1 PETRUS 4 - PERJANJIAN BARU NALCA YUBA

Wenyok Nong Unaʾ Yuba

¹ Kristus ara nimi bokaʾ adya gweklemokaʾ anasa, numba alba seinilemok sok seinilemnemab senen ganya boboka migiba gebeldalalulum. Nimi nong sirikaʾ anyek oka gweklelanya bera, onoʾ malya unaʾ lolomla.

² Dara, alda sokok sam anam ulumnamla salek enera, nim adya bolomak ganya ek bonggulumnamla bok, alda Imik Neyung adya unu ubseng senelesilnya nenyek sunuwoka ulumnamla.

³ Ugunda youmaʾ yuba dobnenggulum salek era, nim Imik Neyung yuba dobnenggom nim edya unulumak ununaʾ seleb ura dakdowolum. Ugunda hyak nauba malya ululum. Ugunda youmaʾ dara, yokaʾ-yokaʾ malya unuweisinya ganya adya hnon, gela salaweisinya ganya hnon, yu meka deregoka ganya uu asin meka delelum, malya unaʾ hwam adya goluwoka, bisaʾ nauba hyak pe giboka, henga kemenaʾ malya dangalamla malya unaʾ eneba unululum.

⁴ Wenyek dara, ugunuk ara yuba donaʾ orok nim edya dara, lok anasa ngoluklesak. Nera ugunja youmaʾ nong unaʾ enyek, malya ura un nong unaʾ enyek orokaʾ anyek eililesakaʾ anasa lelesak. Ban nenesa leboka wera ugunuk ara sikja dara walasak.

⁵ Bok onoʾ sikbabya, eimik embengaʾ ulumak nimi hnon, seleb sogomek nimi hnon, yana lelewanasilnya Imik Neyung be yanamla sum enyek, sikba nunda anaso ulumab aboka laga lelewanamak.

⁶ Ban unuwanasilnya nenesa, seleb somogek nim ek men dara, Imik Neyung adyaʾ nimi blebsin yub era leb elegeisik. Ban unumeknya nera, anadya wera nimi nong ak dara, yana lelewanasilnya nera, nimi nidyaʾ hiboka yana lelelesil sok, yana lelewanasil aboka ubok. Onoʾ hnon ganya ak dara, Imik Neyung adya unu ubseng senelamla sok, yuba dolomakaʾ sunuwoka ulunokaʾ aboka ubok.

Imik Neyung Adya Eleklesilaʾ Doboka Welemak Yuba

⁷ Yokaʾ-yokaʾ sidyaʾ daknamla sum era, wera seleb oka yalamlaʾ anasa, ugunda pe heng uboka molowoka ulululumaʾ aboka, ugunda keebdangoka pe diri uldalalulum.

⁸ Nim ara sik moumen wanaʾ uldalamnaʾ adya, onoʾ malya unaʾ nauba bok, laga lebdangoka doboka bologoldalamakaʾ anasa, yok-yok ununaʾ era mek so bok, ugun moumen anyek hyak nauba wanaʾ uldalalulum.

⁹ Yokaʾ-yokaʾ ak seiniwoka yu yabnaʾ loboka, ugun moumen anaba ugunjaʾ e pik perobaʾ lebdangoka doboka beil dalalulum.

¹⁰ Imik Neyung adya yok-yok eleknaʾ eleklesilaʾ ara, ugumbabya yok-yok sunuwoka webnesomaʾ sunuwoka dolum. Imik Neyung adya eleklesilaʾ doboka welemak nimi beknaʾ ululumaʾ anasa, ugunja webnesomaʾ geknelemla wa nera, yok nim emba webnun senen ganya boboka pe welelulum.

¹¹ Nimi ben hnon yuba lebnelenya bera, alda Imik Neyung yub aldib an aboka lelelul. Nimi yok nim ek arawanasin senewalenya bera, Imik Neyung adya elegamlya migib ek sunuwoka aralesulul. Wera anadya yokaʾ-yokaʾ unulumnelumaʾ ak ara, Yesus Kristus pik uboka Imik Neyung si ak imik nenewanokaʾ aboka unulululum. Imik Neyung ak hnonok alak ok senenggom migibnya ululul, alak ok sobaʾ gibelmorulunok. Amin.

Yuba Dolomakaʾ Geknebaʾ Uboka Igin Kwelesil Yuba

¹² Nadya hyak wanaʾ ulusin hemyabo nim o! Ugunda wenera yokaʾ-yokaʾ igina kwelesilaʾ ara, nadya yuba dib dobek gom, anya nenesa ganya sene ulusil. Dara, ugun gangganek sam ulusilya dara, lok ganya boboka, hekasa anaso unuwanggunususonya nek ulusil do senenggom, mem.

¹³ Bok ugunda Kristus ab neikaʾ igina kwelesilaʾ anasa, pelesil senewoka eiya dabnesuso. Dara Imik Neyung adya Kristus imik nenemokaʾ laga danamla salek enyek, ugunja ganya hyak nauba eiya dabnesil.

¹⁴ Ugunda Kristus adya diriga ban nim ululumaʾ amba leboka yok nim edya walasak dara, wera anara Kristus adyaʾ Geisinya imik ululanya, Imik Neyung Geisinya bera ugunuk an seleb ulusil beknaʾ ulumlaʾ anasa, pe ululum.

¹⁵ Ugun gangganek ara nimi ben hnon, alda nim olomla gom, hokaʾ dolomla gom, yu ganya boboka malya unulamlaʾ adya gom, yok nim edyaʾ bok dobsalawoka ulumlaʾ adya, malya dangalamla adya igina kwewoka gweklelum dara, perob gom.

¹⁶ Bok, Imik Neyung yuba donaʾ nim ululumaʾ amba leboka igina kwelesil dara, ban nenesa leboka, ugunda alya ganya bonaʾ ara hyak mem. Bok alda saawoka, nunda Kristus si ak bo yabalamabaʾ senewoka, Imik Neyung ak perob aboka giblelulum.

¹⁷ Imik Neyung adya sokok an yana lelewanamla hyok salek era, wera seleb ubnabla. Imik Neyung mab ulumak nim enyek men yana lelewanasil. Dara, Imik Neyung nu alja mab ulumab nim enyek men yana leleb einiwanasil dara, Imik Neyung adyaʾ perob lero yanggan yub ek dib senewoka donggulumak nim ek ara hekaʾ hubnamla do?

¹⁸ Imik Neyung bukuk sam ara, ”Nimi pe ulumak nim enyek babya okoka blebsinaʾ okna ulusil dara, nimi nauba malya ulumaakanya, Imik Neyung ak hyak gobdo mekaʾ elgom nim ek ara hekaʾ hubnesil!” aro momnya dobok.

¹⁹ Anasa wera, nimi hnon nim era Imik Neyung adya senemlyaʾ adya, igina kweboka ulumnemak dara, nim en pe jongaʾ uboka sik nong ara uyiwosuknya bek elegoka onoʾ pe ulmorulunok. Imik Neyung ara alja unuwanasin ananya nera, alda gigiwoka unululanya bek ulumla.