1 TIMOTIUS 5 - PERJANJIAN BARU NALCA YUBA

Neik Yuba Donaʾ Nim Yuba

¹ Yamen so nim ek, hogunga gorogoka gasaʾ anyek ooma lenggom, mem. Nadya neyung yabe denga leboka lelesilom. Goubenya nim ek dara, nadya hemyab ulumak senen ganya boboka unululom.

² Wisa gelewa ek dara, nadya genong yab era alan senewoka pe unulusilom. Goubenya gelewa ek dara, sikenek perob geisa ganya adya, nadya hmal gelewa senewoka pe unululom.

Youk Gelewek Aran Yuba

³ Sikbeyok munaʾ gobdo youk gelewa ulumak gelewa ek okoka aralalulum.

⁴ Bok, sikja mab edya mab eb, sikja mabo yak gelewa era ulumeijibok dara, yuba dibaʾ dorob nim aboka, orokaʾ anaba nenyek, Imik Neyung ara perob senelesilaʾ anasa, ban unuwoka sikja neyung genong ak saawoka aralemnemakaʾ ara, men ganya olowoka ella danok.

⁵ Nimi hnon aranaʾ orokaʾ anyek albeyok ulumlya youk gel gera, Imik Neyung alak ok seiniwoka, yubyek inimnek pik arawonulul senewoka alak mololsinilamla.

⁶ Bok nadya dobsinya bobsinya senelamna anyek nidyaʾ gigilamla youk gel gera, nong ak dara, anam embengaʾ ulumla senen bok, ganya ak dara, seleb somogamnaʾ anasoʾ ak ulumla.

⁷ Ban lebnanya nenyek, si gegena ponaʾ orokaʾ anyek pe ulunokaʾ aboka, sikenek pe wenelesilom.

⁸ Nimi ben hnon sik nimi yilaʾ ak hnon, nauba so ara, alja meneng mabo silibaʾ enyek, pe arasinaʾ orok dara, alja yuba dib senelamlaʾ ara, malya gebdangoka yuba donaʾ orok nim ek dara, or sang so bok, ban benyek dara hyak malya nongaʾ ak ulumla.

⁹ Ban damumduk an lebnamna yub enyek, unulumeija gelewa enyek, ugunja dara, wera youk gelewa henelumukanya, momnya dobnelum ara, alja gibnaʾ era denga penya so leboka boklomso dara, hnonda gel genera nenya ara li hnonok doboka alaʾ nenya somogamso dara, or momnya dobnelum.

¹⁰ Gelewa danara ban lebna yub enyek, wera youk gelewa henelumaʾ ara, pe welemla senewoka ella ulumeija dara, alja mabo pe bong-bong aboka weiboka nellilimlya dara, aljaʾ ek yalameija nimi perobaʾ leboka doro diyiwoka, yuba dolomak yok nim ek arawoka, unuruwaʾ garana ulusil nim ek arawoka, nidyaʾ perob wa nenyek dib ganya goluwoka bojam welemeija gelewa enyek, wera or youk gelewa henelumakanya, momnya dobnelum.

¹¹ Bok, nong ara gobenya bok youk gelewa ek dara, youk gelewa momnya dol yabamenaʾ ak ara, momnya dobnenggunulam, mem. Nera sikda nenya ab neikaʾ ulusinim ganya nauba seiniwoka, nara Kristus ab neikaʾ ulunam senenanya nera mek dangoka, men nenya dobnun senenaʾ anasa, sikja si nera momnya donggom.

¹² Nera sikenek momnya dobmun bok, nenya dobdanarak dara, sikja Imik Neyung ak pe bojam ulumnemab ameknya nek blekoka lonaʾ adya, sik dam nang malya uldalamak.

¹³ Onoʾ hnonda nenyek ok gom, alda hnonda neikaʾ ak uldabnaʾ loboka, nim edya ek sam wele goluga unaʾ anasa, loblom. Hyak nauba omomaʾ loksonya nera, yuba miniwoka bol giriknaʾ hnon, yub era sabnenggom yuba bok, meka lelewoka len yuba hnon, yok nim ek bera unulamla aboka salyaʾ hmouna doboka sal giriknaʾ yuba hnon lelemak. Sikenek nera ugunja unuwanalum anaʾ orok wa bok, sikjok salyaʾ welemak.

¹⁴ Nenesa leboka nadya perob senelamnaʾ ara, or goubenya bok youk gel ulumak nim era, nenya dobijekanya me yak dangoka, sikja ek pe wa weboka ulumeijaʾ adya, wera nunja isaʾanya nera al pik uboka nunja si malyaʾ neneweisilyek anasa, wera men nenya dobnok.

¹⁵ Hnon youk gelewa era perob pik era loboka, seleb Satan pik dobdo balamakaʾ anasa, lelemna.

¹⁶ Alda onoʾ seleb yuba dolomak nimi bok, sikja ek an youk gelewa ulumak dara, or sikja sikenek araweisinok. Nenera sikja dara, yuba dolomak nim edya nidyaʾ hiboka aralenok senewoka ubijek. Wera ban unuweija adya yuba dolomakaʾ gobdo nimi yilaʾ orok youk gelewa enyek, sikja hiboka or arawanamak.

Bo Usin Nang Ek Pe Unun Yuba

¹⁷ Ugun yuba dololumaʾ ak pe weboka bo usin nang ek ara, ugunja li penya so sikenek ganya hek elegoka gigilelulum. Nauba so ara, Imik Neyung yuba yeiriwoka nekoka, lel eleklesak nang enyek anaso pe unulululum.

¹⁸ Nenesa leboka, Imik Neyung yuba momnya dobok ara, ”Sapi pam ara gandum wanamaʾ goroklelebok dara, sibamaʾ henga darawoka goubnenggom mem,” hyok. Onoʾ, ”Wa welemna nim era welemnaʾ amba dara, deknaʾ dolomak bok,” hyok, anasa lemna.

¹⁹ Nimi ben hnonjok bo usinnya bek malya ubok aboka yuba bo yanamla dara, kenggom mem. Alda nimi penya winilya aldib meknemokaʾ ak nunja okoka eibuba aboka, yuba bo yanamak dara, or kebnelum.

²⁰ Bok aldib sikda malya ubija dara, yok nim eneba lok ganya bobnok aboka, nimi nauba longolomakaʾ hnoum ab omoma leboka wabnok.

²¹ Nunda Imik Neyung hogung ak ab, Yesus Kristus hogung ak ab, weboka dosuk im lero nang hogung ak sam ulumabakanya, nadya nidyaʾ unuwalom aboka oruklenggenya nera, pe unuwalom aboka orugagen. Nenera na nimi yilaʾ gom, nenera perob lok so nimi gom, senewoka dolbalek asaʾ mek so ununggom. Alda al nidyaʾ nim ek neik so perob ok unululom.

²² Anda nimi yok nim ek benera Wenelesilnya bedya wa webnamla aboka, men berra soruka dib yaboka ununggom mem. Yok nimi malya unaʾ ak dara, anja dob salawoka neikik ununggom mem. An nong anyek pe geisa ululomaʾ aboka diri uldalalom.

²³ Anda mek dem ok sobaʾ denggom. Alda anja mona malya ulunggelekanya, sobaʾ neiklelamnya nenesa, nonga pewogululaʾ aboka, anggur meka hnon sum era mekaʾ delelom.

Malya Unaʾ Laga Danamla Yuba

²⁴ Hnon nimi malya unaʾ ara, anam henga goubuka yana lelewanggunabok laga dangalamla. Bok, hnonda seleb henga goubuka laga yana lelewan danyek, laga dangalamla.

²⁵ Neik so, perob unaʾ ara hnonda laga an ulumla. Bok, hnonda wenera berra laga unggululabok, wera doknowoka ubnamenggom anasa, eimik laga danamla.