1 KORINTUS 15 - PERJANJIAN BARU NALCA YUBA

Kristus Embengaʾ Suboka Bukok Yuba

¹ Nadya hemyab o, wenera nadya youmaʾ enyek ugunuk perob lero yanggan yuba leb elegeisisaʾ anyek, saawoka bekiyiwanesin. Ugunda ban elegeisisaʾ yub enyek doboka, onoʾ pe seklelum.

² Ugunda yuba lebok ara, anyek senewoka dib senenaʾ orok danyek hnonok. Onoʾ nadya pe men leb elegesisa Imik Neyung yub ek pe salabmowoka ulumun dara, Imik Neyung yub enedya ugun nonga blebnesil.

³ Hemyab o, nadya ugunuk yokaʾ-yokaʾ leb elegesisaʾ ara, nadya seleb dobsenya nek leb elegesisa. Imik Neyung yuba momnya dobok sok, hyak dib nong ara, Kristus somogok ara nunja malya unaʾ enesa somogok aboka, seleb leb elegesisa.

⁴ Onoʾ, alda seleb soko lokek dara, winilyabaʾ sum era, seleb suboka embengaʾ welewokaʾ ara, Imik Neyung yuba momnya dobok.

⁵ Dara, Kristus ara men dara, Petrus bek suboka laga aabdangamokaʾ ara, onoʾ saawoka eimik dara, alja obadya yuba dolomek nang ek, laga suboka aabdok.

⁶ Ban nen seleb dara, onoʾ yok nimi denga lindaraʾ badya nim ek (500 nim) seleb subna aboka aabdangamok. Ban unusuk nim era, nauba so ara seleb somogorob bok, hnon nim era weneba or eikaʾ ulumak.

⁷ Ban nen seleb aabdanggogobok dara, onoʾ Yakobus bek Kristus ara, nara seleb embengaʾ subna aboka aabdanggogobok dara, onoʾ yok-yok yuba lenaʾ gak nanga nidyaʾ ak hnon aabdok.

⁸ Sidyaʾ nong ara nak an, nara okoka yok sum enyek beiyinyeknya bek an aabdok.

⁹ Wera nak dara, Imik Neyung yuba donaʾ nim ek nauba olosisaʾ anasa, nak dara, hyak soko nong ok an Wenelesilnya bedya yuba lenaʾ gaknya ulumnakanya, wera Imik Neyung yuba lenaʾ gaknya hengguneneseng senelamna.

¹⁰ Bok, Imik Neyung adya wanaʾ uboka eleksinaʾ nong edya, nara wera an seleb wen ulumna sok dasa. Imik Neyung adya nadya unulamsa malya unaʾ doboka boboganyokaʾ ara, salyaʾ lelem ub lobnenggubnyok. Nadya yok yuba lenaʾ nang era, nauba so ununaʾ orok bok, nak danyek nauba yeiriwoka welemsa. Bok, nera nadya ok wenggulumsa. Alda nenera Imik Neyung adya nak wanaʾ uboka eleksinaʾ elegenyokaʾ adya unumsa.

¹¹ Anasa wera ugumbabya or hek nim ek ab, Imik Neyung yuba dololumaʾ ara, nak ab gom, yok yuba lenaʾ nang ek ab gom, nera yok lanawanggunumla. Dib nong ara, nunja ban yuba lero yalasab dara, ugun doboka dib senelumaʾ anyek, hnonok dib nong.

Nim Embengaʾ Bukullilisil Yuba

¹² Nunja ugunuk leb elekgiga yalasabnya nera, Kristus anyek somogoka embengaʾ suboka bukok aboka lel eleklesab dara, ugun yok nim era, hekasa seleb somogorob nim era, embengaʾ suboka buknenggunuseng alalum do?

¹³ Seleb somoklomak nim enyek, aldib embengaʾ suboka buknenggunuseng bok dara, wera Kristus anaba alda embengaʾ subnenggumnamso.

¹⁴ Dara Kristus ara, dib suboka embengaʾ danggusubok dara, ugunja dib senelelumaʾ ara, yareng eleknaʾ loboka malya dangoka, nunja Imik Neyung yuba lero yalasabaʾ anababya dib danggunumso.

¹⁵ Onoʾ nauba so ara, Imik Neyung adya Kristus ara, aldib embengaʾ suboka bukiyibok aboka lero yabalamoubaʾ anasa, orok bok dara, nunja Imik Neyung ak sondaʾ lebnesibyaʾ nonga hnonok hyak omom nong. Dara, wen somoklomak nim era, embengaʾ subnaʾ ara, hyak orok dara, Imik Neyung adya Kristus bek embengaʾ bukiyiwanggunumso.

¹⁶ Somoklomak nim era, embengaʾ suboka buknenggunuseng dara, Kristus anaba embengaʾ suboka buknenggumnamso.

¹⁷ Anasa wera, Kristus anyek embengaʾ suboka bukillinaʾ orok bok dara, wera ugunja yuba dib senelelumaʾ ara lendar anaso dangoka, ugunda malya unaʾ ak sam or ulumnusom.

¹⁸ Wera nenera, yuba don nimi bok Kristus lomok seleb somogorob nim eneba, eimik era blebnenggunususo.

¹⁹ Kristus ak ganya wenaʾ dibaʾ ara, seleb gobdo sokok anyek ok unuro daknamla dara, nimi nidyaʾ sokok an ulumak nimi danara loboka, nuk danyek malya nim ak ulumak senewanesiseng.

²⁰ Bok, Kristus ara somoknaʾ ak ab seleb bukiyimokaʾ ara, hyak dib unumok. Anan nong adya, wera seleb somogek nim era, embengaʾ suboka buknemakaʾ damok ara anadya dangamok.

²¹ Nimi somoknaʾ damok ara, nim adya lanamokaʾ anasa, onoʾ somoknaʾ ak ab ara embengaʾ suboka bukillinaʾ damok ara, onoʾ nim ek ab lanalamla.

²² Nimi nidyaʾ ara, Adam beblaboka neikaʾ ak hiboka ulumek adya somoklemak sok, neik so weneba Kristus ablaboka neikaʾ himekaʾ adya, embengaʾ bukiyiwanesil.

²³ Bok, nimi nidyaʾ munaʾ gobdo yok-yok elaʾ gigiro embengaʾ suboka bukiyiwanasil. Kristus ak men embengaʾ suboka bukiyibok. Dara, onoʾ eimik al Kristus yanggalya sum era, alja ak ulumak nim era, embengaʾ suboka bukiyiwanasil.

²⁴ Dara, hyak dakalongnaʾ nong sum yanamla. Ban sum enyek, Kristus adya wenewoka bo usinaʾ eb, yok-yok senenggom dub unaʾ ab, yok-yok migibaʾ ab dara, sokok nenewanamla. Dara nidyaʾ migib gong danara, Kristus adya doblyekanya, nunja neyung Imik Neyung bek elegoka lebnamla.

²⁵ Wene salek era, Kristus anyek dubnya dangoka wenelesilyaʾ ara, Imik Neyung adya isaʾ nimi nidyaʾ dob dakdowoka, Kristus ak wera anjinya aboka lebnamla.

²⁶ Dara, hyak eimik nongnya nera, Imik Neyung adya hyak senenggomaʾ nunja isaʾ nimi somoknaʾ damok dubnya nera orok nenewanamla.

²⁷ Imik Neyung yuba bukuk sam momnya dobokaʾ ara, ”Imik Neyung adya yokaʾ-yokaʾ nidyaʾ ara, al ulumlaʾ damumduk sam buk siklewok.” Ban nidyaʾ yokaʾ-yokaʾ hyokaʾ ara, nera Imik Neyung nong ak lebnenggom, nera Kristus ak sam buk siklewoknya, Imik Neyung bek lebnenggom.

²⁸ Imik Neyung nong anyek, nidyaʾ yokaʾ-yokaʾ ara, aljinya nok dolulaʾ aboka, Kristus ara albabya, Imik Neyung adya yokaʾ-yokaʾ nidyaʾ ara, alja damumduk seleb nenewalya dara, wera Kristus adya al damnya ara Imik Neyung damumduk nenebdanamla. Dara Imik Neyung adya albeyok nidyaʾ wenewoka bo ulumnesil.

²⁹ Seleb somoklomak nim enyek, embengaʾ suboka bukillisinaʾ orok bok dara, nimi hnon somoklomak nim emba meka dalasak nim era, hekaʾ hubnamak do? Dara, hekasa nera sikda unulumak do? Dara eimik era, nim embengaʾ suboka bukiyiwanggunusil bok dara, hekasa siksamba meka daboka uldalamak do?

³⁰ Numbabya hekasa yokaʾ-yokaʾ igina kwelesilaʾ ak sam uboka unulusulul senelemab do?

³¹ Nadya hemyab o, ugunja nunja Wenelesilnya Yesus Kristus ak seleb dib senelumaʾ anasa, perob senelamna sok, li sob-soba somoganesinya bok, or yeiriwoka wero yabalamna.

³² Nara Epesus heikek anara, nara yeiriwoka bei gama yakoka okoka obnenggununadyok sab losinimaʾ ara, nim amba bok salyaʾ lelem unuro yabalesinya dara, hekaʾ pewaneneso do? Dara seleb somoklomak nim enyek, suboka embengaʾ buknenggunuseng bok dara, wera ban lelemak yub enyek ubnesibya ara, ”Nunda ampum somokdowanamabaʾ anasa, sumen era pe bera seboka eiya hlaboka dero ulunob,” alamak.

³³ Salyaʾ malya nim eb halyaʾ nenewoka un dara, perobnya bek anaba ganya malya dangalamlaʾ anasa, ugunda sondaʾ leboka bol neneldanggom.

³⁴ Ugunda wen eibkweblulum. Hnon sounuwoka malya ul soununaʾ ara hyak mem. Ugun gangganek sam ara, Imik Neyung yuba elgom nimi hnon ulumakaʾ anasa, ugunda alya ganya bobnesom.

Nimi Nonga Seleb Embengaʾ Sublya Danyek Yuba

³⁵ ”Somoklomak nim era, hekaʾ huboka embengaʾ buknemak ak lebla do?” senewoka hnon lebnelumjaʾ. Dara onoʾ, ”Hnonda somoklomak nim era, seleb embengaʾ suboka bukija dara, hek nong ek sikenek ongiyiwanasil do?” aboka heibnelumjaʾ.

³⁶ Anda gal dok yinaʾ doklelam salek era, dok ara anam somoknaʾ ara orok bok dara, embengaʾ bongonggulumla. Anasa, anaso heibnesom dara, dongdang alalum.

³⁷ Dara, anda gandum yinaʾ gom, yok gal dok yinaʾ gom doklelamaʾ ara, dok ok doklelam, eimik danamso nong ek doknenggululam.

³⁸ Imik Neyung adya ok albeyok ganya doboka, perob dolul senewanya nenyek, nong ek an eleklamla. Imik Neyung adya gal dok yinaʾ hogunga yok-yok elaʾ gigiro sunuwoka nong eleklamla.

³⁹ Dara onoʾ, embengaʾ ulumak manaʾ unuruwaʾ anaba, nidyaʾ ara hnonok soub ara, loboka or yok-yok anyek uro balamak. Nim ak dara, nong ara hnonok digum ok ulumla, bok yok-yok digumaʾ ak dara, nonga yok-yok ul meneklemak, wining ara alja nong era, yok so ulumla, hadyaʾ anaba nonga yok-yok ok ulumla.

⁴⁰ Anasonya neikik, imik ulumlaʾ ab, sokok sam ulumlaʾ nidyaʾ ara, nonga yok-yok ok ulumla. Imik sam nidyaʾ ululanya nera, hogung anaba yok soʾ ak ulumla, dara onoʾ sokok sam ulumlaʾ hogung neneba, yok soʾ ulumla.

⁴¹ Henga dingilamla senedyaʾ era, onoʾ yok so bok, walaʾ ak dara, yok so yeblamla. Guraʾ ara gong-gong dilinaʾ yeblamlaʾ anaba, hogunga yok-yokaʾ ak ulumla. Dara, guraʾ anaba gong adya sik moumen anaba, senedyaʾ yok-yok sikba ulumakaʾ gigiro yeblemak.

⁴² Anasonya neikik somogorob nimi nidyaʾ embengaʾ bukiyiwanasil sum enyek unuwanasil. Somogek sum soko loksik nong era, songa leboka blololanya nek urob, bok sikenek eimik subija danyek ongiyiwanasil nong era, songa leboka blobnenggunusil nong ek eleganesil.

⁴³ Somogek nim enyek, soko loksik nong era, hmeng uboka malya nong ek ulumek, bok sikenek onsok embengaʾ suboka bukiyiwanasil danyek ongiyiwanasil nong era, migibaʾ perob nongaʾ anyek ulumnamak.

⁴⁴ Somogomekaʾ anasa lokesik nong era, sokok anyeb nong bok, seleb suboka embengaʾ bukija danyek nong era, ganya nong ulumla. Dara, nong ara hnonda sokok anyeb nong ulumso dara, hnonda ganya nong anaba ulumso.

⁴⁵ Nenesa Imik Neyung yub ek momnya dobokaʾ ara, ”Men uyimoknya bera, nera Adam benyek, embengaʾ ul eininaʾ men youbuka dangamok.” Bok sidyaʾ nong Adam bera, nim embengaʾ ganya eleklesilnya bek an ulumla.

⁴⁶ Men lanamok nong era, ganya nong gom, dem somoknaʾ nong ek elegesuk. Ganya nong era, eimik enyek an lanabok an.

⁴⁷ Men uyimoknya Adam bera, soko yokaʾ ak doboka uyimok, bok eimik Adam bera, imik heikek abaʾ ara yeilimok.

⁴⁸ Sokok an ulumak nimi nidyaʾ ara, men soko adya uyimok Adam benesoʾ ak ulumak. Bok imik heikek ulumak so nim era, imik heikek abaʾ ara yeilimoknya beneso ak ulumak.

⁴⁹ Nunda wenera, soko adya uyimoknya Adam bedya hogung enesoʾ ak ulumab sok, eimik era, nunda imik ab sam yeilimoknya bedya hogung enesoʾ ak ulumnemab.

⁵⁰ Hemyab o, nadya ban wenyhenya nera damok ara banasa lebna. Nunja nong eneng ab ara, Imik Neyung wenesin heikek wekel binggunumab. Dara onoʾ, nunja somoknaʾ nonga ulumabaʾ anara, pe ulmoubnaʾ damok nonga danggunumla.

⁵¹ Banara gununaʾ memaʾ bok, lebsinaʾ banyek pe keblulum. Nunda nidyaʾ ara somoganggunumab bok, alda nunda nonga nidyaʾ yok nong dangiyiwanesil.

⁵² Ban nera sidyaʾ nonga benggong yuba lebnamla sum enyek, al wene sab-sab henga ublabom alamab sok, nunja nong enera yok nong dangiyiwanesil. Anasa wera, benggong yuba lebnamla sum era, seleb somogorob nim era, perob nonga doronggoka embengaʾ bukiyiwanesil. Dara embengaʾ ulumab nang era, yok embengaʾ nonga lunuwoka eleganesil.

⁵³ Nunja nonga wen an somoknaʾ nonga bo ulumabnya nenera, loboka embengaʾ ulmoubnaʾ nonga lunuwoka eleganesil. Dara, sokok anyeb nong enera loboka, imik heik ab nong enyek, lunuwoka eleganesil.

⁵⁴ Somoknaʾ nong era loboka, ulmoubnaʾ nonga lunuwoka eleganesil dara, onoʾ sokok anyeb nong era loboka, imik heik ab nong enyek, lunuwoka eleganesil dara, wera ban unuwanasil sum enyek, Imik Neyung yuba bukuk sam momnya dobokaʾ ara, danyek gigiwanamla ara, ”Somoknaʾ damok ara seleb orok nenewoka goowoka, bleboka usinaʾ ok seleb gigiro lobla,” hyok ara gigiwanamla.

⁵⁵ Hnon momnya dobokaʾ ara, ”Wei somoknaʾ damok o, anja pe ollamaklalam ara, hanyagar ulumla do? Wei somoknaʾ damok o, anja si yu hwamaʾ ara, har sam ulumla do?” hyok.

⁵⁶ Somoknaʾ damok alja si yu hwamaʾ ara, malya unaʾ ulumla. Dara malya unaʾ ara, unuwanalum an yub adya laga dangoka migib ulumla.

⁵⁷ Bok, Imik Neyung adya nunja Wenelesilnya Yesus Kristus bedya bleboka oblamagoka elegosukaʾ anasa, nunda Imik Neyung ak perob aboka giblenob.

⁵⁸ Hemyabo nadya wanaʾ ulusin nim o, anasa wera, ugunda ganya kaboka migibaʾ anyek ulululum. Ugunja Wenelesilnya bemba nidyaʾ welelum wa nera, salyaʾ lelem danggunusil anasa, ugunda Wenelesilnya bemba yeiriwoka welelulum.