1 YOHANES 2 - PERJANJIAN BARU NALCA YUBA

Kristus Ara Nu Aralesil Yuba

¹ Najabo yab o! Ban momnya en ugunuk momnya doboka beibsinaʾ ara, ugunuk malya ubmunuk aboka ubsin. Bok, hnon malya umeibya dara, wera nunsamba arawoka sasinya ben hnon ulumlaʾ ara, nera Yesus Kristus pelelanya bek lebna. Aljaʾ Neyung bek malya unaʾ doboka bobogeisilom aboka mololesil.

² Wera Yesus Kristus al nong adya pika moruwoka nunja malya unaʾ amba somogousuk. Nera or nunja malya unaʾ ok gom, al nidyaʾ soko nimi malya unaʾ amba somogok.

³ Nunda Imik Neyung yub ak pe keboka unulumab dara, wera nunda Imik Neyung ak dib ella ulumakaʾ damok ara an unulumab an.

⁴ Ben hnon leleladya, ”Nara Imik Neyung ak ella ulumna,” alaladyok, alja alak oruklamla anyek pe ununggulumla dara, bera alda sondaʾanya ulumlakanya, dib yub ara alja ganya lomok unggulumla.

⁵ Bok nimi hnon Imik Neyung yub ak pe keboka unululanya bera, alda Imik Neyung wanaʾ unaʾ ak seleb kaboknya be ulumla. Wera nunda Imik Neyung ab neikaʾ kwebdangoka ulumabaʾ damok ara an.

⁶ Heknedya nara Imik Neyung ab neikaʾ kwebdangoka ulunam wenyalalanya bera, alda Kristus adya nidyaʾ unulumok diligaʾ doboka lunuwoka unululul.

Wen Unulululum Alamla Yuba

⁷ Nadya hyak wanaʾ ulusin hemyabo nim o! Nadya wen ban momnya doboka beibsin anara wenyek yuba gom. Alda ugun anam Kristus ak dib senewoka dob einilum sum ugunuk seleb lesiknya nenyek, ugun anam sum Imik Neyung yuba nonga kelum yub ek beibsin.

⁸ Ban men wenyhen bok anaba, onoʾ wenyek yuba hnon momnya doboka beibsin. Nera dib ulumlaʾ ara Kristus alja nong lomok hnon, ugunuk ulusilaʾ hnon, eillilemakaʾ anasa lebna. Anasa wera, gunaʾ ak dara, dengabgiga balamlakanya, dilinaʾ dibaʾ ak dara, wera seleb yebel einilamla.

⁹ Nimi ben hnon, ”Nara dilinaʾ ak ulumna,” alaladyok, al kab ek lek senelamla dara, bera weneba or anam gunaʾ ak ulmorulamla.

¹⁰ Alja hem yab ek wanaʾ uboka ululanya bera, alda dilinaʾ ak pe ulumla. Wera anadya alak yokaʾ unuwalya dara, yok nimi malya unaʾ lomok malyinggijek senenaʾ ara, oluk diknaʾ hyak unggulumla.

¹¹ Bok alja hem yab ek lek senelelanya bera, alda gunaʾ ak or anam ulumla. Alda gunaʾ lomok sam yabalamlakanya, gunaʾ adya alja henga leblamlaʾ adya, alda mok enyek an binimnaʾ ara elgom ulumla.

¹² Najaba yab o, ban ugunuk momnya dobsinaʾ ara, Kristus si pik uboka ugunja malya unaʾ seleb meewousukaʾ anasa ubsin.

¹³ Neyung yab o, ban ugunuk momnya dobsinaʾ ara, men youmaʾ youbuka ulumoknya bek seleb ella ululumaʾ anasa, ubsin. Goubenya nang o, ugunuk ara yu hwam bisaʾ enyek seleb oblamakalumaʾ anasa, momnya dobsin.

¹⁴ Najabo yab o, momnya doboka beibsinya nera, ugunda mekmab era ugunja neyung Imik Neyung bek seleb ella dangalumaʾ anasa, ubsin. Neyung yab o, ugunuk momnya doboka beibsinya nera, ugunda men youmaʾ ulumok yub ek seleb ella dangalumaʾ anasa, ubsin. Goubenya nang o, ugunuk momnya doboka beibsinaʾ ara, ugunda migib ululumaʾ anasa, ubsin. Imik Neyung yub ara ugunja ganya ek seleb ulusil. Dara onoʾ, yu bisaʾ ara seleb ugunja yugom nenelumaʾ anasa, ubsin.

¹⁵ Ugunda soko anyek wanaʾ unaʾ ara mem. Anyek okoka unu wanaʾ unaʾ anaba yokaʾ-yokaʾ nidyaʾ soko dubuk sam ulumlaʾ deng anyek, wanaʾ unaʾ ara mem. Ugunda sokok anyek wanaʾ ulumun dara, Neyung bek ara wanaʾ unaʾ ara unggulumunja.

¹⁶ Nidyaʾ yokaʾ-yokaʾ sokok an ulumlaʾ ara, nimi ganya malya ulumak ganya edya oka delesilaʾ hnon, nera heng adya eibnakanya dobsinya senelemakaʾ hnon, onoʾ perobja aboka nonggo alamakaʾ hnon, ban nidyaʾ ulumla deng dara, Neyung bek ab gom, alda sokok anyebaʾ ak ulumla.

¹⁷ Soko nim eb, yokaʾ-yokaʾ soko dubuk ulumla nidyaʾ ara, nim adya perob senelemakaʾ anyek, seleb dengabgiga balamla. Bok, nim Imik Neyung yuba doboka dib senelemak nim enyek, hnonok or sobaʾ ulmoublemnemak.

Kristus ak Isaʾ Nenelemak Yuba

¹⁸ Najabo yab o! Yokaʾ-yokaʾ nidyaʾ sidyaʾ daknamla sum era, seleb oka dal! Hnonda eimik era Kristus ak isaʾ nenewanelanya hnon lanawanamlaʾ kelumaʾ ara, wera seleb lanawoka, nimi nauba Kristus ak isaʾ nenelemak. Wera anadya nunda sidyaʾ dakna salek era oka dal, senewoka ella ulumab.

¹⁹ Kristus adya alja isaʾ nang ara, nun nang yilaʾ dib unggulumekjok, nuk seleb lo bilisik. Nimi danara nun nimi yilaʾ uluseng bok dara, wera nub neikaʾ ulumnesibya. Bok nuk seleb lo bilisiknya nera, wera aldib nun nang yilaʾ unggulumakaʾ anyek, laga geknewolul.

²⁰ Bok ugunuk dara, geisa ululanya bek ab Geisinya ara ugunuk seleb lobonggosukaʾ anasa, wera ban adya dib nong yub ara, ugunda seleb ella ululum.

²¹ Anasa wera, nadya ban ugunuk momnya doboka beibsinaʾ ara, ugunuk dib nong yub elgom ululumaʾ amba gom. Alda ugunda seleb ella uboka, onoʾ dib yuba lomok ab ara, sondaʾ damoka mekaʾ hnon lananggulumlaʾ ella ululumaʾ anasa, anara weboka beibsin.

²² Sondaʾ lelelanya bek dara, Yesus ara Imik Neyung adya soko nimi blebsinaʾ dubnya anggulumla, alalanya bera sondaʾ lelelanya bera an. Ban wenyalalanya bera, Kristus bedya isaʾ anya ulumlakanya, Neyung beb alja me neb dak, bol nenelamla.

²³ Alja me nek, Imik Neyung me aboka laga lenaʾ orok nim era, Neyung bek anaba dib donggulumak. Alda alja me nek, Imik Neyung bedya me aboka lelemak nim era, wera nera Neyung bek dib dolomak.

²⁴ Anasa wera, ugunda anam yuba dib seneb einilum sum kelum yub era, ganya lomok beiyiwoka pe keeboka diri ulululum. Yuba nong enyek pe keeboka diri bo ulumnelum dara, wera ugunda sobaʾ Imik Neyung ab, alja me neb neikaʾ kwebdangoka ulumnelum.

²⁵ Anya wera, al ban damok enyek, Imik Neyung adyaʾ anaba orowek nuk seleb eleganesin husukaʾ ara, dib embengaʾ ulmoubnaʾ damok ak eleganesin, hyok.

²⁶ Nadya ban ugunuk momnya doboka beibsinaʾ ara, ugunuk sondaʾ amba bobgeregoka lebsinobaʾ aboka ulumak nim ek, anara beibsin.

²⁷ Bok ugunsamba dara, al adya Geisinya yek goulunaʾ ara ugunuk anam ulusil bok dara, nim adya ok hnon ugunuk neknenggunusiseng. Anasa wera, ban yek goulusinaʾ adya yokaʾ-yokaʾ nidyaʾ wen neklesil bok dara, anya wera alja neklesilnya nera, anara sondaʾ ak unggulumlaʾ anasa, anera aldibaʾ ak ulumla. Anasa wera, yek goulunaʾ adya yokaʾ-yokaʾ nidyaʾ neklesilaʾ anyek, ugunda dib senewoka, al lomok ululum.

²⁸ Najabo yab o! Anasa wera, ugunda Kristus ab neikaʾ sobaʾ kwebdangoka ulululum. Anadya wera, asaʾ ganya boboka al yalyaʾ ak binobaʾ aboka, alya anasa lomok doknoweibyek aboka pe keeboka ulululum.

²⁹ Alda pelemlaʾ ok ulumlaʾ ara, ugunda ella ululum. Anasa, pelemak nimi nidyaʾ ara, anera alak ab beiyimek nim ulumakaʾ ara, ugumbabya nen hnon ella ululum.