1 KORINTUS 6 - PERJANJIAN BARU NALCA YUBA

Yuba Elgom Nim Edya Yana Lelesinaʾ Ak Enggom Hyok Yuba

¹ Nimi hnon ugun gangganek ara, yok nim eb gogobaʾ ganya bobdangaseng dara, yok munaʾ Imik Neyung mab ak memewananulum aboka, enaʾ ara loboka, alda yuba donggulumak nim ek, ugunja yana lelewanasulum aboka, bo binimso de?

² Wera eimik era, munaʾ Imik Neyung mab adya sokok an yana lelewanesakaʾ ara, ugunda elgom ululum de? Dara ugunda soko nidyaʾ yana lelewanalum bok anasa, hekasa mek siriknya neneba wen yana leleldanggululum do?

³ Nunja eimik era, lero nang ek yana lelewanamabaʾ ara, ugunda elgom ululum de? Anasa, hyak nauba so ara, nunja sobaʾ ulumabakanya unulumabnya nera, yana lelelemnamab.

⁴ Dara wera, ugun yuba dololumaʾ gangganek an yokaʾ-yokaʾ lanawanamso dara, wera ugunub neikaʾ yuba donaʾ orok nim ek, nunsamba yana lelewanesulum aboka molowanasom de?

⁵ Ban wenyhesinya nera, ugunuk alya dabsululaʾ aboka lebsin. Ugun gangganek ara, gogobaʾ ganya bobdangaseng dara, ella uboka ugun moumen yana lelewanasusonya hnon unaʾ orok anasa ululum de?

⁶ Bok wen ugunja unululumaʾ ara, ugun moumen ara al kabo neikaʾ yuba donanya bedya malya ubna dara, yuba donaʾ orok nang ek, nadya hem be malya ubla aboka, yana lelewanokaʾ aboka, yuba bo nekel balalum.

⁷ Ugun moumen yuba donggulumak nim ek, anaso malya ubsak aboka yuba bo balalum dara, al seleb hmeng dangdowolum. Ugun moumen malya ubsija dara, hekasa diriganggunumna seneldanggululum do? Ugunja bonaʾ hokaʾ dobsija dara, hekasa or ununenok seneldanggululum do?

⁸ Bok saawoka, ugumbabya hnon hokaʾ dobdangoka malya ubdangoka unululum. Ugun kabo nim ek anaba, unuldalalulum.

⁹ Nimi malya ulwenelemak nim era, eimik era Imik Neyung wenesin heikek hyak weknenggunumakaʾ ara, ugunda elgom ululum de? Wei, bol neneldanggom. Salyaʾ gela hokaʾ salalamak nang eb, yokaʾ-yokaʾ ak giblemak nim eb, yok nang gela salalamak nang eb, sik moumen bok dekeldalamak nang eb dara, imik heikek weknenggunumak.

¹⁰ Onoʾ hnon, hokaʾ dolomak nim eb, ganya oka delesil nim eb, yu meka deregoka ganya uu alamak nang eb, yok nimi si ak malya nenelemak nim eb, yokaʾ ak menengaʾ amba yaboka ol neblemak nim eb, ban nidyaʾ anaso unulwenelemak nim era, Imik Neyung wenesin heikek ara weknenggunumak.

¹¹ Ugumbabya hnon men dara, nenyek unululum. Bok wenyek dara, ugunda malya unaʾ ak ab, seleb meka elegoka geisa nenewosuk. Ugunda Imik Neyung mabo seleb munaʾ gobdo dangiyisuk. Ugunda Wenelesilnya si Yesus Kristus ak dib senewoka, nunjaʾ Imik Neyung Geisinya bedya migib edya, ugunda seleb perobaʾ neniyiwousuk.

Ugunja Nong Edya Imik Neyung Ak Giblelulum Hyok Yuba

¹² Yok nim edya hnon lelemakaʾ ara, ”Yokaʾ-yokaʾ nidyaʾ ara, salyaʾ ganya doboka unuwanesibya,” alasak. Bok nak dara, ”Ban nidyaʾ ara perobnya nokaʾ aboka ganya doboka unuwanamna,” henesinya bok, na nong ak dara, ”Yokaʾ-yokaʾ adya ologoka mabnelyek,” senelamna.

¹³ Hnonda wenyalamakja, ”Denaʾ ara mon amba ulumla. Mon ara denaʾ amba ulumla,” wenyalamak bok, nidyaʾ penya ara, Imik Neyung adya eimik orok nenewanamla. Nimi nong goukwa ara, gela salawoka uro yaban danasa gomaʾ. Nimi nong ara, Wenelesilnya bemba ulumlakanya, Wenelesilnya bera, nimi nong amba ulusil.

¹⁴ Imik Neyung adya Wenelesilnya Yesus bera somoknaʾ ak ab, embengaʾ dangiyimok. Anasonya neikik eimik era, numbabya alja migib edya, Imik Neyung adya nuk embengaʾ bukiyiwanasil.

¹⁵ Ugunja nonga yok-yok ara, hiboka Kristus nong ululumaʾ ara, ugunda elgom de? Dara, Kristus adya nong ululumaʾ anyek, nadya doboka gela salanaʾ ak neikaʾ hil binisinya de? Hyak unuwanggunusinya, mem.

¹⁶ Yok nang edya salyaʾ salawoka bololomak gel gek, ben hnon eimik salalamla dara, unulanya bera gel genedya, hnonok nonga dangalamlaʾ ara, ugunda anam elgom ululum de? Imik Neyung yuba bukuk momnya dobokaʾ ara, ”Gel ab nenya ab hnonok nong danerak,” hyok bar.

¹⁷ Bok, Wenelesilnya Imik Neyung beblaboka neikaʾ denewoka ululanya bera, Wenelesilnya beb alab, ganya ak dara, hnonok dangalarak.

¹⁸ Yok gela salawoka uldanaʾ ara, hyak loboka mok yabalalulum. Yok-yok malya unaʾ ak dara, nim adya unulumakaʾ ara, nimi nong weilik ab ulumla. Bok, gela salawoka malya ululanya bera, alda al damnya alja nong ek malya uldalamla.

¹⁹ Ugunja nong era, Imik Neyung Geisinya alja e ululumaʾ ara, ugunda elgom ululum de? Imik Neyung adya alja ok ganya doboka, Geisinya bera ugunuk elegesuukanya, Geisinya era ugunja nong lomok ulusil. Ugun nong ara, ugunjaʾ ak unggululum. Ugun nong ara, Imik Neyung aljaʾ yokaʾ nongaʾ ak ululum.

²⁰ Imik Neyung adya ugunuk seleb deknaʾ doboka deksuk. Anasa wera, ugunja nong era pe ulumunaʾ adya, Imik Neyung si imik dangallilimnelum.