1 TIMOTIUS 4 - PERJANJIAN BARU NALCA YUBA

Yok Nang Edya Meknewoka Neksija Danyek Unuwanalam Hyok Yuba

¹ Wera, Geisinya adya nuk laga poboka neklesilaʾ ara, dakalongnaʾ berem salek era, hnon nim era yuba dib senelemakaʾ ara goob loboka, sikda sondaʾ amba bobnenewoka lelesak yub ek hnon, bisaʾ adya ban nenyek unuwolulumaʾ aboka neklesil yub enyek, kebnemak.

² Sikda yuba lelesak nang era, sikja lelesija yub era sondaʾ yub ella ulumakjok, sene bobnenewoka lebnesak. Sikja ganya lomok ara sobaʾ bleilimna girik ek heilimla soko adya, sik damnya dara nunda malya ulumabaʾ ara ella unggulumak.

³ Sondaʾ amba bobnenewoka lelesak nim era, sikja dara, gela donaʾ ara mem, alamak. Hnonda denaʾ ara salyaʾ dero yabanaʾ ara mem, alamak. Ban wenyalamakaʾ anaba, denaʾ ara Imik Neyung ak dib senewoka dib yub ella ulumak nim edya, denaʾ ara perob aboka Imik Neyung ak giboka delenokaʾ aboka uyimok bok, lelemak.

⁴ Imik Neyung adya yokaʾ-yokaʾ nidyaʾ uyimokaʾ ara, perob anasa, Imik Neyung alak eleklesilimaʾ perob wenyaboka doboka den dara, wera nera memaʾ hnon unggulumla.

⁵ Yokaʾ-yokaʾ nidyaʾ ara, Imik Neyung yub adya hnon molonaʾ adya hnon, geisa nenelamlaʾ anasa, yokaʾ-yokaʾ ara, lek aboka dogom anaʾ ara, orok.

Wa Pe Welelanya Bemba Yuba

⁶ Ban nidyaʾ lelenanya nenyek, nunja hemyabo yuba dolomak nim ek, pe neklesimen dara, wera anda Yesus Kristus adya perob wa wenya dangamenaʾ adya ulumenja. Onoʾ nunja dib senelemabnya, Imik Neyung bedya alja yub edya, anja ganya ek lulungaʾ hmobdangoka anja wen an neklenjakaʾ doboka ululam yub ek an, sunuwoka ulumen dara, perob wa wenya ulumenja.

⁷ Nimi ganya penaʾ orok yuba, salyaʾ hwam neknaʾ yub ek ab, mok nenewoka ululom. Na nong ara, Imik Neyung alsamba ok pe ulunun senewoka, an damnya sunuwoka pe ululom.

⁸ Nong amba migiba nenendamba dara, or mek perob so dangalamla bok, yuba doboka un ganya migiba neneldamba dara, nauba perob nonga dangalamla. Nera seleb wen salek amba hnon, eimik yanamla salek amba hnon, perob dangalamla an yuba hnon orowek ulumla.

⁹ Ban yub enera hyak dib nong anasa, doboka onoʾ hyak dib senewanok.

¹⁰ Nimi nidyaʾ blebsinaʾ dubnya, Imik Neyung embengaʾ ululanya bek, dib nong ara, nu yuba dib senelemab nimi bleblesilnya bek eleganesin amokaʾ ara, dib eleganesil anyaʾ aboka, nunda duboka yeiriwoka welemab.

¹¹ Ban nenera nidyaʾ dib senewolulum aboka orugoka neklesilom.

¹² Anda goubenya ululamaʾ anasa, yok nim edya anak, alda mek goubenenya benyaʾ seneweigijek. Bok alda saawoka, Imik Neyung mab adya anja unulumennya nenyek diliwagenokaʾ aboka, anja yuba sanaʾ maka hnon, anja ununaʾ hnon, nim ek wanaʾ unaʾ hnon, ganya geisa uboka Yesus Kristus ak dib senen ganya hnon boboka bojam ululom.

¹³ Dara onoʾ anam yanggumnya salek era, Imik Neyung yub ara nimi yok nim ek hnon laga einib elegoka, pe wenewoka sikenek nekelmorulesilom.

¹⁴ Ununumnaʾ lelemek nang edya ansamba hnon orowek geklewoka lebjeekanya, nimi bo usin nang edya anak soruka luluwoka, Imik Neyung ak alda ban wa welemnamla aboka soruk diyinjekaʾ adya, ban unu welelomaʾ aboka elegenjeknya nera, beillonggom, mem.

¹⁵ Ban nidyaʾ lebnanya nera pe welelom. Anja perob danggiga balamenaʾ ara, nimi nidyaʾ eibgenokaʾ aboka, ganya goluwoka bojam unuro balalom.

¹⁶ Anja unulumenaʾ hnon, anja neklesimenaʾ hnon ara, an moumen anaba pe keebmoubdangoka unulumnelam. Ban nenyek pe unulmorulemen dara, an dam nang hnon, anja yuba kelenjak nimi hnon, nidyaʾ blebnesil.