1 PETRUS 1 - PERJANJIAN BARU NALCA YUBA

Men Gibsuk Yuba

¹ Nadyaʾ hemyabo nim o, Imik Neyung adya weboka dobsuk nim, Pontus moka hnon, Galatia moka hnon, Kapadokia moka, Asia uboka Bitinia moka doluwoka obyakasik nim ek, nara Petrus, Yesus Kristus adya yuba lenaʾ gaknya bedya, Imik Neyung adya ugunuk perob eleknaʾ ab, pe unaʾ ab, hyak nauba eleklesulul senelamna.

² Neyung Imik Neyung bedya albeyok men seinimokaʾ sunuwoka, Imik Neyung Geisinya adya, alja geisa mabo nenelesilaʾ adya, ugunda Yesus Kristus ak pe keeboka unuwolulumaʾ aboka, Yesus eneng adya mek elegosululaʾ aboka, Imik Neyung adya ugunuk weboka dobsuk. Anara Imik Neyung amba ok munaʾ gobdo ulunokaʾ aboka ubsuk.

Ganya Wenaʾ, Dib Senenaʾ, Wanaʾ Unaʾ Ab Yuba

³ Nunda Imik Neyung ak nunjaʾ Wenelesilnya Yesus Kristus alja giblelanya aljaʾ neyung bek gibnemab! Alda nuk angoo yadyek senewoka arasukaʾ sunuwoka, Yesus Kristus somoknaʾ ak ab embengaʾ suboka bukiyiwokaʾ adya, wenyek embeng unaʾ ara nuk elegosuk. Ban adya ganya welmorunaʾ ganya nuk elegosuk.

⁴ Anasa, Imik Neyung adya alja mab emba imik heikek beillilesil bonaʾ era blonaʾ loboka goowoka denghenggunumla, mura bongowanggunumla bonaʾ enyek, nunjaʾ danamla senewoka diri ulumab.

⁵ Ugunda Imik Neyung migib adya bo ulusil nim ek, ban bonaʾ era ugunsambaʾ ak beillilesil. Yokaʾ-yokaʾ nidyaʾ denghenemla sum enyek, al laga danamla, Imik Neyung nimi blebsinaʾ damoka beibukaʾ anyek, dibaʾ dobnokaʾ aboka, ugunja dib senenaʾ adya, ugun nonga migiba geboka bo ulusil.

⁶ Dara, ugunda wenyek dara, yokaʾ-yokaʾ nauba seʾ amba bobgeregoka sunulusil bok, ban amba bekoka ei-ei ganya bololum.

⁷ Ban yokaʾ-yokaʾ ak geregoka sunulusilaʾ damok ara, ugunda aldib Wenelesilnya bek okoka dib senelum gom, orokaʾ anyek, laga dolulaʾ aboka ulusil. Dangmana perobaʾ anaba jobok orokaʾ ara, uk ak dalyamalemak. Anasa Imik Neyung ak dib senenaʾ ara hyak perobaʾ ak uboka, eimik denghenemla dangman era or malya so anasa, ugunuk hnon sunulusil. Dara Yesus Kristus laga danamla sum era, ugunja dib senenaʾ ara seleb laga dokaʾ adya, ugunuk dara, perobaʾ leboka gibnesilikanya, ugun nong ara imik nenewanasil.

⁸ Ugunda wera Kristus ak ara heng eibnenggulumjok, wera alak wanaʾ ululum. Onoʾ wenera alak ara eilinaʾ orokjok, alak dib senelelum. Ban nenesa leboka ugunda wenera hyak ei-ei ganya bolomunukanya, hyak perob senewoka nauba eiya hlalalum.

⁹ Dara, ugunja yuba dib senenaʾ nong anyek gigiwoka pelesilaʾ adya, wera ugunja ganya blebsinaʾ nong ara dib dololum.

¹⁰ Ban ugunja ganya blebsinaʾ nong anasa leboka, youmaʾ ununumnaʾ len nang era ella ubsibya senewoka eboka dulumek. Hnonda ugunja ganya blebnesilaʾ anyek, sikda orowek lelemek.

¹¹ Kristus aljaʾ Geisinya sikjaʾ ganya lomok an ulusuukanya, al Geisinya adya Kristus ara hekaʾ huboka somogoka, eimik era al nong ak imik nenewanamokaʾ anyek unuwanamla aboka sikenek lelesuk. Dara hekaʾ huboka, hek sum ek dib gigiwanamlaʾ ella danob senewoka dulumek.

¹² Imik Neyung adya ununumnaʾ lelemek nang ek ara, ugunsamba leldanggululum, alda eimik ulumnemak nim emba lelelum aboka nekesuk. Anara ugun wen an Imik Neyung yuba len nang ek ab, Yesus Kristus amba yuba kelelumaʾ anyek lelesik. Sikja ugunuk lero yalasikaʾ ara, Imik Neyung Geisinya adya, imik heikek abaʾ ara, eleklesilaʾ anyek ugunuk lelesak. Dara, lero nang edyaʾ anaba, sikja lelesak yub era ella danob senewoka dulumak.

Geisa Ganya Boboka Ulunokaʾ Aboka Youbsuk Yuba

¹³ Ban nenesa leboka, ugunja ganya seininaʾ pe meewoka ublulum. Yesus Kristus yanamla sum enyek eleganesilaʾ anyek dib dobnemab senewoka, ugunja ganya welelulumaʾ ara, pe keeboka unulululum.

¹⁴ Imik Neyung ak pe keboka unulululum. Ugunda Imik Neyung ak elgom ululuma wenyek, ululum nong unaʾ enyek ugunja ganya edya ok diligaʾ en doboka unggom.

¹⁵ Imik Neyung ugun youbsuknya bera geisa ulumla sok, ugunja yokaʾ-yokaʾ unululumaʾ ak ara geisinya danalenya nok eboka unulululum.

¹⁶ Imik Neyung yuba momnya dobokaʾ ara, ”Nara geisa ulumnaʾ anasa, ugumbabya geisa ulululum,” hyokaʾ anasa unulululum.

¹⁷ Ugunda heng uboka mololyabenek ab dara, Imik Neyung ara nunjaʾ neyung aboka giblelum. Ban wenyalalum Imik Neyung enedya, nim adya hekaʾ unulumakaʾ ara, hnonok-hnonok nidyaʾ sunuwoka yana lelelesil. Anasa wera, ugunda sokok an anam ululum salek enera, Imik Neyung ak lok ganya boboka ulululum.

¹⁸ Ugunjaʾ neyung yabo youmaʾ ulumek nang edya salyaʾ lelem ulumekaʾ ara, ugunuk lobonggeisikaʾ anyek, loboka blebnesukaʾ amba dara, alja dara hekaʾ adya ugunsamba deksukaʾ ara, ugunda ella ululumaʾ anyaʾ. Alja deksukaʾ ara dangman meilika joboka dengalamlaʾ anasoʾ ak deknenggubsuk,

¹⁹ alda hyak perob nongaʾ anyek deksuk. Kristus ara giriwaʾ deregoka menengaʾ unggulumla domba pam enesoʾ ak uboka, al Kristus alja eneng era, senenggom deknaʾ eneso eneng edya deksuk.

²⁰ Imik Neyung ara soko anam uyiwanggom bok, Kristus ak men weboka doboka sekiyimok. Wera mok soko sidyaʾ daknamla salek enera, ugunuk blebsununaʾ aboka sokok sam yeilimok.

²¹ Wera ugunda Kristus anyek nimi somoknaʾ ak ab embengaʾ suboka bukiyiwoka, imik nenewoknya be pik anyeb uboka, Imik Neyung bek ara dib senelelum. Anasa Imik Neyung enyek anyek, ugunda dib senewoka, onoʾ Imik Neyung enyek ganya nebom aboka diri ululum.

²² Ugunda Imik Neyung yub anyek dib senelelumaʾ adya, ugun nong ara seleb geisa nenebdangoka, neik yuba dololum nim ek ara pe wanaʾ ulusulum. Anasa leboka, ugun moumen pe ganya goluwoka wanaʾ uldalalulum.

²³ Wera embengaʾ uboka, pe migibaʾ ulumla Imik Neyung pik anyeb uboka, ugun nong ak dara, nim adya beillilesak nong unaʾ ek gom, alda imik sam sobaʾ pe ulumla Imik Neyung ek ab wenyok nonga nenewosuk.

²⁴ Imik Neyung yuba bukuk sam ara, ”Nimi nidyaʾ ara holaʾ anasoʾ ak ulumak, nimi nidyaʾ sikja unulumak migib era esaʾ anasoʾ ak ulumla. Holaʾ ara yalalamla, esaʾ halamla bok,

²⁵ Imik Neyung yub ak dara, or sobaʾ ulmorulamla,” aro momnya dobok. Dara ban Imik Neyung yub enyek ugunuk ara leb elegesik.