1 YOHANES 3 - PERJANJIAN BARU NALCA YUBA

Imik Neyung Alja Mabo Ulumab Yuba

¹ Imik Neyung adya nuk hyak nauba yadyek ulusilaʾ anyek, ugunda kendululum. Anadya wera, nuk nadya mab aboka si silisil. Dara aldib, nunda Imik Neyung alja mab ulumabaʾ aja. Anasa wera, soko nim era Imik Neyung ak mekaʾ elgom ulumakaʾ adya, nuk anaba elgom ulusak.

² Nadya wanaʾ ulusin hemyabo nim o, nunda wenera Imik Neyung mab ulumab bok, eimik ek dara, hekaʾ huboka ulumnemabaʾ ara, okoka laga danganggulumla. Bok Kristus anyek eimik yanamla dara, alja nong yokaʾ nong ak eibnamabaʾ anasa, nunda also danamab anyek hnonok, ella ulumab.

³ Nimi nidyaʾ ban nenyek nak unuwanenel senewoka ganya welemak nim era, al nong ara pe geisa ulunun aboka diri uldalamak. Wera Kristus anaba geisa ulumla sok, malya unaʾ ak ab loboka geisaʾ ak ulunun senelemak.

⁴ Malya ulumak nim era, malya unulumak dara, Imik Neyung adya unuwanalum an yub ek blekoka unulumak. Wera malya unaʾ damok ara, Imik Neyung adya unuwanalum an yub ek bleklemakaʾ damok ara al an.

⁵ Kristus sokok sam yeilimok ara, nim adya malya unaʾ doboka bobogosununaʾ aboka yeilimokaʾ ara, ugunda ella ululum. Dara, malya unaʾ ara Kristus lomok ara hyak unggulumlaʾ ara, hnon ella ululum.

⁶ Ben hnon ara, Kristus ablaboka neikaʾ kwebdangoka uluraknya bera, sob-sobaʾ sounuwoka malya ununggulumla. Sob-sobaʾ sounuwoka malya unululanya bera, Kristus ak anam eilinaʾ orokaʾ uboka, alda hyak elgom ulumla.

⁷ Najabo yab o, yok nim edya ugunuk malya ub elegosunuk senewoka, ugun moumen sene pika yaraldanggom mem. Kristus adya pe unulamla sok, onoʾ perob ok unulumak nim era, perobaʾ nenelamla nim era an.

⁸ Iblis ara youmaʾ ek moruwoka malyaʾ ok ulmorulamlaʾ anasa, bok weneba sobaʾ malya uldibilloklomak nim era, Iblis alja mab ulumak. Imik Neyung me yeilimokaʾ ara, ban Iblis alja wa nenyek orok nenewonunaʾ aboka yeilimok.

⁹ Seleb Imik Neyung mabo dangamek nim era, Imik Neyung alja unulamla diligaʾ yinaʾ anaso seleb sikenek ulusilaʾ anasa, sobaʾ malya unubmoruwamenggom. Dara onoʾ, sikda Imik Neyung adya mengesuk nim anasa, wera sob-sobaʾ malya unubmoruwamenggom.

¹⁰ Anara Imik Neyung mab ulumak, nenera Iblis mab ulumakaʾ aboka, beknaʾ damoka ella dangalamabaʾ ara ban adya. Heknedya Imik Neyung seinilamlaʾ ak ununggulumla gom, al kab ek wanaʾ unggulumla gom dara, wera bera alda Imik Neyung alja me unggulumlaʾ ara an.

Yok Nim Eb Wanaʾ Uldalamak Yuba

¹¹ Nunda wanaʾ uldalamnemab an yub era, men youbuka ugunuk seleb leb elegesik.

¹² Kain bera bisaʾ wa wenya dangoka, alja weis oboksonya nera, nunda ununaʾ ara mem. Hekasa Kain bera alja weis ek omok do? Nera alja unulumoknya nek dara, malya bok, alja weis edya unulumoknya nera perob anasa, obok.

¹³ Nadya hemyab o, anasa wera, sokok an nim edya ugunuk malya nenewoka derewoka walasak dara, ugunda salya lelesak aboka lok ganya bonggom.

¹⁴ Alda nunja ella ulumabnya nera, nunda somoknaʾ damok ok ab ara goubuka, embengaʾ unaʾ damok ok sam yeilimoubnya hnonok, ella ulumab. Nunda ban nen ella ulumabaʾ ara, nun kabo nim ek wanaʾ ulumabaʾ adya, anara ella ulumab. Wanaʾ unggulusilnya bera, wera weneba alda somoknaʾ lomok or anam ulumla.

¹⁵ Nimi ben hnon alja hem bek lek senelelanya bera, alda nim osinya ulumla ara an. Anasa nim osin nang hnon ulumak dara, sikda embeng unaʾ orokaʾ ak ulumakaʾ hnonok ella ululum.

¹⁶ Nunda ban pik enyek anyeb, wera nimi yok nim ek wanaʾ unaʾ damok era ella dangalamabaʾ ara, Yesus Kristus alja nong era, nunsamba leboka, nuk elegosukaʾ adya, ella dangalamab. Anasa wera, ban unuwosuk bar aboka, nunja nong enyek, nadya hemyab emba aboka elek lobnesibya.

¹⁷ Nimi ben hnon alda sokok an yokaʾ-yokaʾ ara pe nauba ululabok, alkabo ben hnon bonaʾ garan ulumlaʾ eilliladyok, aranaʾ loboka eil lolomla dara, ban unululanya bera, alda Imik Neyung ak wanaʾ ululanya bera an heneseng de?

¹⁸ Najabo yab o! Nunda sibamaʾ adyok gom, yuba dem adyok wanaʾ uldanaʾ ara mem. Bok nunda ganya goluwoka dib arawoka, dib aralemab anaʾ ara, nunja dib unulumnamabaʾ adya, wanaʾ uldalamnamab.

Imik Neyung Hogung Ak Asaʾ Ulumab Yuba

¹⁹ Wera ban nenedya nuk dara, Imik Neyung alja mab ulumakaʾ ara ella uboka, onoʾ ban nenedya danyek Imik Neyung saramek ara, nunda pe ganya daboka ulumab.

²⁰ Nunda meneng ganya edya malya nenelesil bok, Imik Neyung adya alja el danganaʾ ara, senenggomaʾ ulumlakanya, nunjinya nera mekaʾ me anasa, Imik Neyung anyek alda hyak yokaʾ-yokaʾ nidyaʾ ara ella ulumlaʾ ara ella ulumab.

²¹ Nadya hyak wanaʾ ulusin hemyabo nim o, anasa wera, nunja ganya edya nuk malya nenesinaʾ orok dara, wera nunda Imik Neyung ak pe asaʾ ganya boboka alak binimab.

²² Dara, hnonda alja yub ek pe keboka unuwoka, onoʾ alja pelemak senewoka ganya sangelesilnya nenyek unulumnamabakanya, nunda yokaʾ-yokaʾ alak moloweibyaʾ ara dobnemabaʾ ok ulumla.

²³ Imik Neyung adya unulululum aboka oruklesilnya nera an: Nunda alja me si Yesus Kristus ak dib senewoka, onoʾ Kristus adya nuk lebsuk sok, nun moumen wanaʾ uldalamnemab aboka oruklesil.

²⁴ Nimi nidyaʾ Imik Neyung yub ak dib senewoka ganya ologoka dolomak nim era, Imik Neyung al lomok ulumaakanya, albabya sik lomok ulusil. Hnonda alja Geisinya era seleb nuk elegesukaʾ adya, wera Imik Neyung ara nu lomok ulusil senewoka ella ulumab.