1 KORINTUS 14 - PERJANJIAN BARU NALCA YUBA

Onoʾ Imik Neyung Adya Eleklesil Wa Wenaʾ Damok Yuba

¹ Ugunda yok nim ek, wanaʾ ubnob senewoka pe yeiriwoka duboka unululum. Hnonda Imik Neyung Geisinya bedya eleklesil wa migib enyek, nauba so ara nimi yok nim ek Imik Neyung yuba lenaʾ migib enyek, dobnob senewoka dulululum.

² Nimi ben hnon, yok nimi yuba salalanya bera, alda nim ek yuba sal eleknenggululabok, alda Imik Neyung ak, yuba sal eleklamla. Anasa alja salamla yuba denga danara, Imik Neyung Geisinya adya lel eleklamlaʾ anyek, Imik Neyung ok ella ulumlaʾ digum ok lelemlaʾ anasa, nimi sirikaʾ ara, keboka ella danganggulumak.

³ Alda saawoka, Imik Neyung yuba lelemak nang ek dara, nim ak ganya migiba nenewanobaʾ aboka, Imik Neyung ak ab yuba lel eleklesak. Nera migiba nenewoka, ganya sangiyiwoka, ganya hekiyiwanobaʾ aboka, yuba lel eleklesak.

⁴ Yok-yok yub enyek salalanya bera, al damnya migiba gebeldalamla, bok Imik Neyung yuba lel eleklesak nang era, yuba lelemeibya enyek, yuba donaʾ nim ek migibaʾ gebellilimak.

⁵ Ugunda nidyaʾ yok-yok yuba salamnasom dara, perob senewanesinya. Bok, hyak nauba perob nong ara, ugunda Imik Neyung adya unuwaseng senelamlaʾ anyek, nim ek lel eleklemnesom dara, nauba perob senewanesinya. Imik Neyung yuba lelemak nang ek dara, hyak dib nong nang ulumak bok, yok-yok yuba salamak nim era, yuba danganaʾ orok dara, or mek so ulumak. Alda yok-yok yuba salamak nim era, yuba dolomak nim enyek migibaʾ dangiyiwanobaʾ aboka, yuba dangawanamla dara, pellilimnesil.

⁶ Wera, na kabo nim o, nak ugunuk yanasinyekanya, yok-yok yuba saro yabasinya dara, ugunsamba dara perob danasuso de? Nera ugunuk dara, mekaʾ sibin anaba perob danggunususo. Alda yoknya perob danasonya nera, Imik Neyung yuba damok ak gom, yokaʾ-yokaʾ anyek Imik Neyung amba geklewoka lel eleklesisinya gom, Imik Neyung yuba nong ak lel eleklesisinya gom, neklesisinya dara, perob danesisonya nera an.

⁷ Ganya orok ulumlaʾ ak ara, benggong ganya hibaʾ orokaʾ anaba, gal benggong gom, wir benggong gom ara, pe gong-gong anaʾ orok dara, nimi yok nim edya dara, hek ber yub ek diliwoka seblamla do senewanaseng.

⁸ Yok sununaʾ era, sibamaʾ adya poo alamak benggong enyek, salyaʾ so leleseng dara, heknedya pe anara mala obdanamabaʾ anasa, ken lel yabak aboka diri ubdaneseng do?

⁹ Ugunuk dara, neik so. Anja yok yuba sanaʾ pe beknaʾ lenaʾ orok dara, anja lero salasom yub era, ella danggunuseng. Dara anja saro lololam yub era, salyaʾ im pik dengaro lobnamla.

¹⁰ Sokok anara, yok-yok yuba nauba ulumla bok, yuba mandebnaʾ gong danara, hnon salyaʾ lelem malobnaʾ ara orok.

¹¹ Bok, nimi ben hnon nak yuba sab onowananesobok, elgom ubnesinya dara, wera nera, mok soko nimi moumen ulusinim.

¹² Ugunuk dara, Imik Neyung adya eleklesil wa wenaʾ dobnob senen ganya ululumaʾ anasa, dib nong ara, Imik Neyung adya eleklesil wa wenaʾ damoka dobmunaʾ ara, yuba dolomak nim enyek, pebgiga balalulaʾ aboka migib unaʾ ak dobnobaʾ aboka, duboka elelulum.

¹³ Ban nenesa, wera nimi yok-yok yuba salameija nim era, Imik Neyung adya migibaʾ elegesilya enyek, sikja salamak yuba damok enyek, anasa lelemab aboka neknemakaʾ anasa, Imik Neyung ak molowanok.

¹⁴ Anasa, yok-yok yub edya saboka mololesinya dara, nadya ganya edya dara, dib molosinyebok, nadya ganya lomok wekoka anyek senewoka molonggulusinya.

¹⁵ Anasa wera, nara hekaʾ hubnesinya do? Dara nara ban nenyek eimik unuwananya nera, nadya ganya edya mololemnenabok, onoʾ pe seinin ganya anaba neikaʾ mololemnamna. Dara ganya adya bera ara seblemnamna bok, pe seinin ganya edyaʾ anaba, seblemnamna.

¹⁶ Dara, anja ganya adya Imik Neyung ak perob aboka mololemnelam bok, yok nim edya anja mololomenaʾ ara, yok yuba saboka mololemen adya kebnenggublya adya, anja mololemen molonaʾ ek hekaʾ huboka perob henemso do?

¹⁷ Imik Neyung bek perob aboka, anja molololam molonaʾ era perob bok, yok nim emba dara, anja molonaʾ era, bakiyiwoka perob danganggulumla.

¹⁸ Nak dara, yok-yok yuba edya ugunda mek salalum bok, nara nauba salamnaʾ anasa, Imik Neyung ak perob aboka giblamna bok,

¹⁹ nara nim Imik Neyung yuba donaʾ nim longowoka dolomakaʾ ak ara, yuba lebnesinya dara, yuba deng sal-salyaʾ yok-yok yuba gong sanaʾ loboka, yuba doka sirika lambadya ok, nim ella danameijinya nenyek aboka, lebnesisinya.

²⁰ Nadya hemyabo nim o, ugunda mek mabo ganya seininaʾ anyek seininggom, mem. Yu ganya boboka malya unaʾ ak sam ak dara, mek moum den mab eneso ulululum. Bok, ganya seininaʾ ak sam ara, ganya kamna nim eneso ulululum.

²¹ Unuwanalum an bukuk sam orowek men momnya dobokaʾ ara, ”Nara anyagan yok yuba salamek nim eb, sekel yanggan nim eb, sik pik uboka nadya mab Israeli nim ek, yuba lelemnesin bok, sikda ban unuwanyaʾ adyaʾ anaba, nadya yuba kebnenggununyak,” anaʾ ara Wenelesilnya bedya wenyamok.

²² Anasa wera, yok-yok yub edya, bobgeregoka san dara, nera Imik Neyung yuba dolomak nim emba sanggulumak bok, alda yuba donggulumak nim emba beknaʾ dibaʾ ella danokaʾ aboka ulumla. Dara onoʾ, ununumnaʾ yub anyek lero yabalamakaʾ ara, yuba donaʾ orok nim emba unggululabok, yuba dib senelemak nim emba ulumla.

²³ Anasa wera, ugun yuba donaʾ nimi nidyaʾ Imik Neyung yuba longowoka dolosomaʾ ak sam ara, ugun yuba dolosom nimi, yuba nidyaʾ yok-yok yuba geregoka saro balasom dara, beiyek nimi gom, yuba donggulumak nimi gom edya dara, ugunuk yeiniboka, sikda serema salasil gom senewanasiseng.

²⁴ Bok ugunda nidyaʾ ara, Imik Neyung yuba lel elegeldalamnasom bok, beiyik dem nimi gom, yuba donaʾ orok nimi gom yalaseng bok, ugunja Imik Neyung yuba lelesomaʾ adya, wera nim era, sikja malya unaʾ ak malya ulumabaʾ ak senewaneseng. Onoʾ lelesom adya, sikja malya unaʾ yana lelewoka,

²⁵ sikja ganya lomok sam yokaʾ-yokaʾ doknolomlaʾ ara, nidyaʾ laga danamla. Anadya nimi danara, dunuwoka omouwoka Imik Neyung bek giblemnemak. Dara nim enedya, Imik Neyung ara aldib ugun gangganek sam ulusil aboka laga lebnemak.

Imik Neyung Yuba Dolomnaʾ Ak Sam Unulumak Yuba

²⁶ Hemyab o, anasa wera, ban nidyaʾ lebnanya nera damok ara hekaʾ ak lebna do? Ugunda mamagoka longolulum dara, hnonda bera seblemak, hnonda yuba neklesak, hnonda Imik Neyung ak ab, yok-yok ununaʾ neklesak, hnonda yok-yok yuba bobgeregoka salamak, hnonda yuba salamak ara, anasa-anasa lelemak aboka, yana lelewoka neklesak. Bok ban nera nidyaʾ ara, Imik Neyung mab bukiyiwanobaʾ aboka unul dalalulum.

²⁷ Ugunda yok-yok yuba bobgeregoka sabnemun bok dara, nimi penya gom, winilya gom ben hnon lebgogowalya dara, onoʾ yok be hnon leblul. Dara ben hnonda, damok ara banyek anara lebab aboka yana lelewolul.

²⁸ Nimi hnonda damok ara, anasa-anasa lelemab aboka, damoka yana lelenaʾ orok bok dara, wera yok-yok yuba bobgeregoka salameija nim era, yuba donaʾ nim longolomeijaʾ hnoum anyeb, geleganok. Dara sikbeyok ganya adya ok lebdangoka, hnon Imik Neyung ak lelenok.

²⁹ Imik Neyung yuba lesin nang ara, nimi penya gom winilya nimi gom, Imik Neyung yuba lelenok. Dara anyagan yuba longolomak nim era, hekaʾ ak lelemak do aboka, seiniro ulunok.

³⁰ Bok Imik Neyung yub ara, anyagan yuba longoseng ak an, nimi ben hnon yuba longosonya bek ella usin yuba yanamso dara, men lelelanya bera lobnamso.

³¹ Wera ban unuwanalumaʾ adya, nimi nidyaʾ elaʾ gigiro hnonok-hnonok ok, Imik Neyung yuba leboka, nimi nidyaʾ ella dangoka, ganya gwelelek anaʾ dobnelum.

³² Imik Neyung Geisinya bedya, Imik Neyung yuba lebnokaʾ aboka, eleklesil migib damok era, sik dam nang Imik Neyung yuba lelemak nim edya, siklewoka bo ulumnamak.

³³ Imik Neyung ara, alda pe dob dakdowoka ulumla Imik Neyung ulumla. Alda salyaʾ eirigal hwam Imik Neyung unggulumla. Munaʾ Imik Neyung mabo nidyaʾ unulumak sok,

³⁴ yuba dololum salek era, gelewa ara yuba sanaʾ ara loboka geleganok. Gelewa ara yuba salalulum anaʾ ara mem. Unuwanalum an yuba bukuk sam momnya dobok sok sunuwoka, sikda dub danganaʾ ara, mem.

³⁵ Gelewa ara yokaʾ-yokaʾ ella danamab aboka dara, sikja nenyab ek, ek ab heibneseng. Yuba donaʾ nim longolomakaʾ ak sam, gela hnon yuba salamla dara, alya yakaʾ ak ulumla.

³⁶ Imik Neyung yub ara, ugunuk ab men lanamok de? Goma, Imik Neyung yub ugunuk ok lel elegel yeilisik de?

³⁷ Hnon nim era, ununumnaʾ lenaʾ damok migibaʾ ulunel gom, Imik Neyung Geisinya adya yok eleknaʾ elegenyok senemlya dara, wera nadya momnya doboka beillilamnaʾ anara, Wenelesilnya bedya oruknaʾ yub ara, an senewoka yo hulul.

³⁸ Bok, ben hnon nadya ban lelemna yub enyek, walab loblya dara, unuwalenya bera neik so alba walab lobnelum.

³⁹ Nadya hemyab o, anasa wera, ugunda Imik Neyung yub anyek, nim ek leb elegeisinya senewoka dulululum. Bok, nimi hnon yok-yok yub edya bobgeregoka lelemeijaʾ ara, mem loblulum aboka yuba seknenggom.

⁴⁰ Bok, yokaʾ-yokaʾ nidyaʾ ara, ganya dibom anaʾ loboka, pe lelewoka unulumnulum.