2 KORINTUS 9 - PERJANJIAN BARU NALCA YUBA

Yerusalem Gereja Amba Rupiah Bolomek Yuba

^1-2 Nimi munaʾ Imik Neyung mab ek aranaʾ ara, ugunda arawanasibya ganya seleb nauba bololumaʾ anasa, unuwanalum aboka momnya dobnenggunusisinya. Makedonia nim ek anaba, sikda anaso ganya bolomak aboka, ugunuk gigileng sok lero yibisa. Makedonia nim ek ara, Akhaya mok ulumak Imik Neyung mab era seleb lemoub gibnaʾ ek abaʾ, sikda anaso arawanamab aboka seleb seinibgogomek aboka nekesisa. Dara, ugunja unululumnya nedya, nimi nauba yeng ganya neneiyilum.

³ Nunja sikda anaso pe unulumak aboka yok nim ek lelemabnya nenyek, sondaʾ dalyek aboka, Titus beb onoʾ alkabo penya nang ek ugunuk sam bokol yeilisin. Sikenek ara, nadya dara, seleb orowek memelemak hesaʾ anasa, ugunda aldib seleb meebdaklulumaʾ aboka bokol yeilisin.

⁴ Nara hnonok lok ganya boboka seinilamnaʾ ara, nara ugunuk yangganya sum enyek, Makedonia nimi hnon nub neikaʾ binimab aboka yeijikanya, nadya lelenanya nera sondaʾ dalyek senelamna. Nunda ugunuk ara seleb aldib orowek seleb doboka beiyirob hyubaʾ anasa, anyek ununaʾ orokaʾ eibnemak dara, nak alya dabnenel. Orok dara, ugumbabya alya ubnesil.

⁵ Wera nenyek deisilyek aboka, ugunja arawanamab hulumnya nenyek, men orowek memewoka beillilelulumaʾ aboka, Titus beb alkabo nang eb dara, bululum hisin. Wera anadya ugunja bolowanalumaʾ ara, dukaʾ lolowoka ubek ara, orok bok, alda sikja ganya doboka arawekaʾ danamla.

Ganya Eiya Daboka Eleganaʾ Ara Perobaʾ Lanalamla Yuba

⁶ Ugunda banyek pe beknelum! Nimi wak yinaʾ mekaʾ melelanya bera, nong anaba mekaʾ dolomla. Alda yinaʾ nauba melelanya bera, alba nonga nauba dolomla.

⁷ Imik Neyung ara, eiya ganya boboka eleklemak nim enyek hyak perob senelesilaʾ anasa, lobnesinya bok elegan senenaʾ ab, dukaʾ lolom-lolom alamak enyek eleganaʾ senenaʾ ab dara, mem. Nimi nidyaʾ pe seiniwoka, anyek nara eleganamna senewalyaʾ ok ganya doboka eleganamak.

⁸ Imik Neyung senemlya dara, ugunuk yok-yok perob eleknaʾ lendewoka eleklemnesil. Wera onoʾ alda yok-yok nidyaʾ pe eleganesilaʾ adya, ugunda yok-yok perob wa nidyaʾ wel dibilloklomnulum aboka hyak nauba ugunuk ulumnesil.

⁹ Imik Neyung amba alja yuba bukuk ara, ”Alda bonaʾ yene-mane alamlakanya, nimi bonaʾ garan nang ek boklesil. Alja pe unulusil unaʾ era, sobaʾ ulmorulumnamla,” alamla.

¹⁰ Imik Neyung adya yinaʾ melelanya bemba yinaʾ beiyiwoka, onoʾ den damba gwaneng eleklesilnya bedya, ugunsamba yinaʾ nauba nenewoka, ugunja pe unulumnulumnya nenyek nauba moullilimnesil.

¹¹ Wera anadya ugunda yokaʾ-yokaʾ ara, denaʾ bonaʾ yak nim domunukanya, onoʾ ugunja dara, yokaʾ-yokaʾ nidyaʾ ak heknaʾ ganya boboka nauba eleklemnelum. Dara, ugunja wen bolowoka beillilelumaʾ anyek hnon, nunja bokdo yibinimab aranaʾ enedya, yok nim era Imik Neyung ak nauba perob aboka giblimnemak.

¹² Ugunja perob unaʾ an unululumaʾ anadya, nimi munaʾ Imik Neyung mabo yok nimi denaʾ bonaʾ yak nenenaʾ ok ununggululum bok, alda an unululum ununaʾ enedya, nimi nauba Imik Neyung ak perob aboka giblemnemak.

¹³ Ugunja an laga pe unululumnya nenedya, ugunja yuba doblumaʾ anyek sunuwoka unululumaʾ anasa, ugunja an bojam unululumaʾ adya, Kristus adyaʾ perob lero yanggan yub amba anasa, yok nim era, sikda Imik Neyung ak gigilemnemak. Ugunuk an hekaʾ ulusilaʾ anyek, heknaʾ ganya boboka, sikenek hnon, onoʾ nimi yok nang ek hnon bokoka eleklesulumaʾ anasa leboka, sikda Imik Neyung ak gigilemnemak.

¹⁴ Dara Imik Neyung adya ugunuk perobaʾ unulusilnya nenesa leboka, sikda ugunuk wanaʾ uboka Imik Neyung ak mololomnasak.

¹⁵ Imik Neyung adya nuk hyak seinildaknaʾ okna eleknaʾ emba, nunda alak pe giblemnemab!