1 TIMOTIUS 1 - PERJANJIAN BARU NALCA YUBA

¹ Nara Paulus bedya, nunja bleblesilnya Imik Neyung adya orugunyokaʾ adya hnon, nunja ganya welemabnya Wenelesilnya Kristus Yesus adya hnon, Yesus Kristus amba yuba lenaʾ gaknya ulumnakanya,

² ganya dib senenaʾ ak ara, nadya me yokaʾ Timotius ansamba ban momnya en momnya doboka beibgen. Anya wera nunja neyung Imik Neyung adya, hnon nunjaʾ Wenelesilnya Yesus Kristus adya, wanaʾ uboka eleksinaʾ hnon, angoo yadyek senewoka arasinaʾ hnon, ganya hekoka unaʾ hnon anak ulunggulul.

Sondaʾ Amba Bobnenewoka Lelesak Yuba

³ Nara Makedonia sokok balamsa sum enyek, anak dukaʾ lolowoka anda Epesus heikek ululom aboka lenggesa sok, unuwalom. Nimi sondaʾ anasa bobnenewoka lelesak nang edya malya neneweisijik anasa, anja yuba sekdo anda Epesus heikek ululom.

⁴ Salyaʾ malya hwam deng anyek maro lolomla yub ek ganya we bulumakaʾ hnon, youmaʾ morublinaʾ nim ek yana lelewoka unuwok aboka neklamnaʾ anyek, kero bulumak nim ek unululumaʾ ara mem, alalom. Ban nidyaʾ ara mal damok lanalamlaʾ ak anasa, Imik Neyung adya alak dib senewanaʾ anasa eleklesilaʾ anyek sunuwoka ununggulumakaʾ anasa, mem henelam.

⁵ Nadya anak wenelenggenaʾ ara, nim ara perob ganya bobnokaʾ aboka hnon geisa ganya anyek ganya dukduk nong ok ulululaʾ aboka hnon, dara onoʾ sikda Wenelesilnya bek hyak dibaʾ ganya ologoka ulumeijekanya, wera ban adya sik kabo nim ek wanaʾ ulunok senewoka wenelesilomaʾ, aboka lelemna.

⁶ Bok hnon nim era, ban unuwanok senelenanya nera loboka, alda salyaʾ yuba salmorulumakaʾ ak an sikba gaboka youklomak.

⁷ Ban nera, Yahudi nim emba unuwanalum an yuba neksin nang danob senelemak bok, sikja salamak yuba damok era, ella danganaʾ ara orok jok, onoʾ hnonda sikja meka lelewoka salamak yub ek ara, munaʾ gobdo elgom ulumak.

⁸ Unuwanalum an yub ara, nim adya pe doboka unusin dara, perob dangalamlaʾ ara ella ulumab.

⁹ Bok unuwanalum an yub ara, nimi pe ulumak nim emba eleganggusuk bok, alda yuba lek aboka bleklemak nim emba hnon, asaʾ hwam uboka yu ganya nim emba hnon, sokok ulumlaʾ digum ok ganya seiniro ulumak nim emba hnon, yuba donaʾ orokaʾ anyek salyaʾ ulumak nim emba hnon, oruknaʾ yub era elegousukaʾ ara, ella ulumab.

¹⁰ Onoʾ yok gela salanaʾ hwam ok ulumak nang amba hnon, gel ganya ok boboka nauba meknelemak nang amba hnon, nimi nengmabo moumen dekeldalamak nim emba hnon, sondaʾ hwam ok wekdeknewoka ulumak nim emba hnon, sondaʾ anasa bobnenewoka lelemak nim emba hnon, nidyaʾ dib nong yuba elegousukaʾ ak bleklemak nim emba hnon, oruknaʾ yub ara elegousukaʾ ara, ella ulumab.

¹¹ Imik Neyung adya ugunuk youbsukaʾ ara pe weisin senelesululaʾ aboka ugunja dib senenaʾ ak anyek pe sunuwoka, nauba perob danggiga balasululaʾ aboka, sobaʾ ara nunda ugunsamba mololesab.

Imik Neyung Eleksinaʾ Amba Perob Aboka Gibok Yuba

¹² Nara nunja Wenelesilnya Yesus Kristus ak perob aboka sob-sobaʾ giblamna. Alda nak aralenululaʾ aboka migiba seleb elegenyok. Wera wa nen wen dara, Paulus bera bojamnya senewoka sekiyinyokaʾ anasa, perob aboka giblamna.

¹³ Men dara, nara alak dib senewanggumsaʾ adya, nadya alak malya lelemsa, alja mab olomsa, yu ganya boboka ulusebok, elgom adya unulamsaʾ anasa, nak angoo yadyek senewoka arawanyookanya, ban wa nen welelom aboka elegenyok.

¹⁴ Wera nunjaʾ Wenelesilnya bedya alja wanaʾ uboka eleksinaʾ ara nak gobdo nauba elekmorunyok. Dib senenaʾ ab, nim ak wanaʾ unaʾ amba migiba, Yesus Kristus lomok abaʾ ara nak elegenyok.

¹⁵ Ban yuba nong enyek, hyak dib nong anasa, doboka dib senewanamakaʾ ara ban: ”Yesus Kristus sokok an yeilimokaʾ ara, malya unaʾ nim enyek blebsununaʾ aboka yeilimok.” Dara sik unulumakaʾ gangganek ara, na nong anyek hyak okoka yu hwam malya unaʾanya bek ulumna.

¹⁶ Bok ban nak malya unaʾanya bek an ununyoknya nera, Yesus Kristus adya nim ek angoo yadyek senewoka arasinaʾ anyek aawosululaʾ aboka nak unyok. Nak dara, hyak malya unaʾ hwamnya ulusebok anasa, Imik Neyung ak dib senewoka embengaʾ unaʾ dobnemak nim enyek eiyiwoka unuwanokaʾ aboka, nak men ununyok.

¹⁷ Imik Neyung ara alda li sobaʾ ulmorululanya ulumla. Anya alak sobaʾ giboka onoʾ si imik nenewoka gigilenok. Alda dib hwekwa ubmoubuka, onoʾ laga heng eilinggulumaknya ulumla. Alda nunja Imik Neyung dibaʾ alak ok hnonok ulumla. Anasa wera, alak sobaʾ giboka onoʾ gigilenok. Amin.

Timotius Bedya Wa Yuba

¹⁸ Najabo, Timotius o! Men ununumnaʾ lelemek nang edya Imik Neyung adya anak eimik wa welemnamla aboka geklewoka lenjekaʾ anyek, sikja lenjeknya nenyek seiniwoka, lebgen. Anasa, banera dib lebnyek senen ganya boboka, pe ganya duboka yeiriwoka welelom.

¹⁹ Anda dib nong yub enyek ganya kweboka salabmoubmenekanya, ganya seininaʾ ak nekel eleklesilnya nek pe keboka, dulaʾ engewoka welelom. Hnon nim era, ban ganya lomok ono wenelelanya nenyek pe kenaʾ orok dara, sikja dib senelemakaʾ ara malya dangoka eiyiba daralamla.

²⁰ Wera unumek nim era, hnonda Himeneus beb, Aleksander beb ulurak an. Dara, ban penya nang era, Imik Neyung si malya nenenaʾ anyek lobdurukaʾ aboka, nadya Satan bek doboka elegeisisa.