1 KORINTUS 16 - PERJANJIAN BARU NALCA YUBA

Yok Imik Neyung Mabo Yerusalem Sam Amba Rupiah Bolomek Yuba

¹ Wera rupiah yub ak lebnesin. Ugunja rupiah yokaʾ munaʾ Imik Neyung mab emba mamagoka beillililum ara, Galatia moka yuba dolomak nim ek, nadya wenyasisa yub enyek, sunuwoka pe unuwolulum.

² Dara minggu lelemlya elaʾ gigiro, ugunja dolomunaʾ anyek, sunuwoka men sum enyek pe orowek bokoka dililelulum. Men orowek bokoka beillilimunaʾ adya, na yanya dara, wera bolowanamab aldanaʾ loblulumaʾ aboka lebsin.

³ Wera nak ugunuk seleb yanya sum era, ugunja or humun nang enyek, rupiah bolowoka beibekaʾ bo bululumaʾ aboka, orugoka bokol binisin. Dara, rupiah Yerusalem heikek bo binokaʾ aboka, beknaʾ dib bo yak an momnya donaʾ weboka eleganesin.

⁴ Naba neikaʾ banaʾ perob dalyaʾ eibnya dara, wera sikeneb neikaʾ bo binimab.

Paulus Bedya Unuwanamna Senemok Yuba

⁵ Nara ugunuk kemel yanggeisinya dara, Makedonia pik uboka kemel binisin senelamnaʾ anasa, pik enyek an uboka keebgiga ugunuk yanesin.

⁶ Or pewalya dara, saragenaʾ li yenewanalabok anasa, unumlya salek era, ugunublaboka neikaʾ ub einiwanamab. Ban nen seleb unuwanya dara, yok-yok heikek kemero yibinunaʾ aboka arawananulum.

⁷ Nara ugunuk ara, or yokok yabanakanya li hnonok kemel lobsinaʾ ara, lek senelamna. Wenelesilnya bedya or senewalyebok dara, nara ugunuk li gong ubwenewanamna.

^8-9 Nimi nauba Paulus bedya yuba lelemlaʾ ara, malya aboka bleklemak bok, dib nonga dangalamla wa nauba ulumlaʾ anasa, ban nen unulamnyek ab dara, nara Epesus heikek an ulumnya salek enyek, Geisinya yinggilimokaʾ beklemak sum era, goʾ yenewoka denghenemla.

Yok Yuba Hnon Wenyhusuk Yuba

¹⁰ Timotius bera ugunuk an yalya dara, alda nababya Wenelesilnya bedya wa welemna sok, albabya neik wa welemabnya bek anasa, ugunuk ganya goluwosululaʾ aboka perobaʾ leboka pe doro dibnelum.

¹¹ Ugunja dara, Timotius bek ara, alda meksonya senenaʾ ara hyak mem. Nara Timotius beb yok yuba len nang eb yanamakaʾ anyaʾ senewoka diri ulusinaʾ anasa, ugunja pe arawoka ubmunaʾ adya, alda men pe nak yoululul.

¹² Nunja hem be Apolos bek dara, nunja hemyabo yok nang eb kemel yeisinokaʾ aboka, li wen pe weneb einiwasa. Bok alja dara, nara wen dib binimna senen ganya bonaʾ ara orok. Bok ban salek enyek pewalyaʾ eiblya dara, eimik era hyak dib kemel yanasilaʾ ak ulumla.

¹³ Ugunda hyak yuba dib senelemak nimi geknebaʾ pe keebmouboka ganya kaboka pe ulululum. Asaʾ ganya boboka, migibaʾ anyek unulululum.

¹⁴ Ugunja yokaʾ nidyaʾ unulumnulumaʾ ara, wanaʾ ok goluwoka unulululum.

¹⁵ Hemyab o, Akhaya sokok men yuba domek nimi Stefanus ek nim era, ugunda seleb ella ululumaʾ anyaʾ. Sikda munaʾ Imik Neyung mab amba aran wa ara nauba welemak.

¹⁶ Nara ugunuk ban men nang edya, unu pe welemaknya nenyek pe yeiriwoka welemak nang ek an, sikja yuba pe kelemnelum. Dara alak ok gom, alda nidyaʾ sik neik wa pe welemak nang, sikja yuba pe kelemnelum.

¹⁷ Stefanus beb, Fortunatus beb, Akhaikus beb, ugun lunuwoka nak arawanenobaʾ aboka yekaʾ anasa, nara eiya dabnyok.

¹⁸ Sikda nadya ganya angawoka pel eleklesak sok, sikja unulumaknya nenedya naba eiya ulunel. Ban unuweisija nang era, men perobaʾ leboka ublulumaʾ aboka lebna.

Sidyaʾ Nonga Giboka Lebsuk Yuba

¹⁹ Asia sokok sam yuba dolomak nimi dara, ugunuk perob aboka gibsak. Akwila beb, alaʾ gela Priskila geb, onoʾ sikja ek an Imik Neyung yuba longowoka dolomak nim eb dadya, ugunuk perob aboka nauba gibsak.

²⁰ Nunja hemyabo anyagan nim edya nidyaʾ ugunuk perob aboka gibsak. Ugun moumen anaba yuba dolomakaʾ geknewolulaʾ aboka, pe salawoka gibeldalalulum.

²¹ Nara nabeyok ugunuk perob aboka, sounuwoka gibsin. Na dam nang soruk adya ban momnya doboka gibsin.

²² Heknedya Wenelesilnya bek nauba wanaʾ unaʾ orok dara, bera hyak malya dolul. Maranata. Nunja Wenelesilimnya o, yalom e.

²³ Wera Wenelesilnya Yesus adya wanaʾ uboka eleksinaʾ ugunuk sobaʾ ulusulul.

²⁴ Nadya Yesus Kristus lomok ulumnek ab wanaʾ unaʾ ara, ugunuk ulusulul. Perob. Nara Paulus seleb lemna.