2 PETRUS 3 - PERJANJIAN BARU NALCA YUBA

Yesus Yanamla Sum Amba Lebok Yuba

¹ Nadyaʾ hemyabo nim o! Ban momnya donaʾ beibsinaʾ anara penenya nek beibsin. Ban beibsin momnya donaʾ pik ab dara, ugunja ganya hyak pe seinilemnelum aboka ugunuk beibsin.

² Nadya ugunuk unuwanasinaʾ ara, Imik Neyung adya geisa ununumnaʾ lelemek nang edya youmaʾ yuba ugunuk nekesikaʾ anyek pe seiniwoka ulululum, hnonda Imik Neyung yuba lenaʾ gak nang edya ugunuk neklesakaʾ anyek, nimi blebsinaʾ dubnya dangoka wenewanasil yub enyek bekoka ulululum.

³ Ugunda men nonogoka beknelumaʾ nong ara, yokaʾ-yokaʾ sidyaʾ daknamla sum era, nimi nauba malya ulumakaʾ adya ok wekdeknewoka ulumak nim enyek boboka lanawanamak. Sikja ugunuk derewoka walamnesak.

⁴ Anya ban wenyalamnasakaʾ ara, ”Imik Neyung ara yanamna hyok alalumaʾ ara wera har laga yal? Wera alda hanyagar ulumla? Nunjaʾ neyung yabo youmaʾ nang era seleb somogekaʾ anaba, yokaʾ-yokaʾ ara yok hogunga beilinaʾ loboka, youmaʾ anam uyimokaʾ wenesoʾ ak or ulumla!” aboka lelemnesak.

⁵ Ban malya unaʾ hwam nim edya dara, Imik Neyung adya men youmaʾ enyek im ab soko ab dara, alja yub edya uyimok aboka laga lenaʾ ara lolomak. Soko ara mek ek ab doboka uyimokaʾ ara, on mek enedya uyimok.

⁶ Dara al neik mek edya, senenggom mek dangoka iliwoka youmaʾ soko ulumokaʾ ara dengaboka omok.

⁷ Bok wen an ulumla im eb soko ab dara, Imik Neyung yub adya bo ulumlaʾ ara onoʾ eimik uka dabnamlaʾ ak ulumla. Wera soko ab im ab dara, Imik Neyung adya or bo ulumlyaʾ ara, nimi malya unaʾ hwam ok ulumak nimi yana lelewanesil sum enyek, uka dabnamla.

⁸ Bok nadyaʾ hemyabo nim o, ban nadya lebnesinaʾ banyek hyak mekaʾ hibiganggunulumaʾ ara ban: Imik Neyung adya senelamla dara, li hnonok ara gibnaʾ denga salyaʾ anaso uboka, gibnaʾ denga salyaʾ ara, li hnonok anaso ulumla. Alak dara, nidyaʾ ara hnonok ok ulumla.

⁹ Nim adya dara, Imik Neyung adya unu eleganesin hyokaʾ hnon mandelemla senen ganya bolomak bok, alda anaso ununggulumla. Bok Imik Neyung ara, ugunuk hnon somogeijek senelamlaʾ anasa, or anam siklewoka ulumla. Imik Neyung adya dara, nimi nidyaʾ malya unaʾ loboka, eibkweboka ganya dangawanok senelesil.

¹⁰ Bok Imik Neyung yanamlaʾ ara, nim edyaʾ hokaʾ dolomak nimi gelelenga yabalamak sok uboka yanamla. Imik Neyung yanamla sum era, im ara liming yub adya iriri aboka joboka denghenemla. Imik sam yokaʾ-yokaʾ ulumlaʾ ara dengaboka uka denemla. Soko ab yokaʾ-yokaʾ nidyaʾ dubuk sam ulumlaʾ dengaboka orok danamla.

¹¹ Anasa, yokaʾ-yokaʾ nidyaʾ anyek anaso ura denghenemla anasa, ugunuk dara, hekaʾ huboka goʾ ubnemab senelelum do? Ugun nong ara, Imik Neyung amba ok munaʾ gobdo geisa ganya boboka ulululum.

¹² Imik Neyung yanamlaʾ anyaʾ senewoka diri ululum salek era, geisa ganya boboka ulululum. Imik Neyung yanamla sum era, im ara nidyaʾ dengaboka uka denemla dara, poba nong adya, imik sam yokaʾ-yokaʾ nidyaʾ ulumlaʾ ara, uk adya nonowanamla.

¹³ Bok nuk dara, Imik Neyung adya wenyok im eb wenyok soko eb perobaʾ ok ulumla soko eleganesin hyokaʾ anyek dib senewoka diri ulumab.

¹⁴ Anasa wera, nadya wanaʾ ulusin hemyabo nim o, ugunda Imik Neyung yanamna amok sum enesa diri ululum salek era, ugunja unaʾ era, mekaʾ gegenaʾ ponaʾ loboka, hyak geisaʾ nongaʾ anyek dibaʾ pe ulululum. Imik Neyung ab ugunub neikaʾ pe kwebdangoka unaʾ ara, hyak pe bo uldalalulum.

¹⁵ Imik Neyung ara men yangganggulumlaʾ ara, nuk blebsununaʾ ubokaʾ senewoka ugunda ganya enyek, pe boblulum. Nunjaʾ hem be hiboka wanaʾ ulumabnya Paulus bedya ugunuk wenyaboka momnya doboka beibsuk. Alda ugunuk momnya doboka beibsukaʾ ara, Imik Neyung adya alak geremseng eleklelanya nedya ubsuk.

¹⁶ Paulus bedya nidyaʾ momnya beillilisilaʾ ak ara, alda nenyek wenyaro beillililesil. Alja beillililesilaʾ momnya donaʾ era, hnon yuba damok era ella danganaʾ okna so ulumla. Anya elgom ubsin yuba damok era, nimi yokaʾ-yokaʾ elgom ulumak nim eb, Imik Neyung ak dib ganya ologoka donaʾ orok nim edya dara, dangawoka malya nenebmenekoka lolomak. Sikja dongdang aboka meknewoka unulumaknya nenedya, onoʾ sik nong anaba meneng dongdang anaʾ enedya malya neneldalamak.

Sidyaʾ Lebok Yuba

¹⁷ Nadya wanaʾ ulusin hemyabo nim o, ugunuk dara, wenyhenya nera seleb orowek ella dangalum. Anasa, nimi malya ulumak nim edya ugunuk gliboka bo bisijaʾ ak malya nim ulumakaʾ ak malya domunuk anasa, anya migibnya bek malya nenebdomunuk anasa, keeboka diri uldalalulum.

¹⁸ Nunjaʾ Wenelesilnya uboka, nunjaʾ blebsinaʾ dubnya Yesus Kristus adya perobaʾ eleklesilaʾ hnon, alak ella unaʾ hnon ak dara, nebgiga balalulum. Imik Neyung ak ara alja migib unaʾ emba leboka, wenyek hnon uboka, sobaʾ alak ok giblenok! Amin.