2 KORINTUS 13 - PERJANJIAN BARU NALCA YUBA

Sidyaʾ Wenewok Yuba

¹ Nera winilinya ugunuk an kemel yanesin. Imik Neyung yuba bukuk sam ara, ”Yokaʾ-yokaʾ damoka lanalamlaʾ ara, nimi penya gom, winilya gom nang edya, aldib nunja okoka eiyimouba hen enyek, aldib unumokaʾ ara beknaʾ dangalamla,” aro lebok.

² Wenera, ugunub nab dara, mok bokdangoka ulumab bok, penenya sum enyek neksisa sok, wen neknesin. Wera, nak ugunuk an yanamna sum era, men unu meknemek nim ek hnon, yok nim ek hnon igin eleklemnesinaʾ ara denganaʾ orok ubnamlaʾ anasa, orowek neksin.

³ Ugunda Kristus ara nak pik uboka yuba salamlaʾ ara, ugunda beknaʾ enyek eibnobaʾ aboka ululumaʾ anasa, neksin. Kristus adya ugunuk unulusilaʾ ara, alda hmeng unggulusil bok, ugun hnoum migib uboka welesil.

⁴ Kristus nong anyek, hmengaʾ lomok, oboka gal ak glabemek bok, wera Imik Neyung migib adya ulmorulamla. Numbabya Kristus lomok uboka hmeng ulumabjok, ugunuk an wa welemnesab anasa, Imik Neyung migib adya Kristus ablaboka ulumnamab.

⁵ Ugunda Kristus ak ganya ologoka dib senelum gom aboka, ugunda hnonok-hnonok sunuldalalulum. Ugunda dib senelemun bok dara, Kristus Yesus ara ugunja ganya lomok ulusilaʾ ara, ugunda elgom de? Unggulusilya dara, sununaʾ ak sokol lololum.

⁶ Bok nuk dara, anaso sununaʾ ak ara sokol longgulumabaʾ ara, pe ella ublulum senelamna.

⁷ Ugunda meknewomunuk aboka, Imik Neyung adya aralesululaʾ aboka mololesab. Nuk dara, sununaʾ ak sokol lolomak senewanesisengaʾ anaba, alda ugunuk Imik Neyung adya unuwanok senelelanya nenyek, unuwanalum aboka mololesab. Nuk sokol longgulumak senewanokaʾ aboka ununggulumab.

⁸ Nunda perob jong unaʾ anyek malya nenewamenggom anasa, nunda jong unaʾ amba ok; welemab.

⁹ Nunda hmeng ulumeibyaʾ anaba, ugunuk perob danggiga balamnelum dara, perob senelemab. Ugunuk gobdo perobaʾ anyek ulululum aboka, mololosab.

¹⁰ Imik Neyung adya nak an eleganyok migib era, nimi malya nenelelulaʾ aboka eleganggubnyok bok, alda perobaʾ nenelelulaʾ aboka eleganyokaʾ anasa, wera na yanamna sum era, Imik Neyung adya pe unuwolululaʾ aboka eleklenel migiba doboka, gasaʾ anyek dukaʾ lolom-lolom hisinyek aboka, ban momnya donaʾ enera, nara ugun gangganek an unaʾ orok salek men beibsin.

Sidyaʾ Gibsuk Yuba

¹¹ Anya wera, hemyabo nim o, ugunda sobaʾ ei-ei ganya ok boboka, ganya kaboka pe ulunob ganya sobaʾ bololulum. Heknaʾ ganya hnon bololulum. Ugunda neik ganya ok boboka, neikaʾ kwebdangoka ulululum. Dara, Imik Neyung wanaʾ hwam ok uboka, heknaʾ ok ululanya bedya ugunuk ok ulumnesil.

¹² Yuba dolomak nimi geknebaʾ uboka, na kabo nim aboka pe gibdangoka ublulum.

¹³ Munaʾ Imik Neyung mab anyagan ulumak nim edya, ugunuk perob aboka gibsak.

¹⁴ Wenelesilnya Yesus Kristus adya ugunuk wanaʾ uboka eleksinaʾ hnon, Imik Neyung adya wanaʾ ulusilaʾ hnon, Imik Neyung Geisinya adya ganya kweldanaʾ hnon, ugunuk ulusulul. Nara Paulus bedya gibsin e.