoʾ nunja hemyabo yuba donaʾ nimi yanggan dara, alja ek doboka beilisinaʾ ara alda lek senelamla. Dara onoʾ yok nim edya nunja ek an mabnemab aboka ul yabanaʾ anaba, alja mem aboka yuba sekoka, onoʾ sik arawanob senelemak nim ek yuba dolomak ak ab yaklesil.

¹¹ Nadya wanaʾ ulunggenaʾ hem o! Anda meilinya nek hyak dilinaʾ ara mem nong. Alda anda perobnya nenyek dililelom. Perob unaʾ unulumak nim era, sikda Imik Neyung adyinya ulumak. Alda malya unaʾ unuro ulumak nim era, sikda Imik Neyung ak elgom ulumak nim era an.

¹² Nimi nidyaʾ ara Demetrius bek pelemla bar aboka gigilemak. Onoʾ alja unulamlaʾ ara dib yuba lelesil sok neik digum unulamlaʾ anasa, gigilamla. Dara onoʾ nunja anaba perob aboka gigiwab. Dara, nunja lebsabnya nera dib nong ara ugumba ella ululum.

Sidyaʾ Gibsuk Yuba

¹³ Nadya dara, yokaʾ-yokaʾ nauba anak lebgunun senewanjok, momnya donaʾ pik ab danagom senewoka lobna.

¹⁴ Alda anab neikaʾ eibdeinimekanya, ok ab neikaʾ bukoka pe sabnomaʾ aboka, dubla anaʾ loboka yananabok anasa, lobna.

¹⁵ Wera Imik Neyung adya perob ok unaʾ ara, anak ulunggulul. Ugunjaʾ hemyabo na ulumnaʾ ak an nim edya ugunuk perob aboka gibsak. Nadya perob aboka gibsinnya nera, nunja hemyabo yok nimi nidyaʾ ak nei bera alja si nedya unu gibesil aboka nekdanalum.