1 KORINTUS 2 - PERJANJIAN BARU NALCA YUBA

Kristus Gal Dubuk Somogok Yuba

¹ Hemyab o, Imik Neyung adya orowek seinibgegemok bok, soko adya dara, ella danggumokaʾ anyek, ugunuk lero yeilisisa sum era, nara meka lelewoka hobyang yuba saboka, onoʾ sokok an geremsengaʾ ulumaknya nedya ella dangoka ugunuk Imik Neyung yuba lel yanggusisa.

² Anasa, nara orowek Korintus nimi gangganek ulumnya dara, yok-yok yuba salyaʾ lebnenggunumna bok, alda Yesus Kristus yuba nong ok lelemnyekanya, okoka dara, Kristus gal dubuk somogokaʾ damok nong anyek ok, lelemnamna senemsa.

³ Nara ugunuk yeilimsa dara, nara hmengaʾ uboka lok gargadyaʾ ber-ber anaʾ hwam ulumsa.

⁴ Yuba ugunuk leb elegeisisaʾ ara, nadya ganya geremseng edya, ganya sangasin yub ek lebnenggusisa bok, nadya ugunuk yuba leb elegeisisa dara, alda Imik Neyung Geisinya alja migib unaʾ era laga dangamok.

⁵ Anasonya nera, ugunja Kristus ak dib senelelumaʾ ara, nim adya ella danganaʾ ek ganya kwebmunuk. Alda Imik Neyung migib ak ganya kweboka, dib senelelulumaʾ aboka, umsa.

Geisinya Adya Geremseng Ganya Eleklesil Yuba

⁶ Ban ulumsaʾ anaba, Imik Neyung yuba hyak ganya ologoka kaboka domek nim ek ara, naba hnon geremsengaʾ ella danganaʾ hnon lel eleklesin. Bok, ban lel eleklesin geremsengnya nenera, sokok an ella dangalamak geremsengnya nera unggulumla. Onoʾ sokok an dub dangoka ulumak nang sikja geremsengnya nera unggulumla. Eimik ban dub nang era, hyak denghenemak.

⁷ Geremseng unaʾ ugunuk neklesinaʾ ara, Imik Neyung adya soko uyiwanggom salek anyek, nuk si imik danokaʾ aboka, ban geremseng unaʾ era, nuk ara gunuwoka doknowok ulumlaʾ anyek, orowek seiniwoka beiyisuk.

⁸ Dara, wen sokok an dub nang ulumak nim edya dara, Imik Neyung adya geremseng unaʾ nunsamba beiyisukaʾ ara, ella danggumek. Anasa wera, sikda hnon ella uluseng bok dara, Wenelesilnya hyak perobnya bera oboka gal ak glabnenggumneseng.

⁹ Alda saawoka, Imik Neyung yuba momnya dobok sok ara, ”Yokaʾ-yokaʾ nim adya henga eiyiwoka o kenggulumaknya nera, onoʾ nimi ganya adya seininaʾ lanenggulumlaʾ hnon nenyek, Imik Neyung adya, sik alak wanaʾ ulumak nim emba memesuk.”

¹⁰ Bok, Imik Neyung adya nuk seleb alja Geisinya pik uboka, nuk memesuknya nenesa laga amasuk. Imik Neyung Geisinya adya yokaʾ-yokaʾ nidyaʾ ara, geklewoka ero yabalamla dara, onoʾ Imik Neyung adya anyek, unuwanamna senemna lomok doknomna anaba, laga gelewoka beillilamla.

¹¹ Nimi ganya lomok sam yokaʾ-yokaʾ ella ulumla ara, yok soko nim era, ella uldanggulumak bok, al damnya bedya ok ella uldalamla. Anasonya neikik, Imik Neyung adya ganya yok-yok seinimnaʾ ella ulumlaʾ ara, al Imik Neyung alja Geisinya adya ok ella uldalamla.

¹² Wera nuk ara, soko enyek anyeb ganya ek eleganggusuk bok, alda Imik Neyung adya, alja Geisa ganya ek elegousuk. Anadya wera, Imik Neyung adya nidyaʾ yokaʾ-yokaʾ nuk elegousuknya nera, ella danokaʾ aboka Geisinya elegosuk.

¹³ Anasa wera, nunda yok-yok Imik Neyung yub era, Geisinya aralesilaʾ adya sunuwoka lelemab. Dara, nim adya ella dangalamak ganya seininaʾ geremseng enyek lenggulumab bok, Imik Neyung Geisinya nuk neklesilnya nenyek lel eleklemab.

¹⁴ Dara, nim Imik Neyung Geisinya unggululanya bera, Geisinya adya eleklesilaʾ ara, donggulumla. Alda eleklesilaʾ anyek, dolbalek so senelamla. Dara, ban nenera Imik Neyung Geisinya adya ok damok ara ban senewoka ella dangalamak anasa, albeyok ella damenggom ulumla.

¹⁵ Geisa lomok ulumak nim era, yokaʾ-yokaʾ nidyaʾ ara yana lelelabok, al nong ak dara, yok nim edya yana lelenggulumak.

¹⁶ Imik Neyung yuba bukuk momnya dobokaʾ ara, ”Heknyek Wenelesilnya bedya ganya ak ara ella ulumla do? Dara onoʾ, heknedya Wenelesilnya bek wenewanamso do?” alamla. Bok al nun nong anyek, Kristus seinilamla sok, numbabya neikso seinilimab.