2 TIMOTIUS 2 - PERJANJIAN BARU NALCA YUBA

Kristus Wa Bojam Uboka Welemak Yuba

¹ Nadya me Timotius o! Kristus Yesus ak pik uboka Imik Neyung adya wanaʾ uboka eleksinaʾ adya, anda migib nongaʾ dangoka ululom.

² Nadya anak nimi hnoumuk sam ab uboka nekenggesa yub era, onoʾ anja dara, saawoka bojam ulumakaʾ yok nim ek pe neknemeija nang ek unuwolulum aboka, nekoka dib lolonglesilom.

³ Onoʾ amba hyak Kristus amba bojam uboka yina bololanya geknebaʾ uboka igina kwelenggelya bok, welmorululom.

⁴ Nimi mala naklenanya bera, alda anam oldalamna salek era, mal gakaʾanya bedya perob senewonulul senewoka yeiriwoka naklamnakanya, alja wa yokaʾ ak ara wel yabenggulumla.

⁵ Anaso neikek, onoʾ nimi ben hnon bik-bik alalanya bera, ban unuwoka bik-bik hen dara, pelemak senenaʾ anyek pe unuwanggubna dara, wera bera bik-bik henemsoʾ anaba, alda perobaʾ donggulumla.

⁶ Dara onoʾ hnonda, nimi wa ara men nonogoka weboka menanya benyek, masa ara nonga ubna dara, alak men boboka delemla.

⁷ Ban nidyaʾ eini lebnanya nera, Wenelesilnya bedya anak anyek ella dolulaʾ aboka, migibaʾ eleganenggel bok anasa, anda hyak pe keboka senelwenelelom.

⁸ Banyek pe beknelam: Nadya perob lero yanggan yuba lero yeilimsaʾ ara, Daud nang yilaʾ ak abnya Yesus Kristus nimi somoknaʾ damok ak ab seleb embengaʾ suboka welewokaʾ ara, beklemnelam.

⁹ Wera, al ban perob yub enyek lero yabalenanya nenesa, nara hyak yokaʾ-yokaʾ nauba igina kwelenel. Anya hyak hokaʾ donanya benesoʾ anyek, gasa henga gouboka beillilenyak bok, Imik Neyung yub ak dara, nim adya henga goubnamenggom ulumla.

¹⁰ Wera anasa, ban nenesa leboka, Imik Neyung weboka gaboka dolosil nim enyek, sikda Kristus pik uboka eleklesil blebnaʾ damok hnon, anya sikenek si imik nenesinaʾ damok anaba, dobnokaʾ aboka, onoʾ nara yokaʾ-yokaʾ ara igina kweboka goululumaʾ aboka gweklamna.

¹¹ Dara, ban lelemak yub era dib nong: ”Nunda alablaboka somogomouba dara, onoʾ eimik era suboka alab neikaʾ embengaʾ ulumnemab.

¹² Nunda pe ganya kaboka siklewoka ulumeibya dara, nunda eimik era, alab neikaʾ dub dangoka wenelemnemab. Nunda alak numba elgomnya alameibya dara, eimik era alba nuk anaba, nab elgom nimi henesil.

¹³ Nunda alak pe bojam unggulumeibya bok, alda al damnya dara, malya neneldanggululanya bek anasa, alda nuk pe bojam ulmorulumnesil.”

Wa Pe Wenaʾ Amba Gigiwok Yuba

¹⁴ Ban nidyaʾ lebnanya nera, nim ek pe unululum aboka wenewoka bekellilisilom. Anya onoʾ, Imik Neyung saramek sam ab, mek yok-yok seininaʾ ok adya waldalamaknya nera, mem aboka wenelesilom. Nera perobaʾ nenenggulusil, alda kelemak nimi ganya malya nenelesilaʾ ok.

¹⁵ Anak Imik Neyung adya dara, nasamba wa pe welenelnya bera an senelenggululaʾ aboka, hyak pe yeiriwoka welelom. Anja wa welelamaʾ ara, alya ubnelyek senewoka, anya Imik Neyung ak ab neknaʾ yuba pe sunuwoka neklelomaʾ aboka hnon, pe keeboka welelom.

¹⁶ Salyaʾ lelem yub era, Imik Neyung si ak malyaʾ nenelemak yub enyek, anda mok nenewoka ululom. Ban unu malya uro saro yabalamak yub era, nimi malya ganya nauba danggiga balasilaʾ anasa, anak dara, nera mok nenewoka ululom.

¹⁷ Ban neneso neknaʾ yub era, nimi somoknaʾ neiknaʾ damok ak belega elesilaʾ anyek ulumla sokaʾ ak ulumla. Ban nenyek seleb unumek nang dara, hnonda Himeneus beb, Filetus beb an ulurak.

¹⁸ Sikda penya dara, perob yub ek ab seleb malya nenebdangoka mok darek. Wera sikja dara, nim embengaʾ suboka bun salek era, seleb yenewal wenyaro yabalarakaʾ adya, nimi yok nim ek hnon sikja dib senenaʾ ara seleb dolul meneklerak.

¹⁹ Bok, Imik Neyung adya ikimok egomnaʾ era, hyak mel-mel arob nong. Egomnaʾ eilibek ara lero momnya dobokja, ”Wenelesilnya bera alja nimi yokaʾ ak ella ulusil;” onoʾ, ”Nimi hnon nara Wenelesilnya bedyinya ulumna aldalalanya bera, alda malya unaʾ ara, hyak gobdo lobnamso.”

²⁰ Hyak senenggomaʾ somna ek ara, yok-yok bonaʾ beilinaʾ ara, nauba ulumla. Wera bonaʾ beilinaʾ ara, hnonda dangman meilik yubaʾ adya memelemak dara, hnonda gal adya gom, soko adya gom, mememnaʾ ak ulumla. Dara beilinaʾ ara, hnonda hyak pero-pero senenggom bonaʾ enesa ulumla dara, hnonda dom digum so bonaʾ danasa ulumla.

²¹ Nimi ben hnon yok-yok malya unaʾ ak, geisa nenebdanelanya bera, benyek munaʾ nenebdangoka perob wa wenaʾanya ulumnamla. Dara bera, alja neyung adya al nonga perob wa weboka un danasa, weboka doboka dibnamlakanya, alda yok-yok perob wa nidyaʾ webnunaʾ aboka, diri ulumnamla.

²² Goubenya nim edya nenyek perob senewoka malya ulumaknya nek, anda mok geboka ululom. Anda Imik Neyung amba ok perob senelamla sunuwoka pe uboka, alak hyak dib senewoka, nim ak wanaʾ uboka, hyak namenaʾ anyek ululom. Perob ganya boboka, Wenelesilnya bek araweisilom aboka, molowoka ulumak nim eblaboka, anaso unu ulululum.

²³ Yok-yok dongdang anaʾ elgom yuba lelemakaʾ ak neikik hinggom. Ban sikja unulumaknya nera, waldanaʾ damoka lanalamla ara, anda seleb ella ululamaʾ anasa, ununggom.

²⁴ Imik Neyung alja wa welelanya bek dara, waldanaʾ yuba hyak mem. Bok saawoka, alda yok nimi nidyaʾ ak namen ok uboka, yuba pe nekoka, ganya pe siklewoka ululul.

²⁵ Alda bera, nimi yok nim edya alak bleklemak nim ek, sikba Imik Neyung adya ganya dangiyiwoka, perob jong yuba dobnok senewoka diri ulusilyikanya, pe namen uboka wenelemnesil.

²⁶ Wera anadya sikja nunda anyek ulumabaʾ aboka ella ubdanamak. Anya sikda Iblis adya nadya yuba kelelulum aboka, sikenek gliboka bo biniboka henga weboka youlusil ak ab blebnesil aboka unulumnesil.