1 PETRUS 3 - PERJANJIAN BARU NALCA YUBA

Gela Nenya Kwebdangoka Ulunok Yuba

¹ Anasonya neikek ugun gelewa anaba, ugunja nenyab edya yuba pe kelelulum. Dara, ugun gangganek ara, Imik Neyung yuba dib senenggulumeija nimi hnon ulumnemak dara, ugunja dara sikenek ara yuba sal eleknaʾ loboka, ugunja pe unulumun nong unaʾ enedya sikda Imik Neyung ak dib senewanamak.

² Ugunja yuba sanaʾ orok bok, sikda yuba donggulumak nenyab era, ugunja lok ganya boboka geisa uboka pe ulumunaʾ nong anyek eibnesaakanya, dib senewanamak.

³ Ugun nong ak dara, bokaʾ eilibek amba goubenya neneldanaʾ ara mem. Dara honga leleknaʾ gom, yok gweidyaʾ bonaʾ gom, perob boksom ongunaʾ gom, ban nidyaʾ anadya perob senewananenokaʾ aboka seneldanaʾ ara mem.

⁴ Bok saawoka, alda ugunuk goubenya ubnelumaʾ ara ban: ugun goubenya ubnamna senen ganya era, ugunjaʾ ganya lomok anyek namen uboka, dogom aboka pe ulunun senen ganya, ugunjaʾ ganya lomok ab, Imik Neyung adya nenyek perob senelamlaʾ anasa, ugunja perob neneldanaʾ ara an.

⁵ Ban neneso ununaʾ enedya youmaʾ Imik Neyung amba munaʾ ulumek gelewa dara, Imik Neyung ak hnonok ganya dib beiliwoka, sikja nenyab edya yuba pe keboka unulumekaʾ adya perob neneldalamek.

⁶ Dara Sara geneba neik so unulumok, alja nenya Abraham bedya yuba pe keboka, alja nenya emba dara, nadyaʾ neyung alamok. Ugun wenyek gelewa era, ugunda perobnya nenyek unuwoka ulumun dara, yokaʾ-yokaʾ ak ara lok ganya bobnenggubmun dara, ugunda Sara gedya gel mab ek ulumnulum.

⁷ Onoʾ neik so ugun nengmab ak dara, ugunja gelewa ek anaso nim ek ulumla senewoka ella dangoka ulululum. Gelewa ara sikda hmengaʾ yakaʾ ak ulumak senewoka, ugunda sikenek perobaʾ leboka pe unulululum. Ugun nengmab ab neikaʾ Imik Neyung adya embeng unaʾ ara dolomab senewoka sikenek pe unulululum. Wera ugunja molonaʾ era okna dabsilyek anasa, ban nidyaʾ unulululum.

Nimi Nidyaʾ Pe Meebdangoka Un Yuba

⁸ Anasa damok ara, ugunda nidyaʾ pe neik ganya boboka, neik yuba saboka ulululum. Ugunja unaʾ era neik noungousa enesoʾ anyek wanaʾ uldalalulum. Ugun moumen wanaʾ uldalamunukanya, ganya sokok nenebdangoka ulululum.

⁹ Ugunda naba malya ubnelaʾ anasa, alba malya ubnun senewoka malya unaʾ moumen dirigeldanaʾ ara mem. Bok saawoka, alda Imik Neyung perobaʾ nenelesilom aboka mololdalalulum. Imik Neyung adya ugunuk yoululum aboka youbsukaʾ ara, anaso perob unaʾ enyek unuwoka onoʾ perobaʾ dobnokaʾ aboka ubsuk.

¹⁰ Imik Neyung yuba bukuk sam ara, ”Nimi ben hnon nara pe deregoka uboka, pe ubgiga binimnaʾ ak ara pe ulumnamna senewalenya bera, malya unaʾ yub ara sablyek anasa, sibamaʾ serekdangoka, sondaʾ ara salyaʾ lero yibilyek anasa, pe diri uldalalul.

¹¹ Bera onoʾ malya unaʾ ak dara, mok geboka ululul. Hnonda anya, alda perobnya nenyek ok unululul. Nara yok nim ek ara heknaʾ ganya ok boboka ulumnamna senewoka duboka ululul.

¹² Imik Neyung ara malya ulumna nim era, malya nenelesilnya anasa, alak pelemak nim ek kemelesilikanya, sikja molonaʾ nauba kelesilnya bek anasa, pe ululul,” aboka momnya dobok.

Ganya Siklewoka Igina Bololulum Hyok Yuba

¹³ Ugunda perob unaʾ enyek ok unulunob senen ganya bolomnelum bok dara, heknedya ugunuk ara malya ubnesuso do?

¹⁴ Bok, ugunda pe ululumnya nenesa leboka, igina nauba kwelesilaʾ anaba, nera hyak pe ululum. Ugunda ganya daldom-daldom aboka, yok nim ek lok ganya bonaʾ ara hyak mem.

¹⁵ Bok ugunja ganya lomok ara, Kristus ara nunjaʾ Wenelesilnya ulusululaʾ aboka dibaʾ memaʾ nenewoululum. Ugunja Imik Neyung adya eimik era anyek eleganesilaʾ dobnemab senewoka diri ululumaʾ anyek, yok nim edya ugunuk heibnesak dara, nunda anasa ulumab aboka orowek seinibgoboka pe neknelum.

¹⁶ Bok ban unuwanamunaʾ amba dara, pe namen ganya edya heknaʾ ganya boboka unuwanalum. Ugunda Kristus adya diriga ban nim ulumnelumaʾ anasa, yok yuba donaʾ orok nim edya wabnesak bok, ugunja pe ulumnelumnya nenesa wabnesak ab dara, onoʾ sik dam nimi meknewab senewoka sikenek saawoka alya dabnesilaʾ anasa, perob unaʾ an ella ululumnya nok unulululum.

¹⁷ Imik Neyung adya or unuwaseng senemnelanya nenyek, pe unulumnelum bok, ugunuk igina kwebnesil dara perob bok, malya ulumunaʾ anasa igina kwelemnesil dara, nera hyak malya nong.

¹⁸ Anasa leboka, Kristus ara lika hnonok ugunja malya unaʾ amba aboka, malya unggulumoknya benyek malya unaʾ nim emba aboka somogok. Kristus adya ban unuwoknya nera, anadya ugun nong anyek doboka Imik Neyung ak bo busununaʾ aboka ubok. Alda nong bokaʾ ak salyaʾ obek bok, subokaʾ ak dara, ganya ak suboka bukok.

¹⁹ Dara, Kristus ara ganya adya, henga geregoka beillilamla ganya ulumek ak sam yuba bo lel elegel byuk.

²⁰ Nera Nuh be ulumok salek, Imik Neyung ak keboka ununggulumek nim ek lel elegel byuk. Ban salek era Nuh bera anam mek ekla bunaʾ e solomok dara, Imik Neyung ara or siklewoka diri ulumokaʾ ara, seleb sobdakok sum era, nimi nidyaʾ seleb gobdo somogek bok, nimi linbadya nim ok blebsuk.

²¹ Ban youmaʾ unumokaʾ ara, sununaʾ dibaʾ ara wen an ugun blebsinaʾ damok ara, meka dalasak an. Ban meka dalasakaʾ adya, ugunja malya unaʾ ganya lomok ulusilaʾ nidyaʾ anyek doboka boloknenggulusak, alda ugunja Imik Neyung ak nara eimik saawoka hnon malya ub sounuwanggunumna, anya nenesa beknaʾ dibaʾ meka dalasak. Mek danaʾ adya nimi bleblesilnya nera, Yesus Kristus anyek malya unaʾ ak sam ab seleb somogoka suboka welewokaʾ adya ok bleblesil.

²² Wera Kristus ara imik heikek Imik Neyung sirikek sam bindewoka, lero nang ek hnon, nidyaʾ dub nang ulumakaʾ ab, senenggom migib ulumlaʾ nidyaʾ ara alja yuba kelemak.