2 KORINTUS 6 - PERJANJIAN BARU NALCA YUBA

¹ Nunda neikaʾ welemab nang edya, Imik Neyung adya ugunuk wanaʾ uboka eleknaʾ dololumaʾ anyek, salyaʾ lelem domunuk aboka dukaʾ lololosab.

² Imik Neyung yuba bukuk ara, Imik Neyung adya, ”Nadya sumen arawanenggen senemsa sum era anja molonaʾ era, seleb kebgesa, nadya blebnamna senemsa sum era, anak aranggesa,” aro lebok. Onoʾ hnon lebokaʾ ara, ”Wera sumen era, arawanenggen senelamna sum dal. Wera sumen era, blebnesin senelamna sum ulumla,” aro lebok.

Paulus Alja Wa Welemok Danyek Yuba

³ Nunja welemab wa nera, yok nim edya malya uboka welelum hisijek aboka, nunja dara, yok nim ek oluk diknaʾ girik dibaʾ nenenggulumab.

⁴ Yokaʾ-yokaʾ nidyaʾ ak anaba, nunda Imik Neyung adya perob wa wen nang beknaʾ dangalasululaʾ aboka laga amalasab. Ganya nauba siklenaʾ adya hnon, igina kwesinaʾ adya hnon, gak denaʾ unaʾ adya hnon, laga amalamab.

⁵ Legebnaʾ debsinaʾ adya hnon, gasa ek beilisinaʾ adya hnon, nimi nauba irr aboka usinaʾ adya hnon, igin wa wenaʾ adya hnon, mabom bukom anaʾ adya hnon, denaʾ denggonggom ulsininaʾ adya hnon, laga amalamab.

⁶ Onoʾ geisa unaʾ adya hnon, ella danganaʾ adya hnon, igina siklebmouboka unaʾ adya hnon, perob unaʾ adya hnon, Geisinya lomok unaʾ adya hnon, munaʾ gobdo wanaʾ unaʾ adya hnon, laga amalamab.

⁷ Dib yuba lenaʾ adya hnon, Imik Neyung migib adya hnon, Imik Neyung adya perobaʾ nenenaʾ era, hnonda yin dibaʾ oldan danasa hnon, blebeldan danasa hnon, nunda Imik Neyung adya perob wa wen nang ulumab beknaʾ era amalamab.

⁸ Nuk hnon gigilisak salek era, onoʾ hnon derewoka walasak. Hnonda pe wenggulumak alasakjok, onoʾ hnon pe welemak alasak. Sondaʾ hwam nanga hnon senelesakjok, onoʾ hnon dib unulumak senelesak.

⁹ Yok nim edya elgom ulusak nang anaso ulumabakanya, onoʾ nimi hyak nidyaʾ ella ulusak nang ulumab. Nim adya dara, somogununaʾ aboka ulumak nang eneso senelesak bok, onoʾ embengaʾ ulumab. Nunda saboka olosak nang bok, nunda dibaʾ somoknenggulumab nang ulumab.

¹⁰ Nunda igin ganya bolomab bok, onoʾ sobaʾ ei-ei ganya bolomab. Nuk bonaʾ garan ulumab bok, nunja yok nim ek ara bonaʾ dub nimi nenelemab. Nuk dara, yokaʾ-yokaʾ garan ulumak senen bok, hyak yokaʾ nauba ulusil nang ek ulumab. Dara ban yokaʾ-yokaʾ nidyaʾ ak, perob wa wen nang beknaʾ dangalasululaʾ aboka laga amalamab.

¹¹ Ugunda Korintus heikek ululum nim o! Nunda ugunuk hyak nidyaʾ lelewoka laga lebsab. Nunja ganya seiniwoka bolomabnya nera nidyaʾ laga poboka lebsab.

¹² Nunja ganya lomok ugunsamba wanaʾ un ganya era nauba sangalasab bok, ugunja nuk wanaʾ usinaʾ ara areklesulum.

¹³ Nadya mabo yokaʾ mab enesoʾ anyek, ugunuk wenyalasin. Nunja ugunuk unulumab sok, ugumbabya ugunja ganya era ganya sangab loblulum.

Dib Senenaʾ Orok Nim Eb Neikaʾ Hinaʾ Mem Yuba

¹⁴ Yesus ak dib senenaʾ orok nim eb, ugunub neikaʾ hinaʾ ara mem. Perob unaʾ ab malya unaʾ ab hekaʾ adya pe neikaʾ ubnesereng do? Dilinaʾ ab gunaʾ ab neikaʾ hiboka ubnesereng de? Orok e!

¹⁵ Kristus ab bisaʾ dubnya Belial beb neik ganya bobnesereng de? Yuba dolomak nim eb yuba donaʾ orok nim eb dara, neikaʾ ara hekaʾ ak ulumla do?

¹⁶ Imik Neyung e ab bisaʾ gibnaʾ e neb dara, neikaʾ ara hek soʾ ak ulumnamso do? Ugunda embengaʾ ululanya Imik Neyung bedya e ululum. Imik Neyung adya lebokaʾ ara, ”Nara sik hnoum ulumnesinikanya, sik gangganek yabalamnamna. Nara sikjaʾ Imik Neyung ulumnamna dara, sikda nadya mabo silibaʾ ulumnemak.

¹⁷ Anasa wera, ugunda sik Imik Neyung ak elgom ulumak nimi gangganek ab bokdanalumukanya, ugunda malyaʾ ak unulyamanggom. Dara, wera ugunuk perobaʾ leboka dobnesin,” ara Wenelesilnya bedya lelemla.

¹⁸ Dara onoʾ, Imik Neyung hyak senenggomaʾ imik ululanya bedya dara, ”Nara ugunjaʾ neyung danasin dara, ugunda nadya memabo gelmabo dangoka ulumnelum,” alamla.