1 KORINTUS 10 - PERJANJIAN BARU NALCA YUBA

Israeli Nimi Meknemekaʾ Neik Diligaʾ Dobijek Hyok Yuba

¹ Nadya hem yabo nang o! Hemyab ugunda nunja neyung yabo youmaʾ nang, Musa bek diriga balamek sum enyek, sikenek unulusukaʾ anyek, pe seinililulumaʾ aboka beknaʾ neksin. Sikda nidyaʾ debaʾ adya siklewoka bo balasuukanya, onoʾ nidyaʾ senenggomaʾ mek gwan pik goubuka balamek.

² Sikda nidyaʾ ara, meneng bo balasuk debaʾ lomok ab, onoʾ goubuka balamek mek gwan eb dadya, Musa bedya mabo dangoka bo balasuk nim ek, meka daleng sok ubsuk.

³ Dara, sikda nidyaʾ neik ganya gwaneng enyek deregoka,

⁴ onoʾ al neik ganya mek enyek delemek. Sikeneb neikaʾ bo balasuk Imik Neyung girik ek ab meka delemek. Ban girik era, Kristus nong yokaʾ ak ulumok.

⁵ Ban unulumek bok, Imik Neyung adya dara, nimi nauba ak dara, perob senewanggusukaʾ anasa, wera sikda hwalek sam nauba somokdo balamekaʾ adya nimi beʾ ara, yokaʾ anaso yene mane ab menegemok.

⁶ Ban nidyaʾ unuwoknya nera, nunsamba beknaʾ dibaʾ ulusil. Sikja meilinya nek, unuwesibya senelemekaʾ anyek, numbabya neik ganya diligaʾ dobijek aboka ubsuk.

⁷ Onoʾ Hnonda Israeli nim edya sik gangganek ara, yokaʾ-yokaʾ ak giblemek sok numbabya unuweibyek aboka, beknaʾ ara ulusil. Imik Neyung yuba bukuk sam momnya dobokaʾ ara, ”Dara, Israeli nimi bukoka gwaneng meka deregoka, onoʾ sekoka eiya hlaboka unulumek,” alamla.

⁸ Dara onoʾ sik gangganek nim edya, gela salabdangoka unulumek sok, nunda wenera neneso ununaʾ ara mem. Ban nauba unulumekaʾ anasa, Imik Neyung adya, Israeli nimi nauba denga salyaʾ hiboka dombadya dagolongnaʾ loboka (23.000 nim), li hnonok somogek.

⁹ Israeli nim edya Wenelesilnya ak nauba sunulumek sum era, sikda bokoka darasam bagaʾ adya si sablesuk enyek somogekaʾ anasa, numbabya Imik Neyung ak sunulyamanaʾ ara mem.

¹⁰ Hnon Israeli nim edya, mona yeilib menegoka byablemek dara, Imik Neyung adya nimi somogollilesil lero edya osuk. Anasa, numbabya mona yeiliwoka lenaʾ ara mem.

¹¹ Israeli nim ek, nidyaʾ unulumokaʾ ara, nun yok nim enyek, anaso unuweibyek aboka, beknaʾ dibaʾ ulusil. Ban Imik Neyung adya unumoknya nidyaʾ momnya dobokaʾ ara, nuk wenesinaʾ dibaʾ ubsuk. Nunda sidyaʾ daknamla salek ulumab nim emba ubsuk.

¹² Anasa, pe sekemna senelelam nim era, malyinggimenek aboka, pe keeboka seklom.

¹³ Ugunuk an sunulyamalesil sununaʾ ara, yok nimi nidyaʾ anaba, sunulyamalesil soknya nek ulusil. Dara, Imik Neyung ara hyak bojam ululanya ulumlakanya, ugunuk yokaʾ adya senenggomaʾ sunulyamelesil dara, Imik Neyung adya ugunja migiba sunuwoka, uka nauba sunulwenenggom henemla. Dara, ugunuk sunulyamalesil sum era, ugunda pe siklewoka ululumaʾ aboka, Imik Neyung adya pika bak lobnesil.

¹⁴ Nadya wanaʾ ulusin hemyabo nim o, bisaʾ amba hweboka giblemakaʾ anyek, hyak lek aboka lololulum.

¹⁵ Nadya ugunuk lelesinaʾ ara, yokaʾ-yokaʾ pe geremsengaʾ ulumak so nim ek lelesin. Nadya ugunuk lelesin yub era, ugun damnya pe keboka sunuwoka seiniwanalum.

¹⁶ Nunda beknaʾ meka delemab sum enyek, Imik Neyung ak perob aboka giblemab dara, wera nunda Kristus alja eneng adya, hnonok nonga dangiyisukaʾ ak sunulumab de? Dara onoʾ, gwanenga soboka elekdangoka delemabnya nera, Kristus ab neikaʾ hnonok nong seleb danggumoubaʾ ak sunulumab de?

¹⁷ Gwaneng ara hnonok bok, numbabya al hnonok gwanenga soboka delemabaʾ anasa, wera nun nong ara, nauba ulumab bok, hnonok nonga dangoka ulumab.

¹⁸ Ugunda Israeli nim enyek, pe seiniwolulum. Imik Neyung amba beil bilimna bonaʾ enyek, doboka delemek nim era, al denaʾ beil balamnaʾ ak ara arawoka neikaʾ welemek.

¹⁹ Ban wenyhenya nera damok ara, har nesa lebna do? Giblemakaʾ ak beil balamak denaʾ gom, giblemakaʾ nong ak gom, nidyaʾ ara dib nongaʾ hnon ulumlaʾ anasa, lelemna de? Orok e!

²⁰ Yokaʾ-yokaʾ giblemakaʾ ak bo beil biniboka giblemakaʾ ara, Imik Neyung ak beil banggulumak bok, yu ganya bisaʾ ak bo beil balamak. Nadya dara, ugunda bisaʾ giblemakaʾ ab neikaʾ hiboka unaʾ ara, mem senelemna.

²¹ Ugunda Wenelesilnya bedya meka mek hmeiyek demun dara, onoʾ bisaʾ meka deregoka unaʾ ara mem. Ugunda Imik Neyung adya denaʾ de, bisa adya denaʾ de unaʾ ara, hyak mem nong.

²² Goma, Imik Neyung adya nuk nadyinya senelamlaʾ anasa, alda yu ganya nenewanesibya de? Imik Neyung ara hmeng bok, nuk danyek, migibaʾ senenggom nim ulumab de?

²³ Nim adya hnon wenyalamakaʾ ara, ”Nunja yokaʾ-yokaʾ unuwanob senemeibyaʾ ara or unulunob ok,” alamak. Nera aldib mem anaʾ orok bok, ban perob senelemabnya nera, nidyaʾ pelesil gomaʾ. ”Nunja anyek-anyek unuwonun senemeibyaʾ ara, unulumnumab,” wenyalamak bok, ban ululanya nidyaʾ ara, nunsamba perobaʾ nenelesil gomaʾ.

²⁴ Nimi ben hnon, na nong ok pewonulul senewoka alsamba ok yeiriwoka weldanaʾ ara, mem. Nimi nidyaʾ yok nim enyek, pewolul senewoka yeiriwoka welelulum.

^25-26 Imik Neyung yuba bukuk sam momnya dobokaʾ ara, ”Soko ab, yokaʾ ab, yokaʾ-yokaʾ nidyaʾ dubuk ulumlaʾ ara, Wenelesilnya bedyaʾ ak ulumla,” hyok anasa, ugunda deknaʾ gasaʾ ak sam, yokaʾ-yokaʾ soba yakaʾ bo beil yalamakaʾ ara, or dekoka delelulum. Ugunja mek ganya ek ara, igina ubsilyek aboka, nauba heildanggom.

²⁷ Imik Neyung yuba donaʾ oroknya bedya nablaboka neikaʾ nadya ek denemab aboka e bilisilya dara, or binimna senewamen dara, alja denemab aboka youbuka beiblya denaʾ era, or dululum. Ugunja ganya lomok ara, denaʾ enera hanyagarab bo yeilimak do aboka, yana leleb yaboka unaʾ ara mem.

²⁸ Bok, alda ugunuk lebnesakja, ”Ban denaʾ enera bisaʾ ak seleb hweboka beil bilimong denaʾ,” henemak dara, alja mek ganya eb, al lelelanya bek pewolulaʾ aboka, denaʾ beiyimeijaʾ ara, doboka denaʾ ara mem.

²⁹ Ban nadya lebnanya nera, ugunja mek ganya ek lebnenggubna. Alda lelelanya bedya mek ganya ek lebna. Bok, nadya ganya yakdewoka ulunanya nera, hekasa yok nim adya mek ganya edya sikliling sok ubnenyak do?

³⁰ Onoʾ, nara gwaneng denesinyaʾ amba Imik Neyung ak molobgogowoka seleb molomna senewoka delesinya bok dara, hekasa yok nim edya malya ululam heneneseng de?

³¹ Ugunja yokaʾ-yokaʾ nidyaʾ unululumaʾ ara, ugunda gwaneng deregoka meka deregoka, Imik Neyung si imik danalenya nenyek ok unulululum.

³² Anja unulumennya nedya, yok nimi malya unaʾ lomok sam malyinggijek anasa, pe keeboka ululom. Nera Yahudi nim gom, Yahudi gom nim gom, Imik Neyung yuba dolomak nimi gom, nidyaʾ ak lebsin.

³³ Ugunda naba ulumna sok, ugumba unu ulululum. Nara nak pewonululaʾ aboka ununggulumna. Alda yok nim enyek, yokaʾ-yokaʾ nidyaʾ ak ganya sangillilisununaʾ aboka ulumna. Ban nadya nidyaʾ unulunanya nera, nimi nidyaʾ blebsululaʾ aboka ulumna.