1 KORINTUS 9 - PERJANJIAN BARU NALCA YUBA

Yuba Wa Gakaʾ Nang Edya Welemak Yuba

¹ Nabeyok ganya doboka, unulunanya unggulumna de? Nara Imik Neyung yuba lenaʾ gaknya unggulumna de? Nara nunja Wenelesilnya Yesus bera seleb eibnenggusinya bek ulumna de? Ugunuk dara, nadya Wenelesilnya bemba wa websaʾ adya, ugun Imik Neyung mabo dangalum nim unggululum de?

² Nimi yok nang edya nak ara, Imik Neyung yuba lenaʾ gaknya ulumla hengguneneseng bok, ugunja dara, alda Imik Neyung yuba lenaʾ gaknya senewoka seiniyiwanenesom. Nera damok ara, alda ugunuk Imik Neyung yuba lebsisaʾ adya, ugunuk Imik Neyung mab ululum dara, wera nera nara aldib Imik Neyung yuba lenaʾ gaknya ulumna beknaʾ edya ugumbabya ululum.

³ Wera, nimi yok nang edya, anda Imik Neyung yuba lenaʾ gaknya gomaʾ aboka lolonyak dara, nara ban nenyek sikenek lelesin.

⁴ Nara wa welemnaʾ anasa, denaʾ mekaʾ gwanenga eleganeneseng dara, nera doboka denggunusinya de?

⁵ Wenelesilnya Yesus alja weisab edya hnon, onoʾ yok yuba lenaʾ gak nang edya hnon, Petrus benedya hnon, yuba dolomna gelewa bomnakanya, neikaʾ yabalamek sok, nara yuba dolomla gel geneba doboka neikaʾ yibinggunusinim de?

⁶ Goma, Barnabas beb nab danyek ok, denaʾ ara, sikbeyok ganya hwiboka eboka deleruruk senelemak de?

⁷ Heknedya yinaʾ bonanya ululabok, albeyok doboka dekoka denemso de? Dara, onoʾ heknedya alja wak sam den gal yinaʾ mesodyok, doka dakoka denaʾ lobnamso de? Dara, heknedya domba beillilesodyok, moum souba londowoka denaʾ ara, lobnamso de?

⁸ Ban nadya nidyaʾ lebnanya nera, nim ulumab ak an sob unulumabnya nenyek ok lebnenggubna. Alda unuwanalum an yuba bukuk sam anaba, neikik wenyaboka momnya dobokaʾ anasa lebna.

⁹ Musa bedya unuwanalum an yub ek sam yuba hnon ulumlaʾ ara, ”Sapi pam adya, doka dakoka beiyimeijaʾ anyek, yan ingib saboka goroklelebok dara, ugunda alja sibamaʾ ak sam henga gasa darawoka goubnenggom mem” alamla. Dara Imik Neyung ara, sapi pam anasa dib sunuwoka lemok de?

¹⁰ Goma, ban nera nunsamba lebsuk gom? Yo nera aldib nunsamba leboka momnya dobsuk. Anasa wera, beiyek wa welemna nang eb, doka daklamna nang eb dara, numbabya hnon dobnanam senewoka welerak bok anasa, nera nunsamba leboka momnya dobsuk.

¹¹ Nunja dara, Imik Neyung yuba ugun gangganek leboka, ugunuk an dib yinaʾ seleb mesuba. Wera anadya ugunja yokaʾ-yokaʾ eleklesulumaʾ dolomab dara, wera meknelemak senelesulum de?

¹² Yok nim enyek babya, ugunuk an yokaʾ-yokaʾ eleganesak anyaʾ aboka, ganya welesak dara, wera nunda nauba so ugunuk ganya webnenggunusibya de? Bok nak dara, ban unusinya nera, anam hnon unuwanggusisa. Bok, alda nara yokaʾ-yokaʾ ara, or siklewoka bolonunaʾ, anadya Kristus amba perob lero yanggan yuba lero yabalamnaʾ ara, pika garawoka ubdongowalyek senewoka anasa lolomsa.

¹³ Imik Neyung ek sam, Imik Neyung wa welemak nim era, sikja denaʾ dara, Imik Neyung ek ab doboka delemakaʾ ara, ugunda elgom ululum de? Imik Neyung amba uka daboka gibnaʾ oulyang ak sam welemak nang era, beillilemak bonaʾ era anyaganyeb darasam hnon bokoka doboka delemak.

¹⁴ Anasonya neikik, Wenelesilnya bedya orowek, seleb Imik Neyung perob lero yanggan yuba bo lero yabalamak nang era, yuba lelemakaʾ ak an ulumlyaʾ anyek, or doboka deregoka ulunok, hyok.

¹⁵ Ban seleb wenhyok bok, nak dara wenera hnon ununaʾ ara orok. Onoʾ ban yuba wenyaboka momnya doboka beibsinaʾ anaba, wen nak unuwonululumaʾ aboka ubnenggubna. Nadya ban unulamna senelamnaʾ anyek, weininggoka denghelyek anasa, nak somogeisinya dara, perob senelamna.

¹⁶ Anasa wera, al Imik Neyung yuba lero yabanaʾ nong amba ok dara, nara pelemna aboka nonggo abdanggunusinya. Bok, nenera Imik Neyung adya or unululom aboka leboknya nenesa unulamna. Wera Imik Neyung adya yuba lelelom aboka, orugunosobok nadya lolosinya dara, nara hyak omom nongaʾ ak ulumnesinya.

¹⁷ Imik Neyung yuba lelemna anyek, nabeyok ganya doboka welesinya dara, wera nara eimik era, deknaʾ dobnamna senewanesinya. Bok, nara Imik Neyung yuba lero yabalamnaʾ ara, anjinya anasa unululom aboka lenyokaʾ anasa, Imik Neyung adya welelom aboka oruganyok senewoka welemna ok.

¹⁸ Wera dara, nara hek deknaʾ ek dobnamna do? Nadya dobnamna deknaʾ era banyek ok, nara Imik Neyung adyaʾ perob lero yanggan yuba lero yabalamnak ab dara, nimi yok nang ek igina kweiyiweisinyek senen ulumna. Nera nara Imik Neyung yuba lelenanya benyaʾ senewoka salyaʾ men eleganulum aboka moloro yabanggulumna.

¹⁹ Na benyek dara, yok nim edya wa wenya unggulumna, dara nabeyok gobdo ulumna bok, ban unu ulumnaʾ anaba, na nong anyek yok nimi wa wenya neneldalamna. Ban unulunanya nera, anadya nimi nauba Kristus amba doboka bo younunaʾ aboka ulumna.

²⁰ Yahudi nim ek sam ulumna dara, nara sik Yahudi nim ulumaknya nenyek neikaʾ uboka, anadya sik nong anyek Kristus amba doboka bo younunaʾ aboka ulumna. Onoʾ Musa bedya unuwanalum an yub ek sam sunuwoka ulumak nim ek anaba, nara sik ulumak sok diligaʾ doboka, sik nong anyek Kristus ak doboka bo younunaʾ aboka ulumna. Ban unulunanya nera nak dara, Musa bedya yub era hnon ununggulunadyok, sik hnoum ara, unulunanya benesoʾ ak ulumna.

²¹ Dara onoʾ Yahudi gom nim ek anaba, sikenek nara Yahudi gom nim eneso uro yabalamna. Al ban unulamnaʾ anaba, sik nong anyek Musa bedya unuwanalum an yub era, loboka salyaʾ beiyik ulumak bok, sikenek hnon Kristus ak diriga ban nimi danok senewoka, uro yabalamna. Ban unulunanya nera nak momnya dobok yub ek dib senenaʾ orok adya ulumna gomaʾ. Alda nara Kristus yub ak dara, anam ganya goluwoka unulamna.

²² Dara, onoʾ yuba doboka ganya kanaʾ orok nimi sik gangganek anaba, na ulumna dara, nara yuba doboka ganya kabnenggunanya benesoʾ ak ulumna. Nera sik nong anyek, Kristus ak sam doboka bo younunaʾ aboka, sene uro yabalamna. Anasa al ban nadya nidyaʾ unulunanya dara, yokaʾ-yokaʾ nidyaʾ unulamnya pik anyeb uboka, sik nong anyek, Kristus ak hnon bleboka bo yousununaʾ aboka, nidyaʾ ara uro yabalamna.

²³ Ban nidyaʾ nadya unulunanya nera, anadya Imik Neyung alja perob lero yanggan yub amba anasa, nababya perobaʾ donululaʾ aboka ulumna.

²⁴ Nimi bik-bik al balamakaʾ ak ara, nimi nidyaʾ neikebok bik-bik ab einimna bok, ben hnonok men binya bok deknaʾ dolomlaʾ ara, ugunda ella ululum. Anasa wera, ugumbabya deknaʾ dobnemab senewoka, hyak pe yeiriwoka bik-bik al balalulum.

²⁵ Nimi nidyaʾ bik-bik henemab bar aboka, sunulsinilimakaʾ ak sam ara, yokaʾ nidyaʾ ara ganya siklebdaboka ulumak. Ban siklewoka pe sunuwoka ulumaknya nera, pewanya dara, yalaklamla esaʾ kweb ganagameijaʾ ak dobnamna senewoka, anara unulumak. Bok nuk dara, yalawanggunumla esaʾ enyek kweb ganaganesilaʾ anasa, yokaʾ-yokaʾ nidyaʾ ara, pe yeiriwoka siklewoka unulumab.

²⁶ Anasa wera nak dara, banyek dobnamna senenadyok, nara pe sidyaʾ ak bik-bik al balamna. Wera onoʾ soruk mal oldalamna ak anaba, nara salyaʾ lelem oro yabanggulumna.

²⁷ Nadya nong enera pe mel-mel aboka, nauba sunubdangoka diri uldalamna. Ban unulunanya nera, nadya yok nim ek nauba leboka glinyebok, eimik sum era, na nong anyek lobnelyek aboka, anara unulamna.