1 YOHANES 1 - PERJANJIAN BARU NALCA YUBA

Embengaʾ Ulumla Yub Amba Lebok Yuba

¹ Ban yub enyek nidyaʾ ara, nim embengaʾ unaʾ eleklesil yuba men youmaʾ ek moruwoka ulumokaʾ anyek momnya dobab. Nunja o kemoubukanya, heng eiyimouba. Nunja seleb okoka eiyiwoka onoʾ nunja soruk edya seleb salamouba.

² Ban embengaʾ unaʾ en laga dangal yabok sum era, nunda alak okoka eiyimouba. Anasa wera, nunda anasemba leboka ban embenga unaʾ anyek ugunuk lero yabalamab. Wera ban dib embengaʾ ulmoubnaʾ ara, Neyung beblaboka neikaʾ ulurekaʾ ara, alda nuk hogung ak seleb laga dangamok.

³ Wera ugunub nub neikaʾ ganya kwebdangoka ulunobaʾ aboka, nunja seleb heng eiyimouba o kemoubaʾ anyek, ugunuk lel eleklesab. Nunja ganya kwebdangoka ulumabnya nera, Neyung beb, alja me Yesus Kristus ab, neikaʾ ganya kwebdangoka ulumab.

⁴ Ban nenyek nidyaʾ ugunuk wenyaboka momnya dosabaʾ ara, anadya nunja ganya hyak heksululaʾ aboka ubsab.

Imik Neyung Ara Dilinaʾ Ulumla Yuba

⁵ Ban yub enyek alja me nek ab kemoubukanya, ugunuk leb elegesuba yub era ban: Imik Neyung ara alda dilinaʾ ok uboka, gunaʾ ara al lomok hnon mekaʾ unggulumla.

⁶ Nunda gunaʾ lomok anam ulumabjok, nunda Imik Neyung ab neikaʾ ganya kwebdangoka ulumab alamab dara, nunda sondaʾ leldalamabakanya, dib yub ara nunda ununggulumab.

⁷ Bok Imik Neyung anaba alda dilinaʾ lomok ulumla sok, wera numbabya neikik dilinaʾ ak ulumeibya dara, wera nunda ganya kwebdangoka ulumabakanya, alja me Yesus Kristus adya eneng edya nunja yok-yok malya unaʾ nidyaʾ ara mek elegellilisil.

⁸ Nun dam nang leldalamabja, Nak malya unaʾ unggulunel aldalamab dara, wera nu damnya bol neneldalamabakanya, dib yub ara nunja ganya lomok sam unggulusil.

⁹ Nunja malya unaʾ laga lelemeibya dara, Imik Neyung ara bojam uboka, hyak meknenggululanya anasa, alda nunja malya unaʾ meewanasilikanya, nuk malya unaʾ nidyaʾ ak ab geisa neniyiwanesil.

¹⁰ Nunja lelemabja, Nara malya ubnenggumsa wenyalamab dara, wera Imik Neyung ak sondaʾanya nenewoka, alja yub era nunja ganya lomok unggulusil.