1 TIMOTIUS 2 - PERJANJIAN BARU NALCA YUBA

Yuba Donaʾ Nim Edya Mololomak Yuba

¹ Hyak men youbuka ugunuk, molonaʾ ab, heng uboka lenaʾ ab, nauba yokaʾ-yokaʾ dib nong amba hnon, nimi nidyaʾ amba Imik Neyung ak perob aboka molowoka giblelulumaʾ aboka, ugunuk wenewoka moloweisin.

² Hnon ara, mok soko dub nang amba hnon, yokaʾ-yokaʾ duka salawoka bo ulumak nim emba hnon, mololululum. Nu ulumab soko namen uboka, nunda Imik Neyung bek lok ganya boboka hyak pe ulunobaʾ aboka unuro mololululum.

³ Ban nenesa ok unuwoka mololomab dara, hyak pelemabaʾ ara an. Dara, nunja bleblesilnya Imik Neyung adya perob senelesilaʾ nong ara alan.

⁴ Imik Neyung alja hnonok senelamlaʾ ara, nimi nidyaʾ ara blebsinaʾ damoka doboka dib yub ara nidyaʾ ella danok senelamla.

⁵ Imik Neyung ara al hnonok ok ulumlakanya, nim ab Imik Neyung ab hnoumunga wiknenanya soko nang doknya bera, Yesus Kristus hnonok gobdo ulumla.

⁶ Alda nimi nidyaʾ amba leboka sikja malya unaʾ ak blebsunun badya aboka, alja nong enyek leb elekdonunaʾ aboka, elegesuk. Dara nera, sum enyek unuweisinya senewoka orowek seinimok sum era, yenewoka laga dok dara, al nong elekdok.

⁷ Dara wera ban nenesa leboka, nak yuba lel eleksinya lenaʾ gaknya sekiyinyok. Wera Yahudi gom nim ek, nadya dib senewoka jong dangalamak yuba leb elegosululaʾ aboka nak sekiyinyok. Nara ban wenyalananya nera dib lelemna, sonda ak lenggulumna.

⁸ Anasa wenera, or yokok-yokok sam anaba nengmab ara, sembejaʾ manaʾ orok soruka yangawoka molowanokaʾ aboka, banara lebsin. Dara, yok nim ek gorogoka yu ganya bonaʾ waldanaʾ ara loboka, mololonokaʾ aboka lebsin.

Gelewa Nengmabo Yuba Dolomnekanya Seinilimak Yuba

⁹ Anasonya neikik gelewa anaba, gelewa ara pe ganya seiniwoka, domdigum boksom enyek ongolonokaʾ aboka lebsin. Nimi nak perob senewanenokaʾ aboka honga goboka boloknenggom, emas meilik selerobaʾ dangman jobdobaʾ arobaʾ geregoka, rupiah senenggomaʾ deklemeija akleng enyek, ongonggom mem.

¹⁰ Bok alda saawoka gweidyaʾ dibaʾ subnamlaʾ ara, Imik Neyung ak giboka, alja mabo dangamna nim edya ulumaknya nenyek, ana diligaʾ doboka unulumnemak.

¹¹ Gelewa ak dara, yuba sanaʾ ara loboka, gelegoka ganya sokok nenebdangoka, yuba pe keboka ella dangalanok.

¹² Nadya dara, gelewa ak ara, nengmab ek wenewoka, anyek unuwalom aboka nekoka ulululaʾ aboka yo anggulumna. Alda sikda ganya siklewoka pe ulunok.

¹³ Nera Adam benyek men uyiwoka, Hawa gera eimik uyiwokaʾ anasa, lelesin.

¹⁴ Hnon ara Adam bedya gom, alda gel adya sondaʾ yuba keboka, Imik Neyung yuba blekoka, malya unaʾ lomok malyinggilimok.

¹⁵ Ban unuwokaʾ anaba, gelewa ak dara, Imik Neyung bek dib senewoka, wanaʾ uboka, pe geisa uboka, pe ulumnemak dara, memabo hnon beillilimnamak bok adya danyek sikenek bleblemnesil.