ZAKHARIA 1 - KITAB NU TUMPU ALLA LELE MA'IMAI'

Tumpu po ule'mo nolaga mian anu palesayamo hi Ia

¹ Ibitu'on anu ko ualu'nyomo i uno nu taun anu ko ohua'nyomo na i Tomundo' Darius nompalentah Persia, Tumpu nompotokamo mae potuunon aiya hi belengku, i Nabi Zakharia anak i Berekhya ka' makumpu i Ido na ia.

² Tumpu nompalentahmo aku da motatae sumo uuka hi mian anu palesayamo hi Ia, “Tempo'nyo naipuan mae Aku, Tumpu Anu Daka' na Kuasanyo notambuha'mo hondo hi mompolee' nu belemiu.

³ Panyo uuka aiya Aku motataemo hi belemiu: Pinsusule'mo mae hi beleng-Ku da Aku suele minsusule'mo hi belemiu.

⁴ Boli montiho susumo mompolee' nu belemiu. Daagi' pe'e naipuan mae to nabi-nabi nompotokamo potuunon-Ku hi aha da aha bolimo mombau palabuatan anu ma'idek, ka' mombau dosa'. Panyo aha madi' nompajuli ka' madi' nongka oho' tinulu-tulutan hi beleng-Ku.

⁵ Iyamo mae na mompolee' nu belemiu tiba to nabi-nabi tempo uuka aiya? Madi'mo daagi' ko ahanyo.

⁶ Aha to nabi-nabi posaihon-Ku haha aijo' pinoto'ing-Kumo na to pale-palentang-Ku ka' mule' to poki-pokinde'-Ku da opoto'i hi mompolee' nu belemiu. Panyo aha madi' nompajuli sahingga aha tionyo ahi' montanggung apaa na anu jadi saidi' mae imihinyo. Lantas aha nompele-pele'mo ka' mule' nongakuimo tukoonyo nu aha Akumo na Tumpu Anu Daka' na Kuasanyo mohukumo aha sitimbang tiba kasala'an nu aha ka' susumo ahi' anu tinantukan-Kumo.”

Nabi nontoamo ajahan pa' sangkuka na konjoo'nyo

⁷ I tanggan uampulu' ka opat bitu'on Syebat aijo'mo bitu'on ko sampulu'nyomo ka' sa'angu' i taun anu ko ohua'nyomo na i Tomundo' Darius nompalentah. Tumpu nompoto'imo potuunon-Nyo hi belengku. Daagi' kino sampahuan nontoamo pihi-pihi,

⁸ tinoangku malaekat nu Tumpu nonsake'imo sa'angu' na ajahan momea'. Ia tinuminjomo isa'angu' na bangka'nyo i olot nu kau' murad. Aitu mae ihikunyo tinuminjo pa sangkuka na ajahan sangga'at daagi' ko anu momea', daagi' ko anu gio-gio mohaha tiba anu mopute'.

⁹ Pinokilawangkumo hi ia, “O, Tuan apaa na alati'nyo ajahan haha aijo' iwi-iwi'?” Ia nontaami, “Ku potiju'je na alati'nyo hi beleyum.

¹⁰ Aku pinalentah mae nu Tumpu da mompalesa dunia aiya.”

¹¹ Iwi-iwi' na ajahan haha aijo' nompoto'imo hi malaekat, “Kami nolajangimo songko-songko na dunia aiya, tinoamo mami na dunia aiya aman hondo.”

¹² Lantas malaekat aijo' notataemo, “O, Tumpu Anu Daka na Kuasanyo, Aku talalo hondo mongkalibosi ka' saja' monginau' kota' Yerusalem kota'-Ku anu susi'.

¹³ Tumpu nontaani malaikat aijo' tiba potatae anu monghibun,

¹⁴ ka malaikat aijo nompo kau aku da' mompotoka apa na anu tinaeakon nu Tumpu Anu Matangkas na Kuasa-Nyo. Aku mongkalibosi kondo ka molibos kondo kota Yerusalem, kota-Ku anu susi'.

¹⁵ Panyo Aku talalomo hondo notambuha' hi aha to bansa-bansa haha aijo' anu nongoa'imo aman hondo. Kalana salatan Aku nongintimo tambuha'-Ku hi aha mian anu palesayamo hi beleng-Ku, bansa haha aijo' nompaka bee'i mule'kasansala'an hi aha mian anu palesayamo hi beleng-Ku.

¹⁶ Uuka aiya Aku minsusule'mo i Yerusalem da mombee'imo ka ampunan hi kota' aijo'. Laigan-Ku po ule'mo obau ka' mule' kota' Yerusalem po ule'mo opokopiani.”

¹⁷ Malaekat aijo' nonsaimo aku da mompoto'i potuunon aiya mule', “Tumpu Anu Daka' na Kuasanyo binalajanji'mo tukoo-Nyo to kota-kota'nyo po ule'mo mohumpak kasanangan i uno nu kantumuu'an ka' tukoo-Nyo mule' daagi' minsan na Ia montulungi Yerusalem ka' mongakui salaku tumpunyo Ia ahi'.”

Tanduk-tanduk anu tinoa

¹⁸ Han anu sangga'at mule' na tinoangku, opat na tanduk nu sapi'.

¹⁹ Pinokilawangkumo hi malaekat, anu notatae mae hi belengku, “Apaa na alati'nyo nu tanduk-tanduk haha aijo'?” Ia nontaami mae, “Tanduk-tanduk haha aijo' salaku tanda to kala-kalaja'an anu toto hoso-hoson momposungkehetmo mian anu jojoong i Yehuda, Israel, tiba Yerusalem.”

²⁰ Lantas Tumpu nompotoamo mae hi belengku aha opat na mian anu topo tutuk besak boa-boa na pontutuk.

²¹ Pinokilawangkumo, “Apaa na kahanda'nu aha toka mae aiya?” Tinaamannyo, “Da mombau kahengge'an ka' mompatundu'mo aha to bansang-bansang anu nohansunimo Yehuda ka' mule' nomposungkehetmo mian anu jojoong ikiijo'.”