2 KORINTUS 10 - PERJANJIAN BARU NALCA YUBA

Paulus Al Nong Ak Lebdok Yuba

^1-2 Wera na, Paulus bedya ugunuk yokaʾ unuwanalum gom aboka lebnamna. Ugunub neikaʾ ok ubna dara, namenaʾ ulumna bok, naba yok mok sam ubna dara, asaʾ ganya boboka wenyalasil alanyak. Hnon yok nim era, sokok an ununaʾ enyek perob senelemak nim era nuk wensenelesak. Anasa, ban nim enyek asaʾ ganya boboka alamaʾ lebnesin bok, nara ugunuk yanya danyek, anaso wenyhesinyek aboka, wenyok nara Kristus adya namen ganya pik uboka lelesin.

³ Nunda sokok an anam ulumab bok, sokok nim oldalamaknya nenesoʾ ak, oldanggulumab.

⁴ Nunja sokok an oldalamabakanya, bolomab yina mal era, sokok abnya nek bonggulumab bok, nunja yina mal era, Imik Neyung migibaʾ goululamlaʾ ak bolomab. Wera an yina mal enedya, gasa mouboka welemak oulyang ek dolul meneklemab.

⁵ Imik Neyung ak ella danganaʾ anyek, malya nenewanobaʾ aboka imik neneldalalanya nidyaʾ golol meneklemab. Nunda yok-yok seininaʾ lanalamlaʾ nidyaʾ ara, Kristus senelamlaʾ ak bo beil balamab.

⁶ Ugunuk dara, yuba pe keboka unulumun dara, yok bleknemakaʾ nidyaʾ ak ara, nunja igin eleklemnemab.

⁷ Ugunja hogung ak laga ululanya nenyek kemelelulum. Nimi ben hnon, nara Kristus adyaʾ ak ulumna senebdalya dara, al damnya nara benyek Kristus aljinya ulumna senelamla sok, numbabya Kristus adya nim ek ulumak senewosulul.

⁸ Imik Neyung adya migib eleklesilaʾ ara, ugunuk ganya nauba nelelulaʾ aboka eleklesil, bok ganya malya nenewanokaʾ aboka eleknenggulusil. Anasa, nuk eleklesil migib ek ara, nara hnon nonggo henesinya dara, alya ubnenggununel.

⁹ Dara, nadya momnya doboka beillilesinaʾ adya, ugunda hekasa ulusil aboka lok ganya bobmunuk senelamna.

¹⁰ Nim adya ok dara, Paulus bedya momnya doboka beillilesil yub era, pe gasaʾ migib nongaʾ lelemla. Bok al nong anyek, oka nu gangganek ulumla dara, alda hmeng so ulumlakanya, alja yub era, dolbalek so dangalamla, alanyak.

¹¹ Ban anaso ganya bolomak nim era, nunda ugun gangganek ok ubna dara, unuwanamab ara momnya donaʾ ak beillilamnaʾ anasoʾ ok sunuwoka unuwanamab, senewanok.

¹² Nunda perob aboka nonggo aldalamak nim ek, neikaʾ maknenggunusibya. Onoʾ sikja ununaʾ hnon, nunja ununaʾ hnon, anaso-anaso aboka webnenggunusibya. Sikda sik nong ara, anaso nang ek ulumab aboka sunubdangoka, sik nong anyek nunda hekaʾ anasoʾ ak ulumab aboka makaldalamak. Dara sikda ban unuldalamaknya nenedya dongdang alamak.

¹³ Nunda anasoʾ ak ununggulumab. Nunda pelemab alamab dara, wera Imik Neyung adya unulumnulum aboka garasukaʾ ak ok sunuwoka pelemab alamab. Dara, ugun nong ara garamok mok ek an ululum.

¹⁴ Nunda pelemak alamab ara hwiboka lenggulumab. Ugunuk lero yanggusuba dara, hwiboka lelemak henesiseng bok, nunda Kristus perob lero yanggan yub era ugunuk lero yeilisubaʾ anasa, orok.

¹⁵ Imik Neyung adya ugunda anyagan welemnelum aboka gamaʾ iknenggusukaʾ ak an, yok nim edya welemaknya nenesa nonggo anggulumab. Bok nunda hnonok senelemabaʾ ara, ugunja yuba dib senenaʾ anyek nauba danggiga balamnamla dara, nunjinya nauba dolul, senelemab.

¹⁶ Dara, nimi yok nang edya welemaknya nenesa nonggo anaʾ loboka, ugunuk ara hwiboka perob lero yanggan yub era, mok gogoka webnemab senelemab.

¹⁷ Imik Neyung yuba bukuk ara, ”Nimi yokaʾ-yokaʾ amba nonggo hunun senelelanya bera, Imik Neyung adya seleb welemlaʾ anyek eiyiwoka nonggo alalul,” aro momnya dobok.

¹⁸ Nim adya, gigildalalanya bera, aldib pe ulumla gomaʾ, bok Imik Neyung adya gigilamla nim ek hnonok aldib pe ulumla.