2 TIMOTIUS 3 - PERJANJIAN BARU NALCA YUBA

Sidyaʾ Daknamla Sum Ubnamla Yuba

¹ Anda banyek pe keblom: Mok soko nidyaʾ daknamla sum era, yok-yok damoka nauba igina kwesinaʾ lanawanamla.

² Nim ara nanokok pewonulul senewoka ulumnamak, rupiah hogung ok beiyiwoka ulumnamak, dengdang anaʾ ganya boboka sondaʾ hwam ok lelemnemak. Sikda yok nim ek geklewoka derewoka walamnamak, nauba nimi yuba lek senewoka bleklemnemak, eleganelemaʾ perob alamakaʾ ara, elgom ulumnamak. Dara, hnonda nimi pe ulumaknya nek ara, sikda lek senelemnamak.

³ Sikda yok nim ek wanaʾ unggulumnamak, malya ubgen bar aboka, laga leldanaʾ ara ununggulumnamak, sikda yok nimi si ak, bera malya unululanya aboka malya nenelemnemak. Sikda gasa hwam ok boboka ulumak nimi geknebaʾ ulumnamak. Sikda perob unaʾ ara, hyak lek senelemnemak.

⁴ Sikda yuba bo dil banaʾ ak perob senelemnemak, sikda imik nenebdangoka, ganya mok seinil banggulumnamak. Sikda Imik Neyung ak wanaʾ unya nera loboka, sokok an ununaʾ anyek wanaʾ nong ulumnamak.

⁵ Nim adya eilin dara, sikda yuba doboka pe unulumak nimi senen bok, sikda ganya migib dibaʾ ak dogom aboka lolomak. Ban unulumak nim enyek ara, anda mok nenebdangoka ululom.

⁶ Ban nang danara nim edya e pik gelelenga wekel balamak. Dara onoʾ hyak malya unaʾ hwam ok uboka, yok-yok unuweisinya ganya adya gouluwoka ulumak gelewa ek sene malya unuwanokaʾ aboka benellilisak.

⁷ Ban unulumak gelewa dara, yuba sob-sobaʾ kelemak bok, dib yub ak sikda ella ubnamenggomaʾ ak ulumak.

⁸ Youmaʾ danyek Yanes beb, Yambers beb dadya, Musa bek bleklerek sok, onoʾ neikso ban malya unulumak nim era, Imik Neyung adya dib nong yub ek bleklemak. Sikja ganya era seleb oulaʾ oboka blobsuk. Sikja yuba dib senemekaʾ ak ara, saawoka dobnamenggom ubsuk.

⁹ Yanes beb, Yambers beb dadya dongdang arek ek, laga ubok sok, sikja dongdang alamaknya nera, nimi nidyaʾ seleb ella danamakaʾ anasa, sikda yokaʾ-yokaʾ nidyaʾ ak ara perowanggunumak ak ulumak.

Dib Senenaʾ Ara Igina Donaʾ Ak Ab Lanalamla Yuba

¹⁰ Bok anak dara, nadya men nekenggesa yub eb, nadya hekaʾ anaso uboka ulumsaʾ ab, nadya unu ulunun senelenanya neb dara, anda seleb eiyiwoka ella ululam. Nadya hyak dib nongaʾ anyek, Yesus Kristus ak dib senewoka onoʾ nim ek wanaʾ ulusinaʾ ara, anda seleb ella ululam.

¹¹ Nak malya uboka saboka oboka, nauba gwekoka igina kwelenyokaʾ anaba seleb ella ululam. Dara nak Antiokhia heikek ab hnon, Ikonium heikek ab hnon, Listra heikek ab hnon, yokaʾ-yokaʾ nidyaʾ ununyok ara, ganya mel-mel aboka siklewoka ulumsaʾ ara ella ululam. Bok, ban unulunyok bok, Wenelesilnya bedya nak nidyaʾ ak ab seleb blebnyok.

¹² Anasa wera, nimi nidyaʾ Yesus Kristus ablaboka neikaʾ kwebdangoka uboka, Imik Neyung amba gobdo geisa ulunob senelemak nim ek, lobaʾ nenewoka ol neblemnesak.

¹³ Bok, malya unaʾ hwam nimi hnon, sondaʾ hwam ok wekdeknewoka ulumak nim era, nauba malya danggiga balamnamla. Sikja dara, yok nim ek sondaʾ lelemak bok, onoʾ sikbabya dirigoka sondaʾ lelemnesak.

¹⁴ Bok Timotius anak dara, ban nang danadya neknyek senewoka seleb ella ululam bok anasa, anak seleb nekenjekaʾ keboka, anja seleb hyak dib senelelamnya nenyek pe salabmoubuka ululom.

¹⁵ Anda hyak mekewek moruwoka, Imik Neyung geisa yuba seleb ella ululamaʾ nong anyek, pe seiniwanalam. Wera ban Imik Neyung yuba buku nong enedya Yesus Kristus pik uboka yuba dib senelemak adya embeng unaʾ dolomakaʾ ara, ella ululamaʾ anasa, pe salabmouboka ululom.

Imik Neyung Yub Ara Alak Ab Gobomok Yuba

¹⁶ Ban nidyaʾ Imik Neyung yuba momnya dobokaʾ anara, Imik Neyung sik ab gobomok. Dara, nim ek lel elekna damba hnon, nera malya ublam aboka wenewoka pe memen damba hnon, nim ara, Imik Neyung adya senelelanya nenyek unu sunuwoka jong ulululum aboka, wenesin damba hnon, perobaʾ ak ulumla.

¹⁷ Wera ban Imik Neyung yub anadya, Imik Neyung ak arawoka wa welemak nim era, yokaʾ-yokaʾ nidyaʾ perob wa nenyek pe webnokaʾ aboka, weiboka perobaʾ nenelesil.