1 TESALONIKA 5 - PERJANJIAN BARU NALCA YUBA

Pe Kemero Uldalamnamab Hyok Yuba

^1-2 Wera na kabo nim o, Wenelesilnya yanamla sum era, nim adya hokaʾ dolomak nim inimnek gelelenga yabalamak sok, al yanamlaʾ ara, ugunda pe ella ululumaʾ anasa, yokaʾ-yokaʾ unulumnamla salek era, ugunuk momnya doboka elekdanggunusibya.

³ Nim ara ”Pe ulumab e, obnenggunusil e,” senelemak salek enyek, wene sab-sab sikenek orok nenewanasil. Me beibnamna gel gek me juga gweklamla sok, sikenek unuwoka merewanggunumak.

⁴ Bok, kabo nim o, ugunda gunaʾ ak sam unggululumaʾ anasa, ban sum era hokaʾ dobnun senelelanya bedya gelelenga yalamla sok, ugunuk yanggunusil.

⁵ Ugunda nidyaʾ dilinaʾ mab silibaʾ, yubyek mab silibaʾ so ululum. Nunda inimnek mab silibaʾ gunaʾ mab silibaʾ unggulumab.

⁶ Anasa, nimi salyaʾ hogunga malamak sok unuwanggunumab. Bok pe keebmoubuka pe diri uldalamnamab.

⁷ Hogunga malamakaʾ ara, inimnek enyek malamak. Ganya uu alasil mek deregoka ulumak nim era inimnek unulumak.

⁸ Bok, nunda dilinaʾ mab silibaʾ ulumabaʾ anasa, nunda pe diri ubdangoka, dib senen ganya ab, wanaʾ un ganya ab, seng anasoʾ enegoka, dib blebnesil senen ganya adya huk golubdangoka ulumnemab.

⁹ Imik Neyung ara yu ganya boboka obsununaʾ aboka dobnenggusuk, nunja Wenelesilnya Yesus Kristus adya dib blebsululaʾ aboka dosuk.

¹⁰ Dara, nunda embengaʾ ulumab gom, seleb somogomeibyaʾ gom anaba, sobaʾ Yesus ablaboka ulunobaʾ aboka, nunsamba somogosuk.

¹¹ Anasa, seleb unuldalalum sok, ganya gwelelek aldalamnalumukanya, migiba nenellildalamnalum.

Wenewosuk Yuba

¹² Wera, kabo nim o, ugun gangganek wa nauba welemak nang era, Wenelesilnya bedya wa nenyek, ugunuk mengewoka welesak nang era sikenek gigilelulum e, alasab.

¹³ Sikja welemakaʾ anasa, wanaʾ uboka sikenek hyak perob aboka seinililulum. Waldanaʾ oldanaʾ loboka, pe hiboka neikek ulumnalum.

¹⁴ Na kabo nim o, hnon ara ugunuk dukaʾ lolom-lolom alasab, Salyaʾ ulumak nim ek yuba seklulum, lok ganya bolomak nim ek ganya gwelelek aboka leblulum, hmeng ulumak nim ek arawolulum, nimi nidyaʾ ak, yongon ganya boboka berra ununggom.

¹⁵ Malya ubnyok senewoka, onoʾ saawoka albabya diriganamna seneweijek aboka, pe kemero ulumnelum bok, ugun dam nang ak hnon, perob dolulaʾ aboka unulumunjok onoʾ nimi yok nim ek hnon, perob ok unulumnalum.

¹⁶ Ei-ei ganya bolmorulumnelum.

¹⁷ Sob-sobaʾ molololulum.

¹⁸ Yesus Kristus mab ululumaʾ anasa, nidyaʾ ulusilnya nemba, giblelulum. Imik Neyung ara nenyek perob senelesil.

¹⁹ Geisinya unulusilaʾ ara lolongnonggom.

²⁰ Imik Neyung adya nim ek eleklesil yub era malye senen ganya bonggom.

²¹ Yokaʾ-yokaʾ nidyaʾ sunuwomunukanya, perobaʾ ok gasa salabmoubuka ulululum.

²² Yok-yok so malya unaʾ nidyaʾ leiblelulum.

Sidyaʾ Gibsuk Yuba

²³ Imik Neyung ara neikek hillilisilnya, al adya ugunuk gobdo hyak geisa nenewosulul. Nunja Wenelesilnya Yesus Kristus yanamla sum amba, ugunja ganya hnon, ugunja nong unaʾ hnon, ugunja nong eb hnon, nidyaʾ hiboka hyak perob nongnya nenyek bo ulusulul.

²⁴ Youblesilnya bera bojam unulmorulesilnya ulumlaʾ anasa, unubdaknesil.

²⁵ Na kabo nim o, nunsamba mololesululum.

²⁶ Nun kabo nim sikda nidyaʾ ak, nunsamba giblulum.

²⁷ Wenelesilnya si sibuka, ban momnya enera na kabo nimi nidyaʾ kebnokaʾ aboka, siksamba einiwolulumaʾ aboka orugeisin.

²⁸ Nunja Wenelesilnya Yesus Kristus, alja wanaʾ uboka eleksinaʾ ara ugunuk ulusulul.