2 YOHANES 1 - PERJANJIAN BARU NALCA YUBA

Gibsuk Yuba

¹ Genong Imik Neyung adya an weboka donjok gel geb, anaʾ mab abdak momnya doboka beibsin. Ban momnya donaʾ enera, yuba don nimi bo usinnya bedya, dib yuba lomok uboka ugunuk wanaʾ uboka beibsin. Nera or nadyok wanaʾ unggulusin. Alda nimi nidyaʾ dib yuba ella ulumak nim edya ugunuk yadyek senewoka wanaʾ ulusak.

² Dib yub ara, nunja ganya lomok ulusilekanya, alda hyak sob-sobaʾ nu lomok ulmoublemnesilaʾ anasa, wanaʾ ulusab.

³ Anya wera, Imik Neyung adya hnon, alaʾ me Yesus Kristus adya hnon, nuk perob eleksinaʾ ab, angoo yadyek senewoka arasinaʾ ab, perob ok unaʾ ab, or eleklesururuk e. Ban nidyaʾ ara, nunda dib yuba lomok uboka ganya wanaʾ ubdangoka dobnemab.

Jong Uboka Wanaʾ Uldan Yuba

⁴ Imik Neyung adya nuk alja lelesil sok, genong anja mabo darasam ara, dib yuba sunuwoka ulumakaʾ anyek, nara eiyiwoka, nara hyak eiya ulunel.

⁵ Anasa wera, genong o, nara nun moumen wanaʾ uldalanobaʾ aboka hyak pe molowagen. Wera ban wenyhenya nera, nadyok wen seiniwoka lebnenggubna. Alda men youmaʾ yuba dib senemouba wenyek, nuk seleb elegesuk yub ek, lebna.

⁶ Wanaʾ unaʾ dibaʾ ara, Imik Neyung yuba lelesilaʾ sunuwoka ulumabaʾ ara, alan. Dara, alja orugosukaʾ ara, ugunda anam yuba dib senelum sum enyek moruwoka kelum sok, sobaʾ wanaʾ ubdangoka ulululum aboka orugosuk.

⁷ Nim ek sondaʾ bobnenewoka malya nenelesak nang era, mok soko nidyaʾ oboka lelewal. Ban lebna nang danara, sikja dara, Yesus Kristus ara nimi nonga dangoka sokok yeilimok aboka laga lenggulumak nang ulumak. Anasa ban nang danara, sondaʾ hwam nang uboka, Kristus adya alja isaʾ nang ulumakaʾ ara an.

⁸ Wera nenesa, nunja ugunsamba memesubnya nenyek weininggomunuk aboka, pe diri bo ulululum. Imik Neyung ak ab perob deknaʾ ugunja welelumaʾ sunuwoka dobgogowanob senewoka yeiriwoka keebmoublulum e.

⁹ Kristus adya neklesuk yub ek pe salalmoubnaʾ loboka, Kristus adya yub ak pik aklel hwilimak nim era, sikda Imik Neyung orokaʾ ak ulumak. Alda Kristus adya neklesuk yuba lomok pe ululanya bera, neyung Imik Neyung anaba, alja me neneba yakaʾ ak ulumla.

¹⁰ Anasa wera, nimi hnon Kristus adya neknenggusuk yub enyek, ugunuk lero yanggeisija dara, sikenek giboka ugunja ek doro beilinaʾ ara mem.

¹¹ Bok wera, ben hnonja ban nang enyek an giboka unuwalya dara, wera benera ban nang enyeb neikaʾ malya unulumak.

Sidyaʾ Leb Dakdobok Yuba

¹² Nadya dara, yok-yok yuba nauba wenyhenesisinya bok, momnya donaʾ pik uboka danagom senewanaʾ anasa lobna. Alda nunja ganya eiya dabsululaʾ aboka, nara ugunuk seʾ kemel yeisinya sum enyek, ugunub neikaʾ bukoka sabnemab senewan.

¹³ Genong o, anja Imik Neyung adya gaboka domok weis alja mab edyaʾ anaba, anak perob aboka gibenjak.