2 KORINTUS 5 - PERJANJIAN BARU NALCA YUBA

¹ Nunda seleb ella ulumabaʾ ara, nunja e nera, nera nunja nong enyek, nu sokok an ulumab e nera golowanamla dara, nimi soruk adya songgulumak e nera, Imik Neyung adya solomlaʾ sobaʾ ulumnamla e nenyek, imik heikek Imik Neyung adya seleb sobsuk.

² Nunda Imik Neyung adya solomla e nenyek, imik heikek bindiwoka ongowanesibya senelemabaʾ adya, nunja sokok an ulumab ek anyeb dara, angoo aboka lelemab.

³ Wera ban imik e ongowanemab dara, wera nunja ganya era, nong baneng unggulumnamab.

⁴ Nunda sokok ek an anam ulumab nim ek dara, yokaʾ-yokaʾ adya igina kwelesilaʾ anasa leboka, angoo aboka lelemab. Nunja somoknaʾ nong enyek dara, anyagan loboka, embengaʾ ulmoubnaʾ nong enyek ongoweisibyaʾ aboka, soko an nong enyek gwiriwanamab ganya ek lenggulumab bok, alda imik nong enyek ongoweisibyaʾ senen lelemab.

⁵ Wera ban imik nong ongowanamak aboka meewoka beillilesilnya be Imik Neyung adya ok unulusil. Onoʾ alja dara, Geisinya anyek aldib unuwanesin an beknaʾ elegousuk.

⁶ Wera ban nenesa leboka, nunja ganya sobaʾ ara, migiba dangalasil. Nunda sokok an nong ak ulumab salek era, Wenelesilnya beb imik heikek anam neikaʾ unggulumab ara, ella ulumab.

⁷ Nunja nim adya heng eillilemakaʾ ak sunuwoka unggulumab bok, alda Kristus ak dib senewoka un nong enyek ulumab.

⁸ Wera anasa, nunda ganya migib ulumabakanya, nunda Wenelesilnya ab neikaʾ ulunob senen ganya boboka, wen ulumab nong enera lobsibya senelemab.

⁹ Nunda sokok an ulumab salek gom, imik heikek ulumnemab salek gom, ara Imik Neyung ganya anyek perobaʾ nenel eleklenob senewoka dulumab.

¹⁰ Nunda nidyaʾ ara aldib Kristus adya yana lelewanasilaʾ ak sam bo beil binisil. Wera sokok an wen ulumab salek enyek, pe unulumabaʾ gom, malya unulumabaʾ gom ara, nunja unulumabaʾ sunuwoka deknesil.

Neikaʾ Hibnokaʾ Aboka Wen Wa Yuba

¹¹ Imik Neyung ak lok ulumak an damok era, nunda seleb ella ulumabaʾ anasa, yok nim ek ara dukaʾ lolom-lolom aboka lelemab. Imik Neyung ara nunjaʾ ganya lomok anaba hyak nidyaʾ olowoka ella ulusil, onoʾ ugunjaʾ anaba nunja ganya ek ara ella ubsinok senelamna.

¹² Ban wenhyabnya nera, ugunja nuk gigiwousululumaʾ aboka lebnenggubab. Nimi ganya lomok ununaʾ anyek loboka, alda nimi hogung anyek perob senewoka kemelemak nim ek, ugunja yuba sabnemunaʾ ara, nuk perob senelesulumnya nek sablulumaʾ aboka, neklesab.

¹³ Dara, nunda serema salasinaʾ anaso ulumak senewanesiseng bok, Imik Neyung amba leboka unulumab. Onoʾ nuk pe seinilimak seneweisisengaʾ anaba, anara ugunsamba pesin danasa unulumab.

¹⁴ Kristus alja wana usinaʾ adya, nuk goluwoka bo ulusil. Dara, nimi ben hnon nimi nauba amba somogosuk dara, wera nimi nidyaʾ ara seleb somogekaʾ ak ulumakaʾ anyaʾ senelemab.

¹⁵ Nim embengaʾ ulumak nim ara, siksamba ok unggulumnemak bok, alda sikenek perob dosululaʾ aboka somogoka embengaʾ suboka bukiyiwok Kristus emba ulunokaʾ aboka, Kristus ara nimi nidyaʾ amba somogosuk.

¹⁶ Ban nenesa leboka, nunda nim ek ella ubnesin aboka, nimi ganya seinilemak sok sununggulumab. Aldib men dara, Kristus amba nimi ganya seininaʾ ak pik uboka sunulumouba bok, wenyek dara, alak anaso sunuwoka seininggulumab.

¹⁷ Anasa, Kristus lomok ulumak nim era, gobdo wenyok nimi dangalamak. Youmanya nera dengaboka, wera wenyoknya nok dangalamla.

¹⁸ Wera nidyaʾ ara, Imik Neyung ak ab lanalamla. Imik Neyung ara Kristus pik uboka, nuk ara perobaʾ nenewoka hibsuk dara, onoʾ nimi yok nim eneba Imik Neyung beb hiboka ubnokaʾ aboka, wa nera nuk an elegosuk.

¹⁹ Wera, Imik Neyung ara Kristus pik uboka soko nim ara sikja meknenaʾ era eib loboka, al nong ab, sikeneb neikaʾ hiyiwousuk. Dara nuk ara, ban Imik Neyung adya neikaʾ hillisil yub enyek, lero yabalalulum aboka elegousuk.

²⁰ Anasa nuk dara, Kristus adya nadya wa webnokaʾ aboka boklesil nang ulumab. Imik Neyung ara nu pik uboka, alja yub era lelemla. Nunda Kristus amba leboka, ugunda Imik Neyung ab, neikaʾ hiblulumaʾ aboka yeiriwoka molowasab.

²¹ Kristus pik uboka, nuk Imik Neyung alja peldisinaʾ danokaʾ aboka, Kristus ara malya unaʾ elgomnya benyek, Imik Neyung adya Kristus ara nunsamba leboka malya unaʾanya nenemok.