ZAKHARIA 10 - KITAB NU TUMPU ALLA LELE MA'IMAI'

Tumpu binalajanji'mo da momposalamatmo mian anu palesayamo hi Ia

¹ De tempo'nyomo nu kau' mimbuhak pompoitamo ujan hi Tumpu. Da nu posihukmo nu Tumpu na kundom anu tinumatampokmo ka' montudunakonmo ujan anu daka' hondo, sahingga iwi-iwi' na ale' molumba'mo na anu sinu'an ka' iwi-iwi' na mian sanangmo na montoa.

² To mia-mian momoitamo hi to pilo-pilogot pa' mosia na nasipnyo ka' mule' mambamo hi mian anu topo tahi'i panyo anu pinoto'i mae nu aha aijo' ola ahi' leko' ka' palasuma madi' ahi' totu'u. Daagi' ko anu montalangkan ipion, panyo katalangan nu aha ola ahi' mompobingong belemiu, ka' potatae anu toto ima-ima' nunu poto'i nu aha madi' ahi' kokaliangannyo. Kalana aijo' mian da'isan noga'aga'atmo susumo domba. Aha singkapmo nagesuk kalana madi'mo ko polaya'nyo.

³ Tumpu notatae, “Aku pinusamo hondo hi mian anu balakuasa tiba hi aha anu mompalentah mian anu palesayamo hi beleng-Ku ka' aha Ku hukumo. Panyo mian anu jojoong i Yehuda Aku na tumpunyo ka' Akumo na Tumpu Anu Daka' na Kuasanyo na mompotuu'mo aha. Aha Ku pojadimo ajahan-Ku anu baani hondo na bau pahampate.

⁴ Anu aijo' hi aha na mian Ku pile'imo da mongkuasai, da bau polaya', ka' mule' da bau kapala nu suludadu anu matangkas na pangkatnyo, ka' mule da anu mompalentah mian anu palesayamo hi belengku.”

⁵ Mian anu jojoong i Yehuda untungmo na mahampate susu mo suludadu anu lewa'mo mompahampeja'akon sampobal' sumo hensek aitu i jalan. Aha mahampate kalana Aku, Tumpu na montulungi aha, ka' suludadu nu sampobali' momon sake'i ajahan nu patundu'mo nu aha iwi-iwi'.

⁶ “Mian anu jojoong i Yehuda Ku pohosonmo mian nu Israel Ku posalamatmo. Po ule'mo Ku boa na aha minsusule' i lipu'nyo kalana Ku kanonongi na aha. Ku pojadimo na aha, salaku bansa anu madi' toho' Ku kolilimi. Akumo na Tumpu nu Aha, iwi-iwi' na do'a nu aha po ule'mo Ku palahatikan.

⁷ Mian nu Israel sumomo suludadu anu baani hondo sumomo mian anu monginumo anggur aha lame'mo. Lee' nu aha mae lengkat pe'e naipuan mae sampe aiya mae i ahop madi' mongkolilimi ka Untungan nahampate anu binee'-Kumo aiya. Aha bilahimo kalana palabuatan anu saidi' mae Ku baumo hi aha.

⁸ Mian anu palesayamo hi beleng-Ku, Kulagamo ka' Ku posihukmo da mosa'angu'mo. Aha Ku pobebasmo ka' mule' Ku ponjoo'mo susumo naipuan mae.

⁹ Maumo ahi' gina'a-ga'at-Kumo na aha namba hi bansa-bansa, aha tataap ahi' monginau' mae Aku kiijo' mae. Aha oposalamatmo sumo aitu mule' na to ana-anak nu aha ka' minsusule'mo hingga-hinggat mamba ilipu'nyo.

¹⁰ Lengkat mae i Mesir ka' lengkat mae i Asyur na aha Ku sule'akonmo. Ku pojoongmo na aha i posi lipu'nyo. Ku boamo na aha mamba i Gilead ka' suele i Libanon, sahingga songko-songko na lipu' me saja' aha.

¹¹ De aha motaapmo i ambai anu memang talalo ahi' mahan, Aku, Tumpu na monsapahije bokon anu toto daka-daka'; sahingga Kaunyo nu Nil, timbalimo inanggasan na lananyo. Bansa Asyur anu talalo takabun ma'ambangmo, ka' Mesir anu baani hondo madi'mo balakuasa.

¹² Aku mompohosonmo mian anu palesayamo hi beleng-Ku, aha tulu-tulutanmo ka' monsombahmo Aku. Akumo, na Tumpuu anu notataemo.”