1 YOHANES 4 - PERJANJIAN BARU NALCA YUBA

Imik Neyung Ganya Ab, Yok Ganya Eb Yuba

¹ Nadya wanaʾ ulusin hemyabo nim o! Sondaʾ anasa nunda ununumnaʾ len nang aboka, bobnenewoka lemek nang era, mok soko nidyaʾ ob lelewal bok anasa, yok-yok senenaʾ ak ara salyaʾ dib senenaʾ ara loboka, alda men ganya seininaʾ enera Imik Neyung adyinya gom, nera yok gom aboka men sunuwomunjok, wera aldib senewanalum.

² Wera ugunja nera, Imik Neyung ak ab ganya seininaʾ ara ban, anya yok seininaʾ era ban, aboka okoka beknaʾ ella danalumaʾ ara, ban adya ella danalum: Yesus Kristus ara sokok an nimi dangoka yeilimok aboka, laga lelelanya benyek, wera Imik Neyung ak ab seinilelanya bera an.

³ Bok Yesus ara anaso aboka laga lenaʾ orok dara, ban ganya seininaʾ era Imik Neyung ak ab lananggulumla. Ban ganya seininaʾ era Kristus ak, isaʾ nenelemak seininaʾ ek ulusil. Hem yab o, ugunja yok seininaʾ sokok yanamla an yuba kelumaʾ ara, wera sokok an seleb yeiniboka ulumla.

⁴ Bok najabo yab, ugunuk dara, Imik Neyung alja mab ululum. Sokok an ululanya nera mek so bok, ugunuk ulusil Geisinya bera, senenggomaʾ migibaʾ ulusilaʾ anasa, wera ugunda sondaʾ anasa ununumnaʾ lelemab alamak nang ek, ugunja seleb oblamagelum.

⁵ Sondaʾ anasa nunda ununumnaʾ lelemab alamak nang era, sik nong ara sokok anyeb ulumakaʾ anasa, sikda sokok anyebnya nek geklewoka lero yabalamak. Dara, sokok nim era sikja yuba kelemak.

⁶ Bok nuk dara, Imik Neyung ak ab nim ulumab. Dara, Imik Neyung ak ella ulumak nim era, nunja yuba kelemak. Bok, Imik Neyung ak ab unaʾ orok nim edya dara, nunja lelemab yub ek kenggulusak. Wera nunda ban adya dib ulumla ganya seininaʾ ab, sondaʾ anasa seininaʾ eb, ella dangalamab.

Imik Neyung Ara Wanaʾ Ulusilnya Ulumla Yuba

⁷ Nadya wanaʾ ulusin hemyabo nim o! Wanaʾ unaʾ ara Imik Neyung ak ab lanalamlaʾ anasa, nunda wanaʾ uldalamnemab e. Wanaʾ ganya ululanya bera, alda Imik Neyung adya beiyimoknya ulumlakanya, alda Imik Neyung ak ella ululanya bera an ulumla.

⁸ Imik Neyung ara wanaʾ ululanya anasa, nimi ben hnon alda wanaʾ unggulumla dara, wera Imik Neyung bek ara elgom ulumla.

⁹ Imik Neyung nuk yadyek ulusukaʾ damok ara, Imik Neyung alja yando me hnonok bok, nuk embengaʾ unaʾ al adya dobnokaʾ aboka sokok an bokol yeilisukaʾ adya, alda wanaʾ ulusukaʾ ara amasuk.

¹⁰ Wanaʾ unaʾ ara ban: Nunja Imik Neyung ak men wanaʾ ulumouba gomaʾ, bok alda Imik Neyung adya nuk wanaʾ ulusuukanya, nunja malya unaʾ amba doboka bobogosululaʾ aboka, alja yando me hnonok bok nunsamba bokol yeilisuk.

¹¹ Nadya wanaʾ ulusin hemyabo nim o, Imik Neyung adya nuk anaso unu wanaʾ ulusil dara, wera numbabya nun moumen wanaʾ uldalanob.

¹² Nimi hnonok sibin anaba, Imik Neyung ak ara heng eilinaʾ orok bok, nun moumen wanaʾ uldalamnemab dara, Imik Neyung ara nub neikaʾ kwebdangoka ulumnemabakanya, alja wanaʾ unaʾ ara, nun lomok kalasil.

¹³ Imik Neyung adya alja Geisinya benyek, seleb nuk elegesuk dara, wera nunda Imik Neyung lomok ulumabakanya, onoʾ Imik Neyung ara nu lomok ulusilaʾ ara, ella ulumab.

¹⁴ Imik Neyung bedya me nera, Imik Neyung adya soko nimi blebsinaʾ dubnya dolulaʾ aboka bokol yeilimokaʾ anyek, nunja seleb okoka eiyimoubakanya, nim ek leb elekdo yabalamab.

¹⁵ Heknedya Yesus ara Imik Neyung bedya me aboka laga lelemla dara, Imik Neyung ara al lomok ulumlakanya, bera onoʾ Imik Neyung lomok ulumla.

¹⁶ Dara nuk dara, Imik Neyung adya nuk wanaʾ ulusilaʾ ara, nunja ella dangoka dib senelemab. Imik Neyung alda wanaʾ unaʾ damoknya ulumla. Nimi wanaʾ unaʾ adya ok deknewoka ululanya bera, alda Imik Neyung ab neikaʾ hiboka uluraakanya, onoʾ bera Imik Neyung ab neikaʾ kwebdangoka ulurak.

¹⁷ Sokok anyeb, numba Kristus ulumla sok, unu ulumeibya anasa, Yesus adya yana lelewanasil sum era, wera asaʾ ganya bobnemab aboka, wanaʾ unaʾ ara nu lomok kalasil.

¹⁸ Wanaʾ unaʾ ak sam ara, lok ganya hnon unggulumla. Wanaʾ unaʾ kanaʾ adya lok ganya dengallilimla. Lok ganya ara, heng goubnaʾ adya lanalamlaʾ anasa, lok ganya bololanya bera wanaʾ ganya anam kanggulumla.

¹⁹ Imik Neyung adya youmaʾ enyek nuk men wanaʾ ulusukaʾ anasa, nunda wenera wanaʾ ulumab.

²⁰ Nimi ben hnon leleladya, ”Nara Imik Neyung bek wanaʾ ulumna,” alaladyok, alkabo nim ek wanaʾ usinaʾ orok dara, alda sondaʾ lelelanya ulumla. Anasa wera, nimi ben hnon alkabo heng eillililanya benyek wanaʾ unaʾ orok dara, wera Imik Neyung heng eilinggululanya bek ara, alda hekaʾ huboka wanaʾ ubnamso do?

²¹ Ban nenesa leboka, Kristus adya unulululum aboka nuk elegesuk yub era ban: ”Heknedya Imik Neyung ak wanaʾ ulumla dara, wera alkab ek anaba wanaʾ ululul,” hyok.